ដោយសៅវ៉ាន់ឌី/ព្រះវិហារ៖ ផ្លូវជាតិលេខ៩៤ ពីស្រុកឆែបទៅឃុំកំពង់ស្រឡៅជាប់ព្រំដែនប្រទេសឡាវ ត្រូវបានជួសជុលឡើងវិញ បន្ទាប់ពីរងការខូចខាតនៅកន្លែងមួយចំនួនដោយសារជំនន់ទឹកភ្លៀង ដើម្បីឱ្យប្រជាពលរដ្ឋក៏ដូចជាភ្ញៀវទេសចរណ៍ជាតិ និងអន្តរជាតិធ្វើដំណើរបានស្រួល។
លោកសំលាងទ្រីប្រធានមន្ទីរសាធារណការនិងដឹកជញ្ជូនខេត្តព្រះវិហារបានឱ្យដឹងនៅរសៀលថ្ងៃទី២៥ខែតុលា ឆ្នាំ២០២០នេះថាៈផ្លូវជាតិលេខ៩៤ ពីស្រុកឆែបទៅឃុំកំពង់ស្រឡៅមួយ ឃុំកំពង់ស្រឡៅពីរ ជាប់ព្រំដែនឡាវមានប្រវែង៦៥គីឡូម៉ែត្រ ផ្លូវនេះជាប្រភេទផ្លូវក្រាលគ្រួសក្រហម។
លោកបន្តថា នៅរដូវវស្សានេះ ទឹកភ្លៀងបានធ្លាក់ជោគជាំធ្វើឲ្យផ្លូវនេះរងការខូចខាតដោយកន្លែង ដែលធ្វើឱ្យពិបាកធ្វើដំណើរតែពេលនេះក្រុមការងារមន្ទីរសាធារណការនិងដឹកជញ្ជូនបានធ្វើការជួសជុលផ្លូវនេះឡើងវិញរួចរាល់អាចឱ្យប្រជាពលរដ្ឋធ្វើដំណើរដោយស្រួលបានវិញហើយ។
លោកបញ្ជាក់ថា នៅពេលខ្លីខាងមុខនេះ ក្រុមការងារថែទាំជួសជុលផ្លូវថ្នល់ នៃមន្ទីរសាធារណការ និងដឹកជញ្ជូនខេត្តព្រះវិហារនឹងបន្តការជួសជុលផ្លូវជាតិលេខ៩២ផ្លូវជាតិលេខ៩៥។ក៏ដូចជាផ្លូវជាច្រើនខ្សែរទៀតក្នុងទិសដៅឱ្យប្រជាពលរដ្ឋបានធ្វើដំណើរដោយស្រួលប៉ុន្តែមកដល់ថ្ងៃនេះផ្លូវខ្លះទឹកមិនទាន់ស្រកអស់នោះទេ។
លោកបានរំលឹកថាដោយអនុវត្តន៍តាមការណែនាំរបស់លោកទេសរដ្ឋមន្ត្រីស៊ុនចាន់ថុលរដ្ឋមន្ត្រីក្រសួងសាធារណការនិងដឹកជញ្ជូននិងលោកប្រាក់សុវណ្ណអភិបាលខេត្តព្រះវិហារក្នុងអំឡុងពេលដែលមានគ្រោះទឹកជំនន់។មន្ទីរបានត្រៀមលក្ខណៈចាត់ចែងក្រុមការងារឈរជើងតាមទីតាំងមួយចំនួនមានគ្រឿងចក្រនិងសម្ភារគ្រប់គ្រាន់ក្នុងលក្ខណៈត្រៀមអន្តរាគមន៍ជួយសង្គ្រោះប្រជាពលរដ្ឋមិនឱ្យរងគ្រោះដោយទឹកជំនន់នោះទេ។
លោកបានបន្តថា ក្នុងស្ថានភាពគ្រោះទឹកជំនន់ ក្រុមការងារថែទាជួសជុលផ្លូវថ្នល់ របស់មន្ទីរសាធារណការនិងដឹកជញ្ជូនខេត្តព្រះវិហារនៅតែបន្តធ្វើសកម្មភាពក្នុងទិសដៅរក្សាការពារមិនឱ្យផ្លូវខូច។ពិសេសមិនឱ្យផ្លូវពីក្រលុកសំបុកមាន់ក្លាយជាថ្លុកឫអូរនោះទេ។សូមអំពាវនាវឱ្យប្រជាពលរដ្ឋចូលរួមថែរក្សាផ្លូវថ្នល់ទាំងអស់គ្នាដើម្បីជាប្រយោជន៍ឱ្យការប្រើប្រាស់បានយូរអង្វែង និងកុំដឹកលើសទម្ងន់៕S/
