ជក់បារីៈ ចំណាយលុយ និង​ពេលវេលា ថែមទាំង​បំផ្លាញ​សុខភាព​ទៀត​!

ដោយៈ ម៉េង​ឆៃ​/ ភ្នំពេញៈ ក្រសួងសុខាភិបាល និង​អង្គការ​សុខភាព​ពិភពលោក បាន​លើកឡើងថា ក្នុង​មួយឆ្នាំៗ ប្រជាជន​កម្ពុជា ប្រមាណ​ជា ១៥ ០០០ នាក់ បាន​ស្លាប់ និង​ខាតបង់​ថវិកា ៦៥៦ លាន​ដុល្លារ​អាម៉េរិក ដោយសារ​ការប្រើប្រាស់​ថ្នាំជក់​។

​ក្រុម​អ្នកជំនាញ​សុខភាព ក៏បាន​រកឃើញថា ការគ្រប់គ្រង​ផលិតផល​ថ្នាំជក់ បានច្បាស់លាស់ គឺជា​មធ្យោបាយ​ដ៏​មាន​ប្រសិទ្ធភាព​បំផុត ដើម្បី​កាត់បន្ថយ​គ្រោះថ្នាក់ និង​ការខាតបង់ ដោយសារ​ថ្នាំជក់​។ ប៉ុន្តែ បារី​ប្រមាណ​ជា ២៨ ភាគរយ ដែល​ដាក់លក់​លើ​ទីផ្សារ​ក្នុងប្រទេស​កម្ពុជា សព្វថ្ងៃ គឺជា​បារី គេចពន្ធ ដែល​ធ្វើឱ្យ​រដ្ឋាភិបាល​ខាត​ពន្ធ​ប្រមាណ​ជា ៧ ភាគរយ​។​

ជក់បារីៈ ចំណាយលុយ និង​ពេលវេលា ថែមទាំង​បំផ្លាញ​សុខភាព​ទៀត​!

​មន្ត្រី​ជំនាញ​សុខភាព​របស់​អង្គការ​សុខភាព​ពិភពលោក ប្រចាំ​កម្ពុជា បាន​ពន្យល់ថា បារី គេចពន្ធ គឺជា​បារី​ខុសច្បាប់ ហើយ​បារី​ខុសច្បាប់​គឺជា​ឧបសគ្គ​ដ៏​ធំ​មួយ​នៃ​កិច្ចការ​ត្រួតពិនិត្យ​ថ្នាំជក់​នៅ​កម្ពុជា​ព្រោះ​វា​មិន​ត្រឹមតែ​ធ្វើ​ឲ្យ​ខាតបង់​ចំណូល​ពន្ធ​រដ្ឋ​ប៉ុណ្ណោះ​ទេ ថែមទាំង​ធ្វើឱ្យ​ប្រជាពលរដ្ឋ ប្រឈម​នឹង​ជំងឺ ដែល​បង្កឡើង​ដោយ​ថ្នាំជក់​កាន់តែច្រើន ដោយសារតែ​ការប្រើប្រាស់​ថ្នាំជក់​កើនឡើង​។

​ក្នុង​កិច្ចប្រជុំ​កាលពី​ថ្ងៃទី​៦ ខែវិច្ឆិកា អង្គការ​ចលនា​ដើម្បី​សុខភាព​កម្ពុជា CMH បាន​លើក​បង្ហាញថា ក្រៅពី​បារី មិនបាន​បង់ពន្ធ ដែល​តាំង​លក់​ព្រោងព្រាត​លើ​ទីផ្សារ នៅ​កម្ពុជា ក៏​ជា​ប្រទេស ដែល​យកពន្ធ​ថ្នាំជក់​ទាប​បំផុត ក្នុងចំណោម​ប្រទេស​អាស៊ាន​។ ចំណុច​នេះ អាច​ជំរុញ​ឲ្យ​មាន​មហន្តរាយ​សុខភាព និង​សេដ្ឋកិច្ច​ដ៏​ធ្ងន់ធ្ងរ​។​

​ជាការ​ពិត ក្នុងសង្គម​កម្ពុជា ដឹង​ហើយ លឺ​ហើយ ថា ការជក់បារី នាំ​ឲ្យ​ខូចសុខភាព កើត​ជំងឺមហារីក រហូតដល់​ស្លាប់​ថែមទៀត​។ ប៉ុន្តែ​ពលរដ្ឋ​ខ្មែរ​មួយចំនួន ក្នុងនោះ ក៏មាន​យុវជន​ខ្លះ​ដែរ នៅតែ​ជក់បារី​។ ជក់បារី ក្រៅតែពី​កើតរោគ ក៏​នៅ​អស់​លុយ ដែល​គេ​ប្រៀប​ដូច យកលុយ​ដុតចោល​។ ពេលវេលា​នៃ​ការ​ឈរ អង្គុយ​ជក់បារី ក៏ត្រូវ​ខាតបង់​ថែម​ទៀតផង​។​

​យ៉ាងណាក៏ដោយ ក្នុង​មួយរយៈ​ចុងក្រោយ​នេះ ចំនួន​អ្នក​ជក់បារី ក៏បាន​ថយចុះ​នៅក្នុង​សង្គម​កម្ពុជា ស្របពេល​ដែលមាន​ច្បាប់​ត្រួតពិនិត្យ​ថ្នាំជក់ ដែល​បានកំណត់​តំបន់​គ្មាន​ផ្សែង​បារី នៅតាម​ទីសាធារណៈ ក៏ដូចជា នៅ​កន្លែង​ឯកជន តាម​ភោជនីយដ្ឋាន និង​សណ្ឋាគារ ជាដើម​។​

​ក្រៅពីនេះ តាម​ហាង​បាយ និង​ហាង​កាហ្វេ​ជាច្រើន ពិសេស​នៅ​ភ្នំពេញ ក៏បាន​បិទ​ស្លាក ហាម​ជក់បារី ផងដែរ​។ ការជក់បារី នៅ​ទីកន្លែង​ហាមឃាត់​ទាំងនេះ ត្រូវបាន​រាជរដ្ឋាភិបាល ចេញ​អនុក្រឹត្យ កាលពី​ឆ្នាំ​២០១៦ ដោយ​កំណត់​ផាកពិន័យ ចន្លោះ​ពី ២០.០០០ រៀល ដល់ ៥០.០០០ រៀល​។ ក៏ប៉ុន្តែ​ការអនុវត្ត​វិធានការ​ផាកពិន័យ​នេះ ហាក់ដូចជា ពុំ​សូវ​មាន​ប្រសិទ្ធភាព​ប៉ុន្មាន​ឡើយ​។​

​ច្បាស់​ណាស់​ថា ការជក់បារី ធ្វើ​ឲ្យ​អ្នក​ជក់​ឡើង​ស្លេះ ស្ងួត​បំពង់ក និង​ឆាប់​ហត់ ជាដើម ព្រោះ​ផ្សែង​បារី ធ្វើ​ឲ្យ​ខូច​សួត​។ នេះ​គ្រាន់តែ​ជា​ជំងឺ​ស្រាលៗ ដែល​អ្នក​ជក់បារី​គ្រប់រូប បាន​ជួបប្រទះ​។ ម្យ៉ាងទៀត រោគសញ្ញា​ជំងឺ បណ្តាលមកពី​ផ្សែង​បារី ក៏ត្រូវ​បាន​គេ​សរសេរ និង​ដាក់​ទាំង​រូបថត​ច្បាស់ៗ​ថែមទៀត នៅលើ​កញ្ចប់​បារី​។ ប៉ុន្តែ​អ្នក​ជក់បារី ហាក់ដូចជា មិន​ខ្លាចញញើត​ទាល់តែសោះ​។​

​ដូច្នេះ មានតែ​បុគ្គល​អ្នក​ជក់បារី​ផ្ទាល់​តែប៉ុណ្ណោះ ដែល​គួរតែ​ភ្ញាក់ខ្លួន​ថា «​ការជក់បារី ក្រៅពី​អស់​លុយ ខាត​ពេល​ហើយ សំខាន់​ជាងគេ គឺ​បារី​បំផ្លាញ​សុខភាព មិន​ត្រឹមតែ​ខ្លួនឯង​អ្នក​ជក់​ទេ តែ​អ្នក​នៅ​ជុំវិញខ្លួន ក៏​រង​ផលប៉ះពាល់​ពី​ផ្សែង​បារី​នេះដែរ​»​។ សូមកុំ​ចាំ​ដល់​ធ្លាក់ខ្លួន​ឈឺ ដោយសារតែ​ជក់បារី ទើប​ដឹងខ្លួន​! យើង​គួរតែ​ការពារ ប្រសើរ​ជាង​ព្យាបាល​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular

អភិបាលរងខេត្តកំពង់ឆ្នាំងដ...

ដោយ:ទេពកង្រី/កំពង់ឆ្នាំងៈ...

អាវុធហត្ថឃាត់ខ្លួនបុរសម្ន...

ដោយ:ទេពកង្រី/កំពង់ឆ្នាំងៈ...

អ្នកនាំពាក្យ​ក្រសួងសុខាភិ...

ដោយ: មុនីរ័ត្ន / ភ្នំពេញ:...

នាយកដ្ឋាន​ព័ត៌មានវិទ្យា រ...

​ដោយៈ មុនី​រ័ត្ន / ភ្នំពេ...