Home ព័ត៌មានជាតិ សង្គម អភិបាល​រាជធាន...

អភិបាល​រាជធានី​ប្រគល់​ឧបករណ៍​មួយចំនួន​សម្រាប់​បម្រើ​ឲ្យ​ការត្រួតពិនិត្យ​ជាតិ​អាកុល ជូន​ស្នងការ​នគរបាល​រាជធានី​ភ្នំពេញ

ដោយ​: រ៉ា​ម៉ន / ភ្នំពេញ​: ឧបករណ៍​សម្រាប់​បម្រើ​ឲ្យ​ការត្រួតពិនិត្យ​ជាតិ​អាកុល ដើម្បី​ពង្រឹង​សុវត្ថិភាព​ចរាចរណ៍ នៅក្នុង​រាជធានី​ភ្នំពេញ មួយចំនួន​ត្រូវបាន​អភិបាល​នៃ​គណៈ​អភិបាល​រាជធានី​ភ្នំពេញ និង​ជា​ប្រធាន​គណៈបញ្ជាការ​ឯកភាព​រាជធានី​ភ្នំពេញ លោក​ឃួ​ង ស្រេង ប្រគល់​ជូនទៅ​ស្នងការ​នគរបាល​រាជធានី​ភ្នំពេញ ដើម្បី​យកទៅ​ប្រើប្រាស់​លើ​ការអនុវត្ត​ការងារ ត្រួតពិនិត្យ​ជាតិ​អាកុល​ទៅលើ​អ្នកបើកបរ​យាន្ត​យន្ត​គ្រប់​ប្រភេទ​នៅក្នុង​រាជធានី​ភ្នំពេញ​។​

​ពិធី​ប្រគល់​និង​ទទួល​ឧបករណ៍​ខាងលើនេះ​ត្រូវបាន​ធ្វើឡើង​កាលពី​ល្ងាច​ថ្ងៃទី​០៥​ខែវិច្ឆិកា​ឆ្នាំ​២០២០ នៅ​ស្នងការ​នគរបាល​រាជធានី​ភ្នំពេញ ក្រោម​វត្តមាន​លោក​ឃួ​ង ស្រេង​អភិបាល​នៃ​គណៈ​អភិបាល​រាជធានី​ភ្នំពេញ​និង​លោក ចេ​វ ហាក់ ស្នងការរង​នគរបាល​រាជធានី​ភ្នំពេញ ។​

​ឧបករណ៍​ដែល​បាន​ឧបត្ថម្ភ​ដោយ​លោក​ឃួ​ង ស្រេង​ខាងលើនេះ រួមមាន​ម៉ាស៊ីន​សំរាប់​វាស់​ជាតិ​អាកុល​ចំនួន ១៦​គ្រឿង ម៉ាស៊ីន​ព្រី​ន​លទ្ធផល​ជាតិ​អាកុល​ចំនួន ១៦​គ្រឿង​និង​បំពង់​ផ្លុំ​ចំនួន​៥០០​បំពង់ ។​

​លោក ឃួ​ង ស្រេង នៅក្នុង​ឱកាស​នោះបាន​មានប្រសាសន៍​ណែនាំ​ដល់​កងកម្លាំង​សមត្ថកិច្ច​ប៉ូលិស​ទាំងអស់​ត្រូវ​បន្ត​ដាក់​គោលដៅ​ដើម្បី​ពិនិត្យ​ជាតិ​អាកុល និង​បន្ត​ការខិតខំ​ប្រឹងប្រែង​លើ​ការរក្សាសន្តិសុខ​សណ្ដាប់ធ្នាប់​ជូន​ប្រជាពលរដ្ឋ​ឲ្យ​កាន់តែ​ល្អប្រសើរ​ថែមទៀត​។​

​ក្នុងឱកាស​នោះដែរ លោក​ចេ​វ ហាក់ ក៏បាន​ថ្លែង​នូវ​ការ​អរគុណ​យ៉ាង​ជ្រាលជ្រៅ​ចំពោះ​ការយកចិត្ត​ដាក់​របស់លោក​ឃួ​ង ស្រេង ដែល​បានប្រគល់​នូវ​ឧបករណ៍​សម្រាប់​វាស់​ជាតិ​អាល់កុល​មួយ​កំ​ប្លេ​មក​ស្នងការ​នគរបាល​រាជធានី​ភ្នំពេញ​។

​លោក​ក៏បាន​បញ្ជាក់​ផងដែរ​ថា​៖ ក្នុង​រយៈពេល​ចុងក្រោយ​នេះ​បទល្មើស​គ្រប់​ប្រភេទ បាន​ថយចុះ ចំណែកឯ​បទល្មើស​គ្រោះថ្នាក់​ចរាចរណ៍​ក៏បាន​ខូច​ចុះ​ជាមួយគ្នានេះ​ផងដែរ​៕

ទីតាំងផ្សាយពាណិជ្ជកម្ម

- Advertisment -



Most Popular