​ព្យុះ​ទី​ម៉ូ​ឡាវ ដើរ​ដល់​ក្នុង​សមុទ្រ​ចិនខាងត្បូង​ហើយ ក្នុង​កម្រិត​ជា​ព្យុះ​ទី​ហ្វុ​ង​

ដោយៈ ប​.​ខុន / ភ្នំពេញៈ ព្យុះ​ទី​១៨ ឈ្មោះ ម៉ូ​ឡាវ (MOLAVE) នៅ​ព្រឹក​ថ្ងៃទី​២៦ ខែតុលា​នេះ វា​បាន​រំកិល​ខ្លួន ចូលដល់​ក្នុង​សមុទ្រ​ចិនខាងត្បូងហើយ​ក្នុង​កម្រិត ជា​ព្យុះ​ទី​ហ្វុ​ង (TY) ដោយមាន​ដំណើរ​លឿន និង​បើ​គ្មាន​ការប្រែប្រួល​ទេ ព្យុះ​នេះ វា​មាន​ឥទ្ធិពល​ទឹកភ្លៀង​ច្រើន និង​ខ្យល់ ធ្វើឱ្យប៉ះពាល់ដល់​ខ្ព​ស់រាប​ភាគ​ឦសាន ខ្ពង់រាប​ភាគ​ខាងជើង តំបន់​ទំនាប​កណ្តាល​ភាគ ពាយ័ព្យ និង​ធ្វើឱ្យ​ទឹកទន្លេ​មេគង្គ ងើបឡើង​ម្តងទៀតនៅ​ចុងរដូវ​វស្សា​នេះ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង ឧតុនិយម បាន​ប្រាប់​រស្មី​កម្ពុជា ឱ្យដឹងនៅ​ព្រឹក​ថ្ងៃទី​២៦ ខែតុលា ឆ្នាំ​២០២០​ថាៈ ព្យុះ​ទី​១៨ ឈ្មោះ ម៉ូ​ឡាវ (MOLAVE) ដែល​ក្រសួងបាន​ជូនដំណឹង តាមរយៈ​សេចក្តីប្រកាស កាលពី​ថ្ងៃទី​២៥ ខែតុលា នៅ​ព្រឹក​ថ្ងៃនេះ (២៦​តុលា​) វា​បាន​រំកិល​ខ្លួនចូលដល់​ក្នុង​សមុទ្រ​ចិនខាងត្បូង​ហើយ ក្នុង​កម្រិត​ជា​ព្យុះ​ទី​ហ្វុ​ង (TY) ដោយមាន​ដំណើរ​លឿន​។​

​ព្យុះ​ទី​១៨ ដែល​បាន​កើតមានឡើង បន្ទាប់ពី​ព្យុះ​ទី​១៧ ឈ្មោះ សូ​ដែល បាន​ឡើងគោក និង​រលាយ​នៅលើ​ខាងជើង ភាគ​កណ្តាល​របស់ ប្រទេស​វៀតណាម ដោយ​ពុំមាន​ឥទ្ធិពល​អ្វីដល់​ប្រទេស​កម្ពុជា​ទេ ។ ករណីនេះ លោក ចាន់ យុ​ត្ថា បានបញ្ជាក់​ថាៈ ប្រសិនបើ​វា​គ្មាន​ការប្រែប្រួល ពី​ការ​ព្យាករណ៍នៅពេលនេះទេនោះ វា​នឹង​នាំមក​នូវ​ទឹកភ្លៀង​ច្រើន និង​ខ្យល់ ធ្វើឱ្យប៉ះពាល់ ដល់​តំបន់​ខ្ពង់រាប ភាគ​ឦសាន ខ្ពង់រាប​ភាគ​ខាងជើង និង​តំបន់​ទំនាប​កណ្តាល ភាគ​ពាយ័ព្យ​ហើយ​។​

​លោក ចាន់ យុ​ត្ថា បានឱ្យដឹង​ទៀតថាៈ ពេលនេះ ក្រសួង​បាន​និង​កំពុងធ្វើការ​តាមដាន យ៉ាង​យកចិត្តទុកដាក់អំពី​សកម្មភាព​របស់​ព្យុះ​នេះ​។ ព្យុះ​ថ្មី​នេះ នឹងធ្វើឱ្យ​ទឹកទន្លេ​មេគង្គ ងើប​ឡើងវិញ​ជាថ្មី​ម្តងទៀតនៅ​ចុងរដូវ​វស្សា​នេះ​។​

ព្យុះ​ទី​ម៉ូ​ឡាវ ដើរ​ដល់​ក្នុង​សមុទ្រ​ចិន ខាងត្បូង​ហើយ ក្នុង​កម្រិត​ជា​ព្យុះ​ទី​ហ្វុ​ង​

​ក្រសួង​ធនធានទឹក និង​ឧតុនិយម កាលពី​ថ្ងៃទី​២៥ តុលា កន្លងទៅ បានប្រកាស​ព័ត៌មាន​ថា យោង​ការតាមដាន និង​ការវិវត្ត​ជាក់ស្តែង នៃ​ស្ថានភាព​អាកាសធាតុ បង្ហាញ​ឲ្យ​ឃើញថាៈ នៅ​ព្រឹក​ថ្ងៃទី​២៥ តុលា វិ​សម្ពាធ​មួយ ដែល​បាន​កើតឡើង នៅក្នុង​មហាសមុទ្ ប៉ាស៊ីហ្វិក ខាងកើត កៀក​នឹង​ប្រទេស​ហ្វីលីពីន បាន​វិ​វត្ត​ខ្លួន​ជា​បន្តបន្ទាប់ ទៅជា​ព្យុះ​ទី​១៨ ឈ្មោះ ម៉ូ​ឡាវ (MOLAVE) ដោយ​ដើរចូលទៅ​ភាគ​កណ្តាល ប្រទេស​ហ្វីលីពីន​។​

​នៅក្នុង​សេចក្តីប្រកាស បាន​ព្យាករ​ថាៈ ព្យុះ​នេះនឹង​បង្កើន​ឥទ្ធិពល​ជា​លំដាប់ នៅពេល​ធ្វើដំណើរ​ឆ្លងកាត់ ប្រទេស​ហ្វីលីពីន រួច​ចូលមកក្នុងសមុទ្រ​ចិន​ខាងត្បូង នៅ​ថ្ងៃទី​២៧ ខែតុលា ហើយ​បាន​ថមថយ​ឥទ្ធិពលនៅពេល​ចូលមក​ដល់ ប្រទេស​វៀតណាម ត្រង់​ម្តុំ​ចំណុច​ក្វាង​ងៃ (Quang Ngai) នៅ​ថ្ងៃទី​២៨ ខែតុលា រួច​បន្តដំណើរ​ចូល​លើ​តំបន់​ប៉ា​សុង របស់​ប្រទេស​ឡាវ ដោយ​ថមថយ​ឥទ្ធិពលទៅជា​វិ​សម្ពាធ និង​សម្ពាធ​ទាប នៅ​ថ្ងៃទី​២៩ តុលា ខាងមុខនេះ ។​

​ក្នុង​សេចក្តីប្រកាស​ដដែល បាន​សរសេរ​ទៀតថាៈ លក្ខណៈ​បែបនេះ នឹងធ្វើ​ឲ្យ​អាកាសធាតុនៅ​ព្រះរាជាណាចក្រ​កម្ពុជា ចាប់ពី​ថ្ងៃទី​២៨ ដល់​ថ្ងៃទី ២៩ ខែតុលា មាន​ស្ថានភាព ដូចខាងក្រោម ៖
-​បណ្តា​ខេត្ត​នៅ​តំបន់​ជួរ​ភ្នំ​ដងរែក និង​ខ្ពង់រាប​ភាគ​ឦសាន រួមមាន​ខេត្ត រតនគិរី ស្ទឹងត្រែង​ព្រះវិហារ និង​ខេត្ត​ឧ​ត្ត​រ​មានជ័យ អាចមាន​ភ្លៀង​ធ្លាក់​ច្រើន លាយឡំ ជាមួយនឹង​ខ្យល់​ខ្លាំង ។​
-​បណ្តា​ខេត្ត​នៅ​តំបន់​វាលទំនាប រួមមាន​ខេត្តកំពង់ធំ សៀមរាប បន្ទាយមានជ័យ ប៉ៃលិន និង​ខេត្តបាត់ដំបង អាចមាន​ភ្លៀង​ធ្លាក់​ច្រើន​។​

​សេចក្តីប្រកាស​នេះ បាន​អំពាវនាវ​ដល់​ក្រសួង ស្ថាប័ន​ពាក់ព័ន្ធ អាជ្ញាធរ​ដែនដី និង​សាធារណជន ពិសេស​បងប្អូន​ប្រជាពលរដ្ឋ ដែល​នៅ​តំបន់​ខាងលើ សូមជ្រាប​ជា​ព័ត៌មាន និង​បង្កើន​ការយកចិត្តទុកដាក់ ប្រុងប្រយ័ត្ន​ខ្ពស់ ដើម្បី​ចៀសវាង នូវ​គ្រោះថ្នាក់​ផ្សេងៗ ដែល​អាច​កើតមានឡើងជាយថាហេតុ​។ ក្រសួង​ធនធានទឹក និង​ឧតុនិយម បាន​និង​កំពុង​បន្ត​តាមដានយ៉ាង​យកចិត្តទុកដាក់ លើ​បាតុភូត​នេះ ហើយនឹង​ជម្រាបជូន​ព័ត៌មាន ជា​បន្តបន្ទាប់​ទៀត ក្នុងករណី​អាកាសធាតុ មានការ​ប្រែប្រួល ៕​/V/Ha

ទីតាំងផ្សាយពាណិជ្ជកម្ម

- Advertisment -

Most Popular