ដោយៈឫទ្ធិស័ក្តិ/ភ្នំពេញៈសមត្ថកិច្ចបានបញ្ជូនខ្លួនមនុស្សបីនាក់ដែលបានដឹកនាំមនុស្សមួយក្រុមធ្វើបាតុកម្មខុសច្បាប់នៅមុខស្ថាននទូតចិនប្រចាំកម្ពុជាកាលពីថ្ងៃទី២៣ ខែតុលាទៅតុលាការនៅរសៀលថ្ងៃទី២៤ ខែតុលា នេះ ដើម្បីឲ្យព្រះរាជអាជ្ញា និងចៅក្រមធ្វើការសាកសួរ។
លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានមានប្រសាសន៍ប្រាប់រស្មីកម្ពុជានៅរសៀលថ្ងៃទី២៤ ខែតុលា នេះថា មនុស្សទាំងបីនាក់នេះ ត្រូវបានសមត្ថកិច្ចនៃស្នងការដ្ឋាននគរបាលរាជធានីភ្នំពេញកសាងសំណុំរឿងបញ្ជូនទៅតុលាការហើយនៅរសៀលថ្ងៃទី២៤ ខែតុលា នេះ។
អ្នកនាំពាក្យរូបនេះបញ្ជាក់ថា“មនុស្សបីនាក់ដែលចាប់នៅមុខស្ថានទូតចិដែលបានដឹកនាំមនុស្សធ្វើបាតុកម្មមុខស្ថានទូតចិនកាលពីព្រឹកថ្ងៃទី២ខែតុលាគឺត្រូវបានសមត្ថកិច្ចនៃស្នងការដ្ឋាននគរបាលរាជធានីភ្នំពេញកសាងសំណុំរឿងបញ្ជូនទៅតុលាការហើយនៅរសៀលថ្ងៃទី២៤ ខែតុលា នេះ ពីបទធ្វើសកម្មភាពញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម”។
មនុស្សទាំងបីនាក់ដែលបញ្ជូនខ្លួនទៅតុលាការមានៈ ១. ឈ្មោះ តុង និមល ភេទប្រុស រស់នៅសង្កាត់ដើមមៀន ក្រុងតាខ្មៅ ខេត្តកណ្តាល។ ២. ឈ្មោះ លឹម សាន ភេទស្រី នៅឃុំកំពង់ស្វាយ ស្រុកកៀនស្វាយ ខេត្តកណ្ដាល។ ៣. ឈ្មោះ យ៉យ ស្រីមុំ នៅឃុំព្រែកស្ដី ស្រុកកោះធំ ខេត្តកណ្ដាល។
សូមជម្រាបថា អាជ្ញាធរមានសមត្ថកិច្ចបានធ្វើការអនុវត្តវិធានការរដ្ឋបាលលើមនុស្សមួយក្រុមប្រមាណជាង ១០នាក់ ដែលមកធ្វើបាតកម្មនៅមុខស្ថានទូតចិនប្រចាំកម្ពុជា កាលពីព្រឹកថ្ងៃទី២៣ ខែតុលា បន្ទាប់ពីពួកគេបានធ្វើការស្រែកតវ៉ាបង្កភាពអានាធិបតេយ្យនៅទីនោះ។ក្រុមអ្នកតវ៉ាបានស្រែកប្រឆាំងនឹងវត្តមានទាហានចិននៅក្នុងប្រទេសកម្ពុជា។
សមត្ថកិច្ចបានអនុវត្តវិធានការរដ្ឋបាលដោយឃាត់ខ្លួនមនុស្សចំនួនបីនាក់ក្នុងនោះស្ត្រីពីរនាក់ និងបុរសម្នាក់ នាំទៅកាន់អធិការដ្ឋាននគរបាលខណ្ឌបឹងកេងកដើម្បីធ្វើការសាកសួរអំពីដំណើររឿងពួកគេបានមកស្រែកតវ៉ាមុខស្ថានទូតចិនដោយគ្មានការជូនដំណឹងឬគ្មានការអនុញ្ញាតពីរដ្ឋបាលរាជធានីភ្នំពេញ។ បន្ទាប់ពីសសាកសួររួច មនុស្សទាំងបីនាក់ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ៕សរន
