Home ព័ត៌មានជាតិ សង្គម សម្តេច​តេ​ជោ​...

សម្តេច​តេ​ជោ​និង​សម្តេច​កិត្តិ​ព្រឹទ្ធ​បណ្ឌិត​ផ្តល់​អំណោយ​អាវ​រងា​ដល់​បញ្ជាការដ្ឋាន​ការពារ​កោះ ឆ្នេរ​

ដោយ​: មុនី​រ័ត្ន / ភ្នំពេញ​: សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន បានផ្តល់​អំណោយ​ជា​អាវ​រងា​ចែកជូន​កងទ័ព នៃ​បញ្ជាការដ្ឋាន​ការពារ​កោះ ឆ្នេរ ខណៈដែល​រដូវរងា​បាន និង​កំពុង​ឈាន​មកដល់​។ ការចែកជូន​អាវ​រងា​នេះ គឺ​តាមរយៈ​នាយ​ឧ​ត្ត​ម​សេនី​យ៌ វង្ស ពិ​សេន អគ្គមេបញ្ជាការ​កងយោធពល​ខេមរភូមិន្ទ នៅ​ថ្ងៃទី​៥ ខែវិច្ឆិកា ឆ្នាំ​២០២០ នៅ​ទីបញ្ជាការ​ការពារ​កោះ​ឆ្នេរ ស្ថិតក្នុង​ខេត្តកំពង់ស្ពឺ ។​

​នាយ​ឧ​ត្ត​ម​សេនីយ៍ វង្ស ពិ​សេន បាន​មានប្រសាសន៍ថា រាជរដ្ឋាភិបាល​កម្ពុជា ក្រោម​ការដឹកនាំ​របស់​សម្តេច​តេ​ជោ ហ៊ុន សែន តែងតែ​គិតគូរ និង​យកចិត្តទុកដាក់​ខ្ពស់​ចំពោះ​សុខទុក្ខ​កងទ័ព និង​តែង​ជំរុញ​ការដោះស្រាយ​រាល់​បញ្ហា​របស់​បងប្អូន​កងទ័ព​យើង​។ ជាក់ស្ដែង​កន្លងមកនេះ សម្តេច​តែង​បាន​ចាត់​តំណាង​ឲ្យ​នាំយក​អាវ​ភ្លៀង​ផ្តល់ជូន​មុន​នៅ​រដូវភ្លៀង និង​ផ្តល់​អាវ​រងា​នៅមុន​រដូវរងា​មកដល់​។
​ក្រៅពី​ការបង្ហាញ​នូវ​ការយកចិត្តទុកដាក់រ​បស់​សម្តេច​តេ​ជោ ហ៊ុន សែន និង សម្តេច​កិត្តិ​ព្រឹទ្ធ​បណ្ឌិត ចំពោះ​សុខទុក្ខ និង​ជីវភាព​របស់​កងទ័ព នាយ​ឧត្ដមសេនីយ៍ វង្ស ពិ​សេន ក៏​នៅបាន​លើក​បង្ហាញ​ពី​ការខិតខំ​ប្រឹងប្រែង​អភិវឌ្ឍន៍​ប្រទេសជាតិ របស់​រាជរដ្ឋាភិបាល​កម្ពុជា ដឹកនាំ​ដោយ​សម្តេច​តេ​ជោ ហ៊ុន សែន ដែល​ទាមទារ​ឲ្យ​កងទ័ព​ត្រូវ​រួមគ្នា​ថែរក្សា និង ការពារ​ឲ្យ​បាន​នូវ​សមិទ្ធផល​ទាំងអស់នេះ ដោយ​មិនត្រូវ​ឲ្យ​ជន​អគតិ​ណា​មក​បំផ្លិចបំផ្លាញ​នោះឡើយ​។​

​នាយ​ឧត្ដមសេនីយ៍ វង្ស ពិ​សេន បាន​បន្តថា សុខសន្តិភាព​ដែល​កំពុង​កើត​មាននៅ​កម្ពុជា​នេះ គឺ​បាន​ដោយ​លំបាក ដោយ​ការធ្វើ​ពលិកម្ម​រាប់មិនអស់ និង​មាន​សារសំខាន់​ខ្លាំងណាស់​សម្រាប់​ជាតិ និង​ប្រជាជន​។ ក្នុងន័យនេះ នាយ​ឧ​ត្ត​ម​សេនីយ៍ បាន​អំពាវនាវ​ដល់​កងទ័ព​ទាំងអស់​ត្រូវ​រួមគ្នា​ការពារ​ឲ្យ​បាន​ដាច់ខាត​នូវ​សន្តិភាព និង​ស្ថេរភាព​សង្គម ដើម្បី​ផ្តល់ឱកាស​សម្រាប់​ការអភិវឌ្ឍ​កម្ពុជា​បន្តទៅទៀត​។

​ចំណែក​ឧត្ដមនាវីឯក ស្រ៊ុន សារឿន មេបញ្ជាការរង​កងទ័ព​ជើង​ទឹក និង​ជា​មេបញ្ជាការ​ការពារ​កោះ ឆ្នេរ តំណាង​ឲ្យ​នាយ និង​ពល​នា​វឹក​ទាំងអស់ បាន​សម្តែង​ការសប្បាយរីករាយ និង​ថ្លែងអំណរគុណ​យ៉ាង​ខ្ពង់​ខ្ពស់បំផុត ជូន​ចំពោះ​សម្តេច​តេ​ជោ ហ៊ុន សែន និង សម្តេច​កិត្តិ​ព្រឹទ្ធ​បណ្ឌិត ដែល​បាន​ឧបត្ថម្ភ​អាវ​រងា ដល់​កងកម្លាំង​នាពេលនេះ​។ ជាមួយ​នោះ លោក​មេបញ្ជាការ បាន​ប្តេជ្ញា​ដាច់ខាត អនុវត្ត​ភារកិច្ច​ការពារជាតិ ការពារ​បូរណភាព​ទឹកដី ការពារ​រដ្ឋធម្មនុញ្ញ ការពារ​ព្រះមហាក្សត្រ ការពារ​រាជរដ្ឋាភិបាល ដឹកនាំ​ដោយ​សម្តេច​តេ​ជោ ហ៊ុន សែន និង​ប្រឆាំង​ដាច់ខាត​នូវ​រាល់​ទង្វើ​របស់​ជន​ទុច្ចរិត និង​ជន​អគតិ​ទាំងឡាយ ដែល​តែងតែ​ប្រឌិត មូល​បង្កាច់​ប្រជាភិថុតិ ក្នុង​ចេតនា​អាក្រក់​ផ្តួលរំលំ​រាជរដ្ឋាភិបាល​ស្របច្បាប់​៕

ទីតាំងផ្សាយពាណិជ្ជកម្ម

- Advertisment -

Most Popular