Home ព័ត៌មានជាតិ សេដ្ឋកិច្ច ពលរដ្ឋ​ស្រុក​...

ពលរដ្ឋ​ស្រុក​កងមាស ត្អូញត្អែរ​ពី​តម្លៃ ផ្លែស្វាយ​កែវ​រមៀត ធ្លាក់​ចុះថ្លៃ រាល់ថ្ងៃ​

ដោយៈ គង់​ហេង / កំពង់ចាមៈ ប្រជាពលរដ្ឋ ជា​អ្នក​ប្រក​បរបរ ដាំ​ស្វាយកែវ​រមៀត នៅ​ស្រុក​កងមាស បាន​ត្អូញត្អែរ ពី​តម្លៃ​ផ្លែ ស្វាយកែវ​រមៀត បាន​ធ្លាក់​ថ្លៃ ស្ទើរ​រាល់ថ្ងៃ​ពោល គឺ​ធ្លាក់ចុះ​ប្រមាណ ៧០ ភាគរយ នៃ​ទិន្នផល​សរុប​ប្រមាណ ២០០ តោន ក្នុង​មួយថ្ងៃ ទៅកាន់​ប្រទេស​វៀតណាម និង​ប្រទេស​ថៃ បើ​ប្រៀបធៀប រយៈពេល​ដូចគ្នា កាលពី​ឆ្នាំ ២០១៩ នោះ​។​

​ជាមួយ​នោះ តាមរយៈ​កាសែត​រស្មី​កម្ពុជា កសិករ ជា​អ្នក​ប្រក​បរបរ ដាំ​ដំណាំ​កសិកម្ម មួយ​ប្រភេទ​នេះ បាន​សំណូមពរ ដល់​អាជ្ញាធរ ជា​សមត្ថកិច្ច ជំនាញ​ទាំងអស់ មេត្តាជួយ​ស្តារ​ទីផ្សារ ឱ្យ​តម្លៃ​បាន​ប្រសើរ​ឡើងវិញ ពិសេស​កសិករ ជា​អ្នក​ជួល​ដើម​ស្វាយ ដើម្បី​យកមក​ថែរក្សា ឱ្យចេញ​ផ្កា​ផ្លែ កំពុងតែ​ខ្វាយខ្វល់ ក្នុងការ​ចំណាយ​ថវិកា អស់​ច្រើន ទិញ​ជី និង​ថ្នាំ មានតម្លៃ​ថ្លៃ គឺ​ទទួល​ទិន្នផល​ទាប និង​លក់បាន​តម្លៃថោក​ទៀត​។​

​ប៉ុន្តែ​ជុំ​បញ្ហា​ប្រឈម ខាងលើ មន្ត្រី​នៃ​មន្ទីរ​ពាណិជ្ជកម្ម និង​កសិកម្ម ខេត្តកំពង់ចាម បានស្នើ​ឱ្យ​កសិករ ជា​អ្នក​ដាំ​ដំណាំ​ស្វាយ មាន​ផ្ទៃដី​សរុប​ជិត ៤.០០០ ហិកតា ចូលរួម​សហការគ្នា ចងក្រង​បង្កើតជា​សមាគម គឺ​ប្រយោជន៍ ដើម្បី​ងាយស្រួល ទទួលបាន​ព័ត៌មាន​តម្លៃ​ទីផ្សារ ពិតប្រាកដ​ប្រចាំថ្ងៃ ហើយ​បញ្ហា​តម្លៃ​ផ្លៃ​ស្វាយ ចុះ គឺ​បញ្ហា​សកល​ជំងឺ​កូ​វីដ​.១៩​។ ចំណែក​បញ្ហា​តម្លៃ​ជី និង​ថ្នាំ ប្រើប្រាស់ ក្នុងការ​ធ្វើឱ្យ​ទទួលបាន ទិន្នផល​ផ្លែស្វាយ​ខ្ពស់ កាត់បន្ថយ​ការចំណាយ​ថវិកា​ច្រើន និង​មិន​ផ្សងព្រេង​នោះ គឺ​សូមឱ្យ​កសិករ ម្ចាស់​ចម្ការ​ស្វាយ​ទាំងអស់ ដាក់ពាក្យ​ចូលរួម វគ្គ​បណ្តុះបណ្តាល មកកាន់​មន្ទីរ​កសិកម្ម រុក្ខាប្រមាញ់ និង​នេសាទ​។​

​ស្ត្រី​វ័យ ៦០ ឆ្នាំ ឈ្មោះ វ៉ុ​ន ហ៊ាន់ និង​កូនប្រុស ដែល​កំពុង​រង់ចាំ​ម្ចាស់​ស្តង់ ប្រមូល​ទិញ​ផ្លែស្វាយ នៅ​ឃុំ​អង្គរ​បាន ស្រុក​កងមាស បាន​និយាយ ទាំង​ទឹកមុខ​ស្រពោន នាពេល​ថ្មីៗ​នេះ​ថាៈ ឆ្នាំ​២០២០​នេះ គឺ​ផ្លែ​ស្វាយកែវ​រមៀត ធ្លាក់ចុះ​ទាំង​តម្លៃ និង​ទិន្នផល គឺ​គ្រួសារ​អ្នកស្រី មាន​ចម្ការ​ស្វាយ ចំនួន ៣០០ ដើម មាន​អាយុ ប្រាំបី ឆ្នាំ លក់បាន​ប្រាក់​សរុប ចំនួន ប្រាំមួយ​លាន រៀល ថយចុះ ជាង​កាលពី​ឆ្នាំ​២០១៩ ចំនួន​ពីរលាន​រៀល ដោយ​មួយ​គីឡូក្រាម ផ្លែស្វាយ​លក់បាន​តម្លៃ ចំនួន ៤០០ រៀល ខណៈ​កាលពី​ឆ្នាំ​២០១៩ មួយ​គីឡូក្រាម ពី ៩០០ ទៅ ១.២០០ រៀល​។​

​អ្នកស្រី វ៉ុ​ន ហ៊ាន់ បាន​បន្តថាៈ រីឯ​ផល​ផ្លែស្វាយ ចេញពី​ចំនួន ៣០០ ដើម ស្មើគ្នា​ឆ្នាំនេះ បានតែ​ទម្ងន់ បួន​តោន គឺ​ទាប​ជាង កាលពី​ឆ្នាំមុន ២០១៩ ចំនួន ៥០ ភាគរយ​។ ដោយ​ស្ថិតក្នុង​ស្ថានភាព អាក្រក់​បែបនេះ គ្រួសារ​អ្នកស្រី បាន​ពិភាក្សាគ្នា ទំនងជា​ផ្អាក ផលិត​ផ្លែស្វាយ ជា​បណ្តោះអាសន្ន​។ ប៉ុន្តែ​អ្នកស្រី បាន​សំណូមពរ ឱ្យ​អាជ្ញាធរ ជួយ​រក​ទីផ្សារ និង​សុំឱ្យ​មន្ត្រី​ជំនាញ ជួយ​បណ្តុះបណ្តាល ពី​បច្ចេកទេស ធ្វើ​ឱ្យចេញ​ផ្កា​ផ្លែ មួយឆ្នាំ បី ដង ទទួលបាន​ទិន្នផល​ខ្ពស់​។​

​ចំណែក​ស្ត្រី​ម្នាក់ទៀត ឈ្មោះ ពឹង វណ្ណៈ ដែល​ជួល​ចម្ការ​ស្វាយ ចំនួន​ប្រាំ​មួយកន្លែង ចំនួន ១.០០០ ដើម នៅក្នុង​ឃុំ​អង្គរ​បានដែរ កំពុង​យក​ផ្លែស្វាយ មក​លក់ បាន​និយាយថាៈ អ្នកស្រី និង​ប្តី បាន​ប្រកបមុខរបរ ជួល​ដើម​ស្វាយ យកមក​ថែបំប៉ន ឱ្យចេញ​ផ្កា​ផ្លែ​នេះ ចំនួន បី ឆ្នាំ​ហើយ ដោយ​ក្នុង​មួយឆ្នាំ ចំណាយ​លើ​ការជួល​ដើម ប្រមាណ មួយ​ម៉ឺន ដុល្លារ​អាមេរិក និង​ចំណាយ​លើ​ជី និង​ថ្នាំ សម្រាប់​ការថែបំប៉ន ប្រមាណ ២០ លាន​រៀល ស្មើនឹង ៥.០០០ ដុល្លារ​បន្ថែមទៀត​។​

​ស្ត្រី​វ័យ ៣៩ ឆ្នាំ រូបនេះ បានឱ្យដឹង​ទៀតថាៈ មុខរបរ​នេះ រយៈពេល ពីរ ឆ្នាំ​ដំបូង បាន​ចំណេញ អាច​ទប់ទល់​បាន​។ ប៉ុន្តែ​ឆ្នាំ​២០២០ ដោយ​វិបត្តិ​ជំងឺ​កូ​វីដ​.១៩ និង​បញ្ហា​អាកាសធាតុ ភ្លៀង​ធ្លាក់​ជោកជាំ នា​ចុងរដូវ​នេះ បណ្តាល តម្លៃ​ផ្លែ​ស្វាយកែវ​រមៀត ប្រឈម​បញ្ហា​តម្លៃ ធ្លាក់ចុះ​ខ្លាំង និង​ទិន្នផល​ថយចុះ បង្ខំ​ឱ្យប្រើ​ជី និង​ថ្នាំ​ច្រើន ។​

​បុរស​ឈ្មោះ ង៉ ធៀ​ម ជា​អ្នកប្រមូល​ទិញ ផ្លែស្វាយ​ធំជាងគេ នៅ​ស្រុក​កងមាស បាន​ប្រាប់​នៅ​ថ្ងៃទី​៧ វិច្ឆិកា​ថាៈ តម្លៃ​ផ្លែស្វាយ នៅថ្ងៃនេះ ធ្លាក់ចុះ​ជាង ថ្ងៃទី ៦ វិច្ឆិកា ៥០ រៀល បន្ថែមទៀត ក្នុង​មួយ​គីឡូក្រាម គឺ​លេខ​១ ផ្លែ​ស្អាត​ល្អ តម្លៃ ៧៥០ រៀល និង​លេខ​២ ផ្លែ​មាន​ស្នាម​ប្រឡាក់ តម្លៃ ៣៥០ រៀល​។ ប៉ុន្តែ​តម្លៃ​នេះ បាន​ធ្លាក់ចុះ​ប្រហែល ៧០ ភាគរយ បើ​ប្រៀបធៀប កាលពី​ឆ្នាំមុន ២០១៩​។ ការធ្លាក់ចុះ​តម្លៃ គឺ​បណ្តាលមកពី បញ្ហា​ជំងឺ​កូ​វីដ​.១៩ ជា​បញ្ហា​សកល​តែម្តង​។​

​បុរស​អាយុ ៤២ ឆ្នាំ​រូបនេះ បាន​បន្តថាៈ តម្លៃ​ផ្លែស្វាយ យើង​ទទួលបាន​ព័ត៌មាន ពី​តំបន់​ព្រំដែន ប្រទេស​វៀតណាម និង​ប្រទេស​ថៃ​។ ផ្លែស្វាយ​កែវ​រមៀត ដែល​នាំ​ចេញពី ស្រុក​កងមាស ប្រមាណ ២០០ តោន ក្នុង​មួយថ្ងៃ គឺ​ក្នុងនោះ សម្រាប់​ស្តង់​របស់លោក ស្ថិត​ក្នុងភូមិ​អង្គ​របា​នទី​៣ ឃុំ​អង្គរ​បាន ប្រហែល ៥០ តោន ហើយ​នាំទៅ​លក់ នៅ​ប្រទេស​វៀតណាម ប្រមាណ ៨០ ភាគរយ និង​ប្រទេស​ថៃ ប្រហែល ២០ ភាគរយ​។​

​លោក ឈាង បូ​រិ​ន ប្រធាន​មន្ទីរ​ពាណិជ្ជកម្ម ខេត្តកំពង់ចាម បានឱ្យដឹង​នៅ​ថ្ងៃទី ៧ វិច្ឆិកា​ថាៈ បញ្ហា​ចម្បង បណ្តាលឱ្យ​ទីផ្សារ ស្វាយកែវ​រមៀត ធ្លាក់​ថ្លៃ គឺ​វិប្បត្តិ​ជំងឺ​កូ​វីដ​.១៩ ដោយ​យើង​មិនអាច​នាំ ផលិតផល​មួយ​នេះ ឆ្លង​ក្រៅប្រទេស បាន​ស្រួល ដូច​កាលពី​មិនទាន់ មាន​ជ្ទុះ​ជំងឺ​នេះ​។ ម្យ៉ាងទៀត ដោយ​ការ​ផល​ជោរជន់​ខ្លាំងពេក ដែល​កត្តា​នេះ ទាមទារ​ឱ្យ​ដំណាំ​ស្វាយ បង្កើតជា​សមាគម អាជីវកម្ម​ស្វាយ​។​

​លោក​ប្រធាន​មន្ទីរ បាន​បន្តថាៈ ករណី​យើង​បង្កើត​សមាគម អាជីវកម្ម​ស្វាយបាន​ហើយ គឺ​យើង​ចាប់ផ្តើម​បង្កើត ផែន​ការដាំដុះ និង​ប្រមូល​ផល ពិសេស​សមាជិកសមាគម ងាយ​នឹង​ទទួលបាន​ព័ត៌មាន ពី​តម្លៃ​ស្វាយ​ប្រចាំថ្ងៃ​។​

​លោក កាតំ​ម សូ​ណាវ​ណ្ណ អនុប្រធាន​មន្ទីរ​កសិកម្ម រុក្ខាប្រមាញ់ និង​នេសាទ ខេត្តកំពង់ចាម បានឱ្យដឹង​នៅ​ថ្ងៃទី ៨ វិច្ឆិកា​ថាៈ យើង​កំពុង​គាំទ្រ​លើ ផលិតកម្ម​ដំណាំ ស្វាយកែវ​រមៀត និង​ដំណើរការ​ទីផ្សារ លើ​ដំណាំ​កសិកម្ម​មួយ​នេះ ដល់​សហគមន៍ កសិកម្ម​ពន្លក​ថ្មី ដែលមាន​ទីតាំង ស្ថិតនៅ​ភូមិ​ដំណាក់​ជ្រៃ ឃុំ​ពាមជីកង ស្រុក​កងមាស​។​

​លោក​បាន​បន្តថាៈ ក្នុងការ​គាំទ្រ​នេះ យើង​បាន​អនុវត្ត គម្រោង​ខ្សែ​ច្រ​វ៉ា​ក់​ផលិតកម្ម ដោយ​ភាត​រៈ​បរិស្ថាន ដែលជា​គម្រោង បាន​ជួយ​បង្កើន​ផលិតភាព នៃ​ដំណាំ​ស្វាយកែវ​រមៀត​។ ជាការ​ធ្វើឱ្យ​ប្រសើរឡើង នូវ​សមត្ថភាព សម្រាប់​ស្តុក​ផលិតផល និង​ដំណើរការ​ធ្វើ់តេស្ត​គុណភាព សុវត្ថិភាព និង​លើកកម្ពស់ ការប្រើប្រាស់​ថាមពល ពន្លឺព្រះអាទិត្យ និង​ថាមពល កកើត​ឡើងវិញ តាមរយៈ​ការសាងសង់ ឡ​ជីវឧស្ម័ន ដល់​អ្នកទទួលផល ក្នុង​ខេត្តកំពង់ចាម​។​

​សូមបញ្ជាក់ថា ដំណាំ​ស្វាយ​ហូប​ផ្លែ គិត​ត្រឹម​ចុងខែ​មីនា ឆ្នាំ​២០២០ របស់​មន្ទីរ​កសិកម្ម​ខេត្ត​នេះ មាន​ផ្ទៃដី​ដាំ​ដុះ សរុប​ចំនួន ៣.៩៤០ ហិកតា ក្នុងនោះ ផ្ទៃដី​កំពុង​ប្រមូល​ផល ជា​មធ្យម ១៩,៦០ តោន ក្នុង​មួយ​ហិកតា នៃ​ផ្ទៃ​សរុប​ចំនួន ៣.២០០ ហិកតា គឺ​ស្រុក​កងមាស មាន​ផ្ទៃដី​ដំណាំ​ស្វាយ ច្រើនជាងគេ ប្រមាណ​ជាង ១.០០០ ហិកតា និង​ក្រុង​កំពង់ចាម មាន​តិចជាងគេ ចំនួន ប្រាំបួន ហិកតា​៕/V

ទីតាំងផ្សាយពាណិជ្ជកម្ម

- Advertisment -

Most Popular

អភិបាលរងខេត្តកំពង់ឆ្នាំងដ...

ដោយ:ទេពកង្រី/កំពង់ឆ្នាំងៈ...

អាវុធហត្ថឃាត់ខ្លួនបុរសម្ន...

ដោយ:ទេពកង្រី/កំពង់ឆ្នាំងៈ...

អ្នកនាំពាក្យ​ក្រសួងសុខាភិ...

ដោយ: មុនីរ័ត្ន / ភ្នំពេញ:...

នាយកដ្ឋាន​ព័ត៌មានវិទ្យា រ...

​ដោយៈ មុនី​រ័ត្ន / ភ្នំពេ...