Home ព័ត៌មានជាតិ សន្តិសុខ នគរបាល​នាយរង​...

នគរបាល​នាយរង​ប៉ុ​ស្កិ៍​បាញ់សម្លាប់​នាយ​ប៉ុ​ស្កិ៍​និង​នាយផ្នែក​ស៊ើបការណ៍​រួច​បាញ់​សម្លាប់​​ខ្លួនឯង​តាម​ក្រោយ​


​ដោយ​:​បាយ័ន-មុនីរ័ត្ន​/​ឧ​ត្ត​រ​មាន​ជ័​យៈ
សមត្ថកិច្ច​បាន​រាយការណ៍​ថា លោក​អនុសេនីយ៍ឯក​មួយរូប​ដែលមាន​តួនាទី​ជា​នាយរង​ប៉ុ​ស្កិ៍​នគរបាល​ការពារ​ព្រំដែន​គោក​ចុង​ព្រិច ចំណុះអោយ​នគរបាល​វរ​សេនា​តូច​ការពារ​ព្រំដែន​គោក​លេខ​៩០៥ ឈរជើង​នៅ​ស្រុក​អន្លង់វែង ខេត្ត​ឧ​ត្ត​រ​មានជ័យ បាន​យក​កាំភ្លើង​អាកា​ស្វ័យ​បត់​មួយ​ដើម ធ្វើ​សកម្មភាព​បាញ់សម្លាប់​លោក​វរសេនីយ៍ត្រី​ដែលជា​នាយ​ប៉ុ​ស្កិ៍​ចុង​ព្រិច​របស់ខ្លួន​និង​បន្ត​បាញ់សម្លាប់​លោក​អនុសេនីយ៍ឯក​នាយផ្នែក​ស៊ើបការណ៍ បន្ទាប់មក​ជនដៃដល់​ក៏បាន​បាញ់សម្លាប់​ខ្លួនឯង​តែម្តង​។​មានន័យថា​ក្នុង​ហេតុការណ៍​នោះ​មាន​អ្នកស្លាប់​នៅនឹងកន្លែង​ចំនួន​៣​នាក់ សុទ្ធតែជា​នគរបាល​ដូចគ្នា​។​

នគរបាល​ជាន់ខ្ពស់​មួយរូប​នៃ​ទីបញ្ជាការ​នគរបាលជាតិ​ប្រចាំ​ទិស​ភូមិភាគ​ទី​៤ ប្រចាំ​ទិស​ស្រុក​អន្លង់វែង បានអោយដឹង​នៅ​យប់​ថ្ងៃទី​០៦​ខែវិច្ឆិកា ឆ្នាំ​២០២០​នេះ​ថា ហេតុការណ៍​ខាងលើ​បានកើត​ឡើង​នៅ​អំឡុង​ចន្លោះ​ម៉ោង​១៤​និង​៣០​នាទី​ទៅ​ម៉ោង​១៥​រសៀល ថ្ងៃទី​០៦ ខែវិច្ឆិកា ឆ្នាំ​២០២០​នេះ ស្ថិតនៅ​ចំណុច​ភូមិ​ជើងភ្នំ ឃុំ​ត្រពាំង​ព្រៃ ស្រុក​អន្លង់វែង ខេត្ត​ឧ​ត្ត​រ​មានជ័យ​។​

​នគរបាល​ជាន់ខ្ពស់​រូបនោះ បាន​និយាយថា ជនដៃដល់​ខាងលើ​មានឈ្មោះ អ៊ុ ឈ​យ អាយុ​៤២​ឆ្នាំ មាន​ឋានន្តរ​ស​ក្កិ​អនុសេនីយ៍ឯក​និង​មាន​មុខងារ​ជា​នាយរង​ប៉ុ​ស្កិ៍​នគរបាល​ការពារ​ព្រំដែន​គោក​ចុង​ព្រិច ឈរជើង​នៅ​ចំណុច​ភូមិ​ជើងភ្នំ ឃុំ​ត្រពាំង​តាវ ស្រុក​អន្លង់វែង ខេត្ត​ឧ​ត្ត​រ​មានជ័យ​។​

នគរបាល​បានបញ្ជាក់​ទៀតថា មុនពេល​កើតហេតុ​ជនដៃដល់ អ៊ុ ឈ​យ បាន​ស្ពាយ​កា​តាប​និង​យក​កាំ​ភ្លើង​​អាកា​ស្វ័យ​បត់​មួយ​ដើម​ដោយ​អា​មេ​បញ្ចូល​គ្រាប់​ជាស្រេច​ក្នុង​គោលបំណង​អាក្រក់​ណាមួយ ដោយ​ចុះ​ពី​ប៉ុ​ស្កិ៍​ចុង​ព្រិច​ធ្វើដំណើរ​ដោយ​ថ្មើរជើង ហើយ​ខណៈនោះ​មាន​លោក​វរសេនីយ៍ត្រី ហ៊ុន ប៊ី ភេទ​ប្រុស អាយុ​៤៩​ឆ្នាំ មុខងារ​ជានា​យ​នាយ​ប៉ុ​ស្កិ៍​នគរបាល​ការពារ​ព្រំដែន​គោក​ចុង​ព្រិច និង​លោក​អនុសេនីយ៍ឯក ស្រេង រាសី អាយុ​៥១​ឆ្នាំ មុខងារ​ជា​នាយផ្នែក​ស៊ើបការណ៍​ចំណុះអោយ​វរ​សេនា​តូច​នគរបាល​ការពារ​ព្រំដែន​គោក​លេខ​៩០៥ ដើរ​តាម​ពីក្រោយ​សុំ​អង្វរ​យក​កាំភ្លើង​ពី​ដៃ​ជនដៃដល់​ឈ្មោះ អ៊ុ ឈ​យ ។​

​នៅពេល​មន្ត្រីនគរបាល​២​រូប​សុំ​អង្វរ​យ៉ាងណាក៏ដោយ ជន​នោះ​មិនអោយ​កាំភ្លើង​ទេ​លុះ​មកដល់​ចំណុច​កើតហេតុ​ខាងលើ ជនដៃដល់​ឈ្មោះ អ៊ុ ឈ​យ បានធ្វើ​សកម្មភាព​បាញ់​ទៅលើ​លោក​វរសេនីយ៍ត្រី ហ៊ុន ប៊ី ដែលជា​នាយ​ប៉ុ​ស្កិ៍​ចុង​ព្រិច​របស់ខ្លួន​ចំនួន​២​គ្រាប់ ធ្លាយ​ពោះ និង​បន្ត​បាញ់​មកលើ​លោក​អនុសេនីយ៍​ឯក ស្រេង រាសី ត្រូវ​១​គ្រាប់​ចំ​ក្រោម​ក្លៀក បណ្តាលអោយ​ជនរងគ្រោះ​ទាំង​២​ស្លាប់​ព្រម​គ្នា​នៅនឹងកន្លែង បន្ទាប់មក​ជនដៃដល់ អ៊ុ ឈ​យ បាន​បាញ់​ខ្លួនឯង​មួយគ្រា​ប់​ចំ​សៀតផ្កា​ធ្លាយ​ក្បាល​ក៏​ស្លាប់​បន្តទៀត​។​


គេ​បាន​រាយការណ៍​ទៀតថា ជនដៃដល់​ឈ្មោះ អ៊ុ ឈ​យ កន្លងមក​ធ្លាប់មាន​ជំងឺឆ្កួត​ហើយ​ធ្លាប់​មក​ព្យា​បាល​​រយៈពេល​៣​ឆ្នាំ​នៅ​ខេត្តសៀមរាប ហើយក៏​បាន​វិល​ទៅធ្វើ​ការ​នៅ​អង្គភាព​វិញ​។ មុនពេល​កើត​ហេតុ ជនដៃដល់​ត្រូវបាន​គេ​រាយការណ៍​ថា គាត់​ត្រូវបាន​ជំងឺ​ធ្វើទុក្ខ​ក្បាល​យ៉ាងខ្លាំង​ហើយ​អាច​បែក​ថ្នាំ​ផងដែរ ដែលជា​ដើមចម​ក្នុងករណី​បាញ់សម្លាប់​មន្ត្រីនគរបាល​២​នាក់ រួច​បាញ់​ខ្លួនឯង​បែបនេះ​។ ចំពោះ​ព័ត៌មាន​អ្វីដែល​លើសពីនោះ សមត្ថកិច្ច​មិនបាន​រាយការណ៍​បញ្ជាក់​បែបណា​នោះទេ ។​ដោយឡែក​សាកសព​ទាំង​៣​នាក់​ក៏​យកទៅ​ធ្វើបុណ្យ​តាម​ប្រពៃណី ក្រោយពី​ពិនិត្យ​និង​ធ្វើ​កោសល្យ​វិ​ច្ឆ័​យ​រួចហើយ​៕

ទីតាំងផ្សាយពាណិជ្ជកម្ម

- Advertisment -

Most Popular