ដំណឹង​ល្អ​អំពី​វ៉ាក់សាំង​កូវី​ដ​១៩៖ វ៉ាក់សាំង​របស់​Pfizer​មាន​ប្រសិទ្ធភាព​លើ​៩០​ភាគរយ​

​ប្រែ​សម្រួលៈ​វាសនា​/​ឡុង​ដ៍​៖ ​ការ​ទម្លុះទម្លាយ​ភាព​ទាល់ច្រក​មួយ​ត្រូវបាន​ប្រកាស​ឡើង​ពាក់ព័ន្ធ​នឹង​ការសិក្សា​ស្រាវជ្រាវ​បង្កើត​វ៉ាក់សាំង​ប្រឆាំង​ជំងឺ​កូវី​ដ​១៩ ឬ​វីរុស​កូរ៉ូណា​ នៅ​ពេល​ក្រុមហ៊ុន​ឱសថ​Pfizer​បាន​រកឃើញថា វ៉ាក់សាំង​កំពុង​ពិសោធន៍​របស់​ខ្លួន​មាន​ប្រសិទ្ធភាព​លើ​៩០​ភាគរយ​។​

​ក្រុមហ៊ុន​ឱសថ​នេះ​និង​ដៃគូ​របស់​វា​BioNTech បាន​និយាយថា លទ្ធផល​បណ្តោះអាសន្ន​បានបង្ហាញ​ថា ការចាក់​វ៉ាក់សាំង​របស់​ខ្លួន​អាច​រារាំង​មិន​អោយ​មនុស្ស​កើតកូ​វីដ​១៩​បាន​។​

​វេជ្ជបណ្ឌិត អាល់​ប៊ឺត បោឡា ប្រធាន​Pfizer បាន​និយាយថា «​ថ្ងៃនេះ​ជា​ថ្ងៃ​អស្ចារ្យ​មួយ​សំរាប់​វិទ្យាសាស្ត្រ​និង​មនុស្សជាតិ​»​។​

​ចំណែក​លោក ផេ​ធឺ ហ័រ​ប៊ី សាស្ត្រាចារ្យ​ខាង​ជំងឺឆ្លង​និង​សុខភាព​សកល​នៅ​សកល​វិទ្យាល័យ​អុក​ស្វត បាន​និយាយថា «​ព័ត៌មាន​នេះ​ធ្វើអោយ​ខ្ញុំ​ញញឹម​ដល់​ត្រចៀក​តែ​​ម្តង​»​នៅ​ពេល​លោក​សាស្ត្រាចារ្យ គ្រីស វ៉ា​យ​ធី មន្ត្រី​វេជ្ជសាស្ត្រ​អង់គ្លេស បាន​និយាយថា ការរកឃើញ​នេះ​បង្ហាញ​«​អំណាច​វិទ្យាសាស្ត្រ​ប្រឆាំង​នឹង​កូវី​ដ​។​យើង​ត្រូវ​ពិនិ​​ត្យ​មើល​ទិន្នន័យ​សុវត្ថិភាព​និង​ប្រសិទ្ធភាព​ចុងក្រោយ​របស់​វា​បន្ថែម តែ​ដំណឹង​នេះ​គួរ​អោយ​លើកទឹកចិត្ត​ណាស់​»​។​

​វ៉ាក់សាំង​នេះ​ត្រូវបាន​ពិសោធន៍​លើ​មនុស្ស​៤៣.៥០០​នាក់​នៅ​៦​ប្រទេស និង​មិន​បាន​បង្ហាញ​ផល​អវិជ្ជមាន​លើ​សុខភាព​អ្នកស្ម័គ្រចិត្ត​ពិសោធន៍​ទេ​។​

ទន្ទឹមគ្នានេះ Pfizer និង​BioNTech​មាន​ផែនការ​ដាក់​ពាក្យសុំ​ការអនុម័ត​ផលិត​និង​ប្រើ​វ៉ាក់សាំង​របស់​ខ្លួន​នៅ​ចុង​ខែ​នេះ​ទៅកាន់​រដ្ឋបាល​ស្បៀង​និងឱ​សថ​អាម៉េរិក​។​

នៅលើ​ពិភពលោក​​សព្វថ្ងៃ មាន​វ៉ាក់សាំង​កូវី​ដ​១៩​ប្រមាណ​១២​ដែល​កំពុង​ត្រូវបាន​ពិសោធន៍​នៅ​ដំណាក់កាល​ចុងក្រោយ តែ​វ៉ាក់សាំង​របស់​Pfizer​ជា​វ៉ាក់សាំង​ដំបូង​គេ​ដែល​រាយការណ៍​អំពី​​លទ្ធផល​៕

Pfizer និង BioNTech រំពឹងថា​នឹង​ផលិត​វ៉ាក់សាំង​៥០​លាន​ដូ​ស​នៅ​ឆ្នាំ​២០២០ និង​១,៣​ពាន់​លាន​ដូ​ស​នៅ​ឆ្នាំ​២០២១

ទីតាំងផ្សាយពាណិជ្ជកម្ម

- Advertisment -

Most Popular