ក្រៅពី​សកម្មភាព​ដើរ​រើស​សំរាម សូម​អាជ្ញាធរ រៀបចំ​ធុងសំរាម និង​ឡាន​ដឹក​សំរាម​ឲ្យ​ទៀងពេល​ផង​!

ដោយ​: ម៉េង​ឆៃ / ភ្នំពេញ​: កាលពី​ព្រឹក​ថ្ងៃទី​៧ ខែវិច្ឆិកា ឆ្នាំ​២០២០ រដ្ឋបាល​ខណ្ឌទួលគោក ក្នុង​រាជធានី​ភ្នំពេញ បាន​ប្រារព្ធ​ពិធី បរិស្ថាន​ស្អាត​។ ពិធី​ជួបជុំ និង​ដើរ​រើស​សំរាម​នេះ ដឹកនាំ​ដោយ លោក ឯក ឃុន​ឌឿ​ន អភិបាលខណ្ឌ​ទួលគោក រួមទាំង​មន្ត្រី​ពាក់ព័ន្ធ​ចម្រុះ​ជាច្រើនរូប និង​ប្អូនៗ​យុវជន​។​

​លោក​អភិបាលខណ្ឌ ឯក ឃុន​ឌឿ​ន បាន​ថ្លែងអំណរគុណ​ដល់​ពុក​ម៉ែ​បងប្អូន ដែល​ទុកដាក់​សំរាម បាន​ត្រឹមត្រូវ ដើម្បី​កាត់បន្ថយ​ការកកស្ទះ ក្នុងការ​បង្ហូរ​ទឹកភ្លៀង ចូលក្នុង​ប្រព័ន្ធ​លូ​។​

​លោក​អភិបាលខណ្ឌ ក៏បាន​បន្ត​អំពាវនាវ សូម​បងប្អូន​ប្រជាពលរដ្ឋ មេត្តាជួយ​វេច​ខ្ចប់ និង​ទុកដាក់​សំរាម ឱ្យបាន​ត្រឹមត្រូវ ព្រមទាំង​រួមគ្នា​ការពារ និង​ទប់ស្កាត់​ការចម្លង វីរុស កូ​វីដ​១៩ តាម​ការណែនាំ​របស់​ក្រសួងសុខាភិបាល​ទាំងអស់គ្នា​។​

​ជាការ​ពិត បញ្ហា​សំរាម នៅតែ​ជា​បញ្ហា​ប្រឈម ដែល​មិនទាន់​ដោះស្រាយបាន​ទាំងស្រុង​នៅឡើយ​ទេ នៅ​រាជធានី​ភ្នំពេញ ក៏ដូចជា នៅតាម​ទីប្រជុំជន និង​នៅ​ទីជនបទ ទូទាំងប្រទេស​។​

​ការ​ទុកដាក់​សំរាម និង​វេច​ខ្ចប់​សំរាម ឲ្យ​បាន​ត្រឹមត្រូវ គឺ​ត្រូវបាន​ប្រជាពលរដ្ឋ​ភាគច្រើន ពិសេស​អ្នករស់នៅ​ភ្នំពេញ បានធ្វើ​រួចមកហើយ​។ ក៏ប៉ុន្តែ​កន្លងមក បន្ទាប់ពី​កម្មករ​ក្រុមហ៊ុន​ប្រមូល​សំរាម​ស៊ីន​ទ្រី បាន​ចូលធ្វើការ​វិញ កាលពី​ចុងខែ​តុលា បន្ត​ដល់ពេលនេះ នៅ​តំបន់​មួយចំនួន បញ្ហា​សំរាម នៅតែ​មិនទាន់​ដោះស្រាយបាន​។ នោះ​គឺ​ការយឺតយ៉ាវ​របស់​កម្ម​ករ​ស៊ីន​ទ្រី មិន​ទៅ​ប្រមូល ដឹកជញ្ជូន​សំរាម ដែល​ប្រជាពលរដ្ឋ ដាក់​គរ​នៅមុខ​ផ្ទះ​នៅតាម​ផ្លូវ​ក្នុងភូមិ រហូតដល់ ១​អាទិត្យ បង្ក​ឲ្យ​រាយប៉ាយ​ផង និង​ជះក្លិន​មិនល្អ​ផង​។​

​មួយ​ចំណុច​ទៀត ធុងសំរាម នៅតាម​ទីសាធារណៈ​មួយចំនួន នៅ​មិនទាន់​ត្រូវបាន​ដាក់ពង្រាយ​ឲ្យ​បាន​ច្រើន​នៅឡើយ​ទេ​។ ចំណែក​កន្លែង​ដែលមាន​ធុងសំរាម​ហើយ តែ​ការប្រមូល​ដឹកជញ្ជូន​សំរាម​យឺត នាំ​ឲ្យ​អ្នក​បោះចោល​សំរាម ក្រៅ​ធុង ព្រោះតែ​ក្នុង​ធុង​ជ័រ ពោរពេញ​ដោយ​សំរាម ហើយ​ខែ​នេះ ធ្លាក់​ខ្យល់​ទៀត ក៏​បក់​ប៉ើង​ថង់​ប្លា​ស្ទីក ប្រអប់​ជ័រ ពាសវាល​ពាសកាល ក៏មាន​។
​សំរាម​ពេញ​ធុង​នេះ ច្រើន​កើតឡើង​នៅតាម​សួនច្បារ​មុខ​វត្ត​បទុម និង​នៅតាម​មាត់ទន្លេ ក្នុង​រាជធានី​ភ្នំពេញ ដែលជា​កន្លែង​ដើរ​កម្សាន្ត និង​ប្រជាពលរដ្ឋ​ហាត់ប្រាណ​។​

​ក្នុងសង្គម​យើង ក៏​នៅតែ​កើតមាន​អ្នកយក​សំរាម ទៅ​បោះចោល​នៅតាម​របង​សាលារៀន ដី​ទំនេរ របង​ផ្ទះ​អ្នកដទៃ ជាដើម​។ ក្រុម​អ្នក​ចង់តែ​ស្អាត​ផ្ទះ​ខ្លួនឯង​នេះ គួរតែ​គិត​បន្តិច​ថា ខ្លួន​ចង់​ស្អាត ធ្វើ​ម៉េច​ឲ្យ​តែ​សំរាម លែងមាន​នៅផ្ទះ​របស់ខ្លួន ចុះចិត្ត​អ្នកដទៃ ចិត្ត​ម្ចាស់ផ្ទះ ម្ចាស់​ដី គេ​យល់​យ៉ាងណា​? បើ​ខ្លួន​យក​សំរាម​ទៅ​បោះចោល ក្លាយជា​គំនរ​សំរាម​អា​សោច ពិសេស​តាម​របង​វត្ត និង​របង​សាលារៀន​ដូច្នេះ​?

​ក្រុម​អ្នក​និយម​យក​សំរាម​ទៅ​បោះចោល​ឲ្យ​ផុតៗ​ពី​ផ្ទះ គួរ​គិតថា ទោះបីជា​អ្នក​ខំ​ដឹកជញ្ជូន​សំរាម កាកសំណល់​ទៅ​បោះចោល​យ៉ាងណាក៏ដោយ តែ​លុយ​ថ្លៃ​សំរាម​ប្រចាំខែ អ្នក​នៅតែ​ត្រូវ​បង់​ដដែល​ទេ​។ ដូច្នេះ​គួរតែ​រក​កន្លែង​សមគួរ​ណាមួយ នៅក្នុង​របង​ផ្ទះ ឬក៏​ក្រៅរបង​ផ្ទះ ដើម្បី​ទុកដាក់​សំរាម ដែល​បាន​វេច​ខ្ចប់​ត្រឹមត្រូវ ដើម្បី​ឲ្យ​ក្រុមហ៊ុន​ស៊ីន​ទ្រី ប្រមូល​សំរាម​ទាំងនោះ ប្រសើរ​ជាជាង ខំ​ដឹក ខំ​អូស ទាំងយប់ យក​សំរាម ទៅ​ផ្លុ​ង​ចោល​នៅ​របង​ផ្ទះ នៅ​ដី​ទំនេរ ឬក៏​នៅតាម​របង​សាលារៀន របង​វត្ត​នោះ​។​

​ដូច្នេះ បន្ថែម​លើ​សកម្មភាព​ជួបជុំ ដើរ​រើស​សំរាម ដែលជា​សកម្មភាព​អប់រំ បំផុសស្មារតី​យុវជន និង​ប្រជាពលរដ្ឋ​ហើយ​នោះ ដើម្បី​ដោះស្រាយ​បញ្ហា​សំរាម ពិសេស​នៅ​ភ្នំពេញ អាជ្ញាធរ​សមត្ថកិច្ច គួរតែ​កំណត់​វេន​ក្រុម​អ្នកប្រមូល​សំរាម​តាមផ្លូវ​ក្នុងភូមិ​នានា បើ​មិនបាន​រាល់ថ្ងៃ​ទេ យ៉ាងហោចណាស់ សូម​តែ ១​អាទិត្យ ២​ដង ព្រមទាំង​រៀបចំ​ធុងសំរាម និង​កន្លែង​ស្តុក​សំរាម​ត្រឹមត្រូវ នោះ​បញ្ហា​សំរាម អាចមាន​សណ្តាប់ធ្នាប់ ល្អប្រសើរ​។

​រីឯ​អ្នក​ចូលចិត្ត​យក​សំរាម​បោះចោល​ឲ្យ​ផុតៗ​ពី​ផ្ទះ​ខ្លួនឯង ក៏មាន​អាជ្ញាធរ​សមត្ថកិច្ច មានច្បាប់​ហើយ គួរតែ​ចាប់ផ្តើម​អនុវត្ត​ផាកពិន័យ​លើ​អ្នក​ទាំងនោះ​ឡើងវិញ ហើយ​ចាប់​ថត​បង្ហោះ​ហ្វេ​ស​ប៊ុ​ក នោះ​ក៏​នឹងធ្វើ​ឲ្យ​អ្នក​និយម​បោះចោល​សំរាម​ផ្តេសផ្តាស់ រាងចាល​ដែរ​៕ ​/srn

ទីតាំងផ្សាយពាណិជ្ជកម្ម

- Advertisment -

Most Popular

ការរៀបចំបីដំណាក់កាល​សម្រា...

ភ្នំពេញៈ ក្រសួងសុខាភិបាល​...

មន្រ្តីចូលនិវត្តន៍នៃក្រសួ...

យើងខ្ញុំ​ទាំងអស់គ្នា ចាប់...

អាជ្ញាធរ​និង​មន្ត្រី​ជំនា...

​ដោយ​: ទេ​ពក​ង្រី / ខេត្ត...

អ្នកភូមិ​ប្រទះឃើញ​ហ្វូង​ដ...

ដោយ​៖​ដេប៉ូ / មណ្ឌលគិរី​៖...