ដោយៈទេពកង្រី / កំពង់ឆ្នាំងៈ នៅថ្ងៃទី២៤ ខែតុលា ឆ្នាំ២០២០ ម្សិលមិញ លោកស្រី បណ្ឌិត សឿ សុជាតា អនុរដ្ឋលេខាធិការ ក្រសួងអប់រំ យុវជន និងកីឡា និងជាអនុប្រធាន ក្រុមការងារ រាជរដ្ឋាភិបាលចុះមូលដ្ឋាន ស្រុកបរិបូណ៌ និងក្រុមការងារ រួមដំណើរដោយអាជ្ញាធរដែនដី បានចុះសាកសួរសុខទុក្ខ និងនាំយកអំណោយ ចែកជូនគ្រួសារងាយរងគ្រោះ និងរងគ្រោះ ដោយទឹកជំនន់ទឹកភ្លៀង ចំនួន ៥០ គ្រួសារ នៅតំបន់ក្រចាប់ ស្ថិតក្នុងភូមិក្បាលដំរី ឃុំត្រពាំងចាន់ ដែលស្ថិតនៅក្នុងភូមិក្រចាប់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ។
ក្នុងឱកាសនោះ លោកស្រី បណ្ឌិត សឿ សុជាតា បានពាំនាំនូវប្រសាសន៍ ផ្តាំផ្ញើការសាកសួរសុខទុក ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងសម្តេចកិត្តិបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលកន្លងមក សម្តេចតែងតែគិតគូរ ពីសុខទុក្ខប្រជាពលរដ្ឋ ងាយរងគ្រោះ គ្រប់ទីកន្លែង ដោយមិនប្រកាន់ពូជសាសន៍ និងនិន្នាការនយោបាយឡើយ។
អំណោយដែលបានចែកជូន ប្រជាពលរដ្ឋងាយរងគ្រោះ និងរងគ្រោះដោយទឹកជំនន់ ៥០ គ្រួសារនោះ ក្នុងមួយគ្រួសារៗ ទទូលបាន អង្ករ២០គីឡូក្រាម មី១កេស តង់១ ភួយ១ ក្រមា១ មុង១ ទឹកសុទ្ធ១យួរ ទឹកស៊ីអ៊ីវ១យួរ សាប៊ូ១ដុំ និងថវិកា ២ ម៉ឺនរៀល៕ ល
