ដោយ: តារារិទ្ធ / ភ្នំពេញ: ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានប្រកាសដាក់ឲ្យបើកដំណើរការជូនប្រជាពលរដ្ឋធ្វើដំណើរជាបណ្តោះអាសន្នផ្លូវក្រោមដីនៅតំបន់ចោមចៅ។
សម្តេចតេជោ ហ៊ុន សែន បានប្រកាសបែបនេះនៅក្នុងឱកាសអញ្ជើញជាអធិបតីក្នុងពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ពីផ្លូវជាតិលេខ១ ទៅតំបន់អភិវឌ្ឍន៍កោះនរានិងពីកោះនរាទៅទីក្រុងរណបកោះពេជ្រ នៅព្រឹកថ្ងៃទី២៦ ខែតុលា ឆ្នាំ២០២០។
គម្រោងស្ថាបនាស្ពានអាកាសនិងផ្លូវក្រោមដីចោមចៅក្នុងខណ្ឌពោធិ៍សែនជ័យដែលបានបើកការដ្ឋានកាលពីថ្ងៃទី២៩ ខែមិថុនា ឆ្នាំ២០១៨ កន្លងទៅ ហើយបច្ចុប្បន្នការស្ថាបនាផ្លូវក្រោមដីនៃគម្រោងនេះបានអនុវត្តរួចរាល់។
សម្តេចបានប្រកាសបើកឲ្យដំណើរការជូនប្រជាពលរដ្ឋធ្វើដំណើរជាបណ្តោះអាសន្ន ដើម្បីជួយសម្រួលដល់លំហូរចរាចរណ៍ និងកាត់បន្ថយការកកស្ទះក្នុងតំបន់នេះ រហូតដល់ពេលការដ្ឋានត្រូវបានបញ្ចប់ និងសម្ពោធដាក់ឱ្យប្រើប្រាស់ ជាផ្លូវការក្នុងពេលខាងមុខ៕ ល/Ha