Home ព័ត៌មានជាតិ សេដ្ឋកិច្ច នៅ​ខេត្តកណ្តា...

នៅ​ខេត្តកណ្តាល គេ​សង្កេតឃើញ មានកូន​ត្រី​ប្រហុក​ច្រើន បន្ទាប់ពី​ទឹក​ឡើង​ខ្ពស់​បន្តិច នៅ​ចុងរដូវ​វស្សា​


ដោយៈ​ប​.​ខុន / ភ្នំពេញៈ នៅ​រដ្ឋបាល​ជលផល ខេត្តកណ្តាល ក៏មាន​ប្រជា​នេសាទ សុំ​ជួល​គន្លង ដាយ​ត្រី ធ្វើ​អាជីវកម្ម សម្រាប់​ពី​ឆ្នាំ ២០១៩-២០២០ និង​ឆ្នាំ ២០២០-២០២១ ដែរ បន្ទាប់ពី​ទឹកទន្លេ​ទាំង​បួន បាន​ងើបឡើង​បន្តិច ហូរ​ចូល​ព្រែក និង​បឹង នៅ​ចុងរដូវ​វស្សា ដោយ​គេ​សង្កេតឃើញ​មាន កូន​ត្រី​សម្រាប់ធ្វើ​ប្រហុក ផ្អក ច្រើន​រួចមក​។​

​លោក ហេង សុធា​រិ​ទ្ធ នាយ​ខណ្ឌ​រដ្ឋបាល​ជល​ផល​កណ្តាល បាន​ប្រាប់​ឱ្យ​រស្មី​កម្ពុជា​ដឹង នៅ​ព្រឹក​ថ្ងៃទី​៥ ខែវិច្ឆិកា ឆ្នាំ​២០២០​ថា នៅក្នុង​ការដេញថ្លៃ ជួល​គន្លង​ដាយ ត្រី​ធ្វើ​អាជីវកម្ម សម្រាប់​ពី​ឆ្នាំ ២០១៩-២០២០ និង​ឆ្នាំ ២០២០-២០២១ និង​នៅ​ក្នុងការ ប្រកាស​ដាក់ឱ្យ​ជួល កន្លងទៅ គ្មាន​អ្នកដេញថ្លៃ និង​គ្មាន​អ្នក​ជួល​ទេ ដោយសារ​ទឹក ទន្លេ ឡើង​យឺត​ពេល និង​ទាប​ពេក ដោយ​មកដល់ ជាង​ពាក់កណ្តាល រដូវវស្សា​ទៅហើយ ទឹក​នៅតែ​មិនទាន់ មាន​ហូរ​ចូល​ព្រែក និង​បឹង​។​

​នាយ​ខណ្ឌ​រដ្ឋបាល​ជល​ផល ខាងលើ បាន​បញ្ជាក់ថា គន្លង​ដាយ​ត្រី ដែល​ត្រូវ​ដាក់ឱ្យ​ដេញថ្លៃ និង​ជួល​នៅ​ខេត្តកណ្តាល សម្រាប់ធ្វើ​អាជីវកម្ម ពី​ឆ្នាំ ២០១៩-២០២០ និង​ឆ្នាំ ២០២០-២០២១ មាន​ចំនួន ២៦ គន្លង​ដាយ មាន​ប្រជា​នេសាទ សុំ​ជួល​នៅក្រោយ ពេល​បិទ​ការដេញថ្លៃ និង​ការដាក់ឱ្យ​ជួល ចំនួន​ពីរ​គន្លង​ដាយ​ត្រី បន្ទាប់ពី​គេ​ឃើញ ទឹកទន្លេ​ឡើង ហូរ​ចូល​ព្រែក និង​បឹង​មួយចំនួន នៅ​ចុងរដូវ​វស្សា រហូតដល់​មាន​ជា ទឹកជំនន់ នៅ​ខេត្ត ជុំវិញ​បឹង​ទន្លេសាប រួចមក​។​

​លោក ហេង សុធា​រិ​ទ្ធ បានឱ្យដឹង​ទៀតថាៈ កន្លងទៅនេះ គ្មាន​អ្នកណា រំពឹងថា ទឹកទន្លេ បាន​ឡើង​បែបនេះ​ទេ ព្រោះ​ចុងរដូវ​វស្សា ណាស់​ទៅហើយ​។ តែបើ និយាយ​ពី​ការបង្ក្រាប​វិញ រដ្ឋបាល​ជលផល ខេត្តកណ្តាល បាន​ប្រឹងប្រែង​គ្រប់​រូបភាព ដោយមាន​សហការ ជាមួយនឹង​អាជ្ញាធរ​មូលដ្ឋាន ដើម្បី​ការពារ​ពូជ​ត្រី នៅតាម បឹង និង​កន្លែង​អភិរក្ស ដែលមាន​ទឹក​សល់​តិចតួច ក្នុង​រដូវវស្សា និង​បានធ្វើការ​យ៉ាងខ្លាំង​ក្លា ពេល​មានទឹក​ហូរ ចូល​តាម​ព្រែក នៅ​ចុងរដូវ​វស្សា​នេះ​។​

​ប្រធាន​ខណ្ឌ​រដ្ឋបាល​ជ​ល​ផល បាន​និយាយទៀតថាៈ ទឹកទន្លេ ពី​កណ្តាល​រដូវវស្សា ពិតជា​ទាប​មែន តែមាន​កូន​ត្រី​ច្រើន មិន​ត្រូវបាន​បំផ្លាញ ដោយ​ឧបករណ៍ លូ​ស្បៃ​មុង​ទេ ព្រោះ​កូន​ត្រី ច្រើន​មានតែ​នៅក្នុង​ទន្លេ រហូតដល់​ចុងរដូវ ទើប​មានទឹក​ហូរ​ចូល​ព្រែក និង​បឹង ដោយ​នាំទៅ​ជាមួយ នូវ​កូន​ត្រី សម្រាប់ធ្វើ​ប្រហុក ផ្អក​។ នៅក្នុងពេល​ទឹក​ចាប់ផ្តើម​ហូរ​ចូល​ព្រែក កម្លាំង​ជលផល បានចេញ​ធ្វើការ​បង្ក្រាប យ៉ាងសកម្ម​បំផុត ចំពោះ​ការដាក់​របាំង​ស្បៃ​មុង នៅតាម​ព្រែក និង បឹង​នានា ក្នុង​ខេត្តកណ្តាល​។ រដូវ​បើក​នេសាទ តាម​គន្លង​ដាយ បានមក​ដល់​ហើយ មន្ត្រី​ជំនាញ បាន​ចុះ​កំណត់​ទីតាំង មាត់​ដាយ ដែល​ជួល​ពី​ឆ្នាំមុន និង​ឆ្នាំនេះ រួចរាល់​ហើយ​ដែរ​៕​

ទីតាំងផ្សាយពាណិជ្ជកម្ម

- Advertisment -

Most Popular