ដោយ: ប.ខុន / ភ្នំពេញ: គម្រោងសាងសង់ផ្លូវ៣៤ខ្សែនៅខេត្តព្រះសីហនុសម្រាប់ការងារដាំដើមឈើនិងផ្កាសម្រេចបាន ៥១,៨២ ភាគរយនៃគម្រោងហើយ។ឯការងារ ចាក់កៅស៊ូបន្ថែមពីលើបេតុងមិនទាន់បានចាប់ផ្តើមនៅឡើយទេ ដោយសារនៅមានភ្លៀងកើតឡើងបន្តបន្ទាប់។
លោក គួច ចំរើន អភិបាលខេត្តព្រះសី ហនុបានប្រាប់ឱ្យរស្មីកម្ពុជាដឹង នៅថ្ងៃទី ២៤ខែតុលាឆ្នាំ២០២០ថា ការងារអ៊ុតកៅ ស៊ូបន្ថែមពីលើផ្លូវបេតុង៣៤ខ្សែនៅខេត្តព្រះសីហនុមិនទាន់អាចធ្វើបាននៅ ឡើយទេ ដោយសារភ្លៀងនៅបន្តធ្លាក់ច្រើនអ៊ុតកៅស៊ូមិនជាប់ តែការងារជាច្រើនផ្នែកផ្សេងៗទៀតនៅលើដងផ្លូវទាំង៣៦ខ្សែភាគច្រើនបានរួចនិងជិតរួចរាល់ហើយ។
ផ្លូវទាំង៣៤ខ្សែនេះ នៅក្នុងគម្រោងចាក់ បេតុងកម្រាស់០.២៥ម៉ែត្រនិង អ៊ុតបេទីម បន្ថែមពីលើកម្រាស់០.០៧ ម៉ែត្រ។
តាមរបាយការនៃការស្ថាបនាផ្លូវ៣៤ខ្សែ នៅខេត្តព្រះសីហនុគិត ត្រឹមថ្ងៃទី២២ខែ តុលាឆ្នាំ២០២០សម្រេចបានលទ្ធផលដូច ជាការងារចាក់បេតុងផ្លូវសម្រេចបាន១០០ភាគរយ, ការងារដាក់លូតាមផ្លូវសម្រេចបាន១០០ភាគរយ, ការងាររៀបចំប្រព័ន្ធលូរណបសម្រេចបាន ៣៧,៦៧ ភាគរយ, ការងាររៀបខឿនក្រានីត សម្រេចបាន ៨៨,៤៨ភាគរយ, ការងាររៀបចំកម្រាលក្រានីតសម្រេចបាន ៥៨,២១ភាគរយ, ការងារដំឡើងបង្គោលភ្លើងតាមដងផ្លូវសម្រេចបាន ៩២,៤៩ភាគរយ ,ការងារបំពាក់អំពូលភ្លើងតាមដងផ្លូវសម្រេចបាន ៨១,៥២ភាគរយ, ការងារបំពាក់កាមេរ៉ាសុវត្ថិភាពសម្រេចបាន១៥ភាគរយ, ការងារតម្លឹងភ្លើងស្តុបចរាចរណ៍សម្រេច បាន៤៥ភាគរយ, ការងារដាំដើមឈើនិងផ្កាក្រដាសសម្រេចបាន ៥១,៨២ភាគរយ។
រំលឹកឱ្យដឹងថាផ្លូវចំនួន៣៤ខ្សែដែលកំពុងបន្តសាងសង់នៅក្នុងខេត្តព្រះសីហនុ មានប្រវែង សរុបជាង៨០គីឡូម៉ែត្រ ធ្វើការសាងសង់ដោយក្រុមហ៊ុនចំនួន ៨ រួមមានក្រុមហេងសម្បត្តិក្រុមហ៊ុន SCE ក្រុមហ៊ុនសាជីវកម្មពិស្ណុការអន្តរជាតិ ក្រុមហ៊ុនK.B.H Construction Co.,LTD ក្រុមហ៊ុន VT Engineering Construction ក្រុមហ៊ុនរ៉ូ យ៉ាលមេគង្គខស្ត្រាក់សិន & ឌីវើឡុបមែន កងវិស្វកម្មសម្តេចតេជោហ៊ុនសែន សៀម រាបនិងកងវិស្វកម្មលេខ១៧៨ស្ពាន ថ្នល់ នៃក្រសួងការពារជាតិ។
គម្រោងខាងលើនេះបានបើកការដ្ឋានជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេច អគ្កមហាសេនាបតីតេជោ ហ៊ុនសែន នាយករដ្ឋមន្ត្រី កាលពីថ្ងៃទី១៦ខែ វិច្ឆិកាឆ្នាំ២០១៩ ជាគម្រោងលើកឡើងដោយ គណៈកម្មាធិការ ជាតិគ្រប់គ្រង និងអភិវឌ្ឍន៍ តំបន់ឆ្នេរសមុទ្រកម្ពុជា ដែលមាន លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាប្រធានតាំងពីឆ្នាំ២០១៨៕ ល
