Home ព័ត៌មានជាតិ សេដ្ឋកិច្ច ឱសថ​អន់​គុណភា...

ឱសថ​អន់​គុណភាព និង​ផលិតផល​ក្លែងក្លាយ​ជាង ៥៤០​តោន​ត្រូវបាន​កម្ទេចចោល​

ដោយៈ ឫទ្ធិ​ស័ក្តិ​/​ភ្នំពេញៈ ឱសថ​អន់​គុណភាព និង​ផលិតផល​ក្លែងក្លាយ​ខុសច្បាប់ រួមមាន ផលិតផល​ឱសថ គ្រឿងសំអាង ថ្នាំ​កសិកម្ម​បារី​អេឡិចត្រូនិក​ផលិតផល​ប្រើប្រាស់​និង​គ្រឿងឧបភោគ​បរិភោគ​ជាង​៥៤០​តោន​ត្រូវបាន​ដុតបំផ្លាញ​ចោល​នៅ​ទីលាន​ចាក់សំរាម​ដង្កោ នា​ព្រឹក​ថ្ងៃទី​៥ ខែវិច្ឆិកា​នេះ​ក្រោម​អធិបតីភាព​លោក​កើត រិ​ទ្ធ រដ្ឋមន្ត្រី​ក្រសួងយុត្តិធម៌​។

ឱសថ​អន់​គុណភាព និង​ផលិតផល​ក្លែងក្លាយ​ជាង ៥៤០​តោន​ត្រូវបាន​កម្ទេចចោល​


លោក មៀ​ច សុផាន់​ណា ប្រធាន​គណៈកម្មាធិការ​ប្រយុទ្ធប្រឆាំង​ផលិតផល​ក្លែងក្លាយ​បាន​ថ្លែងថា នេះ​ជា​លើក​ទី ៩ ហើយ​គណៈកម្មាធិការ​ប្រយុទ្ធ​ប្រឆាំង​ផលិតផល​ក្លែងក្លាយ​បានធ្វើ​ពិធី​កម្ទេច​ផលិតផល​ក្លែងក្លាយ​នានា​ជាពិសេស​ផលិតផល​ដែល​ធ្វើអោយប៉ះពាល់​ដល់​សុខភាព និង​អាយុជីវិត អ្នកប្រើប្រាស់​តែម្តង​។ លោក​បន្តថា ផលិតផល​ក្លែងក្លាយ​ត្រូវបាន​ចាត់ទុកជា​បទល្មើស និង​ពាក់ព័ន្ធ​ជាមួយ​បទឧក្រិដ្ឋ​ឆ្លងដែន ដែល​ធ្វើអោយ​ខាតបង់​ដល់​វិស័យ​សេដ្ឋកិច្ចជាតិ​។ ចំពោះ​ជន​ណា​ដែល​ប៉ុនប៉ង និង​មាន​ចេតនា​លួចលាក់ ផលិត ចរាចរ ចែកចាយ របស់​ខុសច្បាប់​ដែល​បង្ក​មហន្តរាយ​ដល់​សុខភាព និង​អាយុជីវិត​ប្រជាពលរដ្ឋ​ក៏ដូចជា អ្នក​នៅ​ពីក្រោយ​ផ្សំគំនិត ដរាប​នោះ​គណៈកម្មាធិការ​នៅតែ​ប្រកាន់​ជំហរ​បង្ក្រាប​និង​នាំយក​ជនល្មើស​ឬ​អ្នក​ដែល​បំពាន​មក​ប្រឈម​នឹង​ផ្លូវច្បាប់​ជា​ធរមាន​។​

ឱសថ​អន់​គុណភាព និង​ផលិតផល​ក្លែងក្លាយ​ជាង ៥៤០​តោន​ត្រូវបាន​កម្ទេចចោល​


​លោក មៀ​ច សុផាន់​ណា បញ្ជាក់ថា ទស្សនៈវិស័យ និង​បេស​សកម្ម​របស់​គណៈកម្មាធិកា​រ គឺ​មិន​ត្រឹមតែ​បាន​នឹង​កំពុង​ការពារ និង​លើកស្ទួយ សុខុមាលភាព​ប្រជាជន​ប៉ុណ្ណោះ​ទេ ហើយ​ថែមទាំង​ធ្វើ​ឲ្យ​អ្នកវិនិយោគ​ទាំងឡាយ នាំគ្នា​គោរព​ច្បាប់ និង នាំ​ចំណូល​បង្កើន​ពន្ធ​ជូន​រដ្ឋ ដែល​នេះ​ជា​យន្តការ​និង​កិច្ចការ​បង្កលក្ខណៈ​ឲ្យ​មានការ​រកស៊ី​ប្រកួតប្រជែង​ដោយ ត្រឹមត្រូវ ស្របច្បាប់ ក្នុង​សេដ្ឋកិច្ច​ទីផ្សារសេរី ក៏ដូចជា​ផ្តល់​ទំ​ទុកចិត្ត​ដល់​អ្នកវិនិយោគ​ទាំង​ក្នុង​និង​ក្រៅប្រទេស​បង្កើត ការងារ​ជូន​ប្រជាពលរដ្ឋ កាត់បន្ថយ​ការ​ចំណាកស្រុក ស្របតាម​យុទ្ធសាស្ត្រ​ចតុកោណ​ដំណាក់កាល ទី ៤ របស់ រាជរដ្ឋាភិបាល​កម្ពុជា ស្តីពី ការកសាង​សមត្ថភាព និង​ការអភិវឌ្ឍ​ធនធានមនុស្ស ការលើកកម្ពស់​សុខភាព និង​អាហារូបត្ថម្ភ​របស់​ប្រជាពលរដ្ឋ​។ ក្នុងន័យនេះ ដើម្បី​សម្រេច​គោលបំណង និង​គោលដៅ​ជា​យុទ្ធសាស្ត្រ របស់​គណៈកម្មាធិការ​ប្រយុទ្ធប្រឆាំង​ផលិតផល​ក្លែងក្លាយ ក្នុងនាម​ខ្ញុំ​ជា​ប្រធាន​គណៈកម្មាធិការ ខ្ញុំ​នឹង​បន្ត​កិច្ច ខិតខំ​ប្រឹងប្រែង​នេះ​ឲ្យ​អស់ពី​កម្លាំងកាយ​ចិត្ត ដោយ​ពួតដៃគ្នា​ជាមួយ​ស្ថាប័ន អង្គភាព​ជំនាញ​ពាក់ព័ន្ធ​ទាំងអស់ សំដៅ​ធ្វើយ៉ាងណា​ឲ្យ​ការងារ​ប្រយុទ្ធប្រឆាំង​ផលិតផល​ក្លែងក្លាយ ដែលមាន​សម្តេច​ក្រឡាហោម ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ជា​ប្រមុខ​ដឹកនាំ និង​ណែនាំ​ផ្ទាល់ ឲ្យ​ទទួលបាន​ជោគជ័យ​ថ្មី​បន្ថែមទៀត ហើយ​គណៈកម្មាធិការ​នៅតែ​កោតសរសើរ​និង​ថ្លែងអំណរគុណ​ដល់​ក្រសួង​ជា​ដៃគូ​ភាគី ស្ថាប័ន និង កំលាំង​មាន​សមត្ថកិច្ច ពាក់ព័ន្ធ​របស់​គណៈកម្មាធិកា​រ ដែល​បាន​ចូលរួម​សហការ ក្នុង​កិច្ចប្រឹងប្រែង​បំរើកា​រពារ ផលប្រយោជន៍​ជាតិ និង​ប្រជាជន​។ យើង​នឹង​កាន់​ដៃ​គ្នា​ហើយ​បន្តដំណើរ​ទៅមុខ​ទាំងអស់គ្នា​ទៀត ដោយ​ផ្អែក លើ​ស្មារតី​សាមគ្គីភាព កិច្ចសហប្រតិបត្តិការ និង​ការទទួលខុសត្រូវ​រួមមួយ​ចំពោះ​សង្គមជាតិ (​រួមគ្នា​គិត រួមគ្នា​ធ្វើ រួមគ្នា​ទទួលខុសត្រូវ និង​ជោគជ័យ​ទាំងអស់គ្នា​)៕​សរន​

ឱសថ​អន់​គុណភាព និង​ផលិតផល​ក្លែងក្លាយ​ជាង ៥៤០​តោន​ត្រូវបាន​កម្ទេចចោល​
ឱសថ​អន់​គុណភាព និង​ផលិតផល​ក្លែងក្លាយ​ជាង ៥៤០​តោន​ត្រូវបាន​កម្ទេចចោល​

ទីតាំងផ្សាយពាណិជ្ជកម្ម

- Advertisment -

Most Popular