Home ព័ត៌មានជាតិ សេដ្ឋកិច្ច ទេសរដ្ឋមន្ត្រ...

ទេសរដ្ឋមន្ត្រី ចម ប្រសិទ្ធ ជួប​តំណាង​អង្គការ​យូណេស្កូ ប្រចាំ​កម្ពុជា​

ដោយៈ ទេព មង្គល / ភ្នំពេញៈ លោក​កិត្តិ​សេដ្ឋា​បណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ បានទទួល​ជួប​លោក សា​ដារ អ៊ូ​ម៉ា អា​ឡា​ម ( Sardar Umar Alam ) តំណាង​អង្គការ​អប់រំ វិទ្យាសាស្ត្រ វប្បធម៌ នៃ​សហប្រជាជាតិ (​យូណេស្កូ = UNESCO) ប្រចាំ​កម្ពុជា ដើម្បី​ពិភាក្សា​ការងារ នៅ​រសៀល ថ្ងៃទី​៥ ខែវិច្ឆិកា ថ្មីៗ​នេះ នៅ​ទីស្តីការក្រសួង ។​

​ក្នុងឱកាស​នោះ លោក Sardar Umar Alam តំណាង​អង្គការ UNESCO ប្រចាំ​កម្ពុជា បាន​បញ្ជាក់ថា ជំនួប​នា​ថ្ងៃនេះ គឺ​អង្គការ UNESCO មានបំណង​ពង្រឹង កិច្ចសហប្រតិបត្តិការ និង​ពិនិត្យមើល​តម្រូវការ​ចាំបាច់ របស់​កម្ពុជា សម្រាប់​ទិសដៅ នាពេលខាងមុខ​។ ជាមួយគ្នានេះ លោក​តំណាង​អង្គការ UNESCO ក៏បាន​ជម្រាបជូន ពី​ដំណើរការ​អនុវត្ត​ន៍ក​ម្ម​វិធី GO-SPIN (Global Observatory of Science,Tecnology and Innovation Policy Instruments) ដែល​អាច​និយាយបានថា ជា​កម្មវិធី​ការអង្កេត​សាកល នៃ​ឧបករណ៍​គោលនយោបាយ របស់​វិស័យ​វិទ្យាសាស្ត្រ បច្ចេកវិទ្យា និង​នវានុវត្តន៍ ដែលជា​យន្តការ នៃ​កម្មវិធី​មួយ សម្រាប់​ជួយ​លើកស្ទួយ បណ្តុះបណ្តាល និង​ចងក្រង​វិស័យ​វិទ្យាសាស្ត្រ នៅក្នុង​ប្រទេស​នីមួយៗ ដែល​ការងារ​នេះ បានធ្វើ​ជាច្រើន ប្រទេស​មកហើយ ដូចជា​ជាមួយ​ប្រទេស​ឡាវ និង អ៊ីស្រាអែល ជាដើម ។​

​ទន្ទឹមនឹងនេះ លោក​ទេសរដ្ឋមន្ត្រី ចម ប្រសិទ្ធ បានលើកឡើង​ថាៈ បច្ចុប្បន្ន វិស័យ​វិទ្យាសាស្ត្រ គឺជា​គន្លឹះ​ដ៏​សំខាន់ សម្រាប់​ការអភិវឌ្ឍ​ន៌​សេដ្ឋកិច្ច និង​សង្គម បែប​ឌីជីថល ហើយ​កំពុង​ស្ថិតក្នុង​បរិបទ នៃ​បដិវត្តន៍​ឧស្សាហកម្ម​ជំនាន់ ទី​៤.០ ។ ក្នុងនោះ​ការ​ចងក្រង​ស្នាដៃ ផ្នែក​វិទ្យាសាស្ត្រ ក៏​យើង​ត្រូវតែ​គិតគូរ ជា​ចាំបាច់​ផងដែរ ពីព្រោះ​ប្រទេស​កម្ពុជា ជា​ប្រទេស​សម្បូរ​ណ៍ ដោយ​សម្បត្តិ​វប្បធម៌ អរិយធម៌ និង​សម្បត្តិ​បេ​តិក​ភ័​ណ្ឌ​ដ៏​រុងរឿង ហើយ​ក៏មាន​ស្នាដៃ ផ្នែក​វិទ្យាសាស្ត្រ នៅ​ក្នុងនោះ​រួចជាស្រេច ។ ជាក់ស្តែង​ដូចជា ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ កំពុង​រៀបចំ​ចងក្រង​ឯកសារ ប្រព័ន្ធ​ឯក​តា​ខ្មែរ​ជាដើម​។​

​ក្នុងជំនួប​នេះ ភាគី​ទាំងពីរ បាន​ឯកភាពគ្នា ទៅលើ​ការចែករំលែក បទពិសោធ​ន៌ និង​ការផ្តល់​ទិន្នន័យ របាយការណ៍ ទាក់ទង​នឹង​ដំណើរការ​អនុវត្តន៍ កម្មវិធី GO-SPIN ដែល​បានធ្វើ​រួចហើយ ជាមួយ​ប្រទេស​ដទៃ ជាពិសេស​ជាមួយ​ប្រទេស​ឡាវ ដើម្បី​ជា​មូលដ្ឋាន សម្រាប់​កម្ពុជា យកមក​អនុវត្តន៍ និង​សរសេរ​ចេញ ជា​របាយ​ការ​ណ៌ ។ ជាមួយគ្នានេះ ជា​បន្តបន្ទាប់ គួរ​មាន​កិច្ចប្រជុំ ឬ សិក្ខាសាលា​ស្វែងយល់​កម្មវិធី GO-SPIN នេះ ឲ្យ​កាន់តែ​ស៊ីជម្រៅ ជាមួយ អ្នកវិទ្យាសាស្ត្រ​កម្ពុជា ដែល​ក្រសួង​កំពុង​គិតគូរ​ប្រមូលផ្តុំ ឲ្យ​ស្ថិតក្នុង​បញ្ជីសារពើភ័ណ្ឌ​មួយ សម្រាប់​ជា​ធនធាន ខួរក្បាល​របស់​ជាតិ ៕​/V

លោក​ទេសរដ្ឋមន្ត្រី ចម ប្រសិទ្ធ និងលោក Sardar Umar Alam ជួបពិភាក្សាគ្នា ដើម្បីពង្រឹងកិច្ចសហប្រតិបត្តិការ លើការងារឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍

ទីតាំងផ្សាយពាណិជ្ជកម្ម

- Advertisment -

Most Popular