Home ព័ត៌មានជាតិ សង្គម ត្រជាក់​ចុះ​ដ...

ត្រជាក់​ចុះ​ដល់​១៨​អង្សា​សេ​ជាមួយនឹង​ផ្ទៃមេឃ​គ្មាន​ពន្លឺ​ថ្ងៃ​លើ​ខេត្តមណ្ឌលគិរី​

​ដោយៈ​ប​.​ខុន​/​ភ្នំពេញៈភ្លៀង​ដោយសារ​ឥទ្ធិពល​ព្យុះ​ទី​២១ កំពុង​ធ្លាក់​រាយប៉ាយ​នៅលើ​តំបន់​ខ្ពង់រាប​ភាគ​ឦសាន​នៃ​ប្រទេស​កម្ពុជា​ជាមួយនឹង​ខ្យល់​បក់​តិចៗ អាកាសធាតុ ចុះ​ត្រជាក់​ដល់​រង្វង់​កម្រិត ១៨​អង្សា​សេ និង ផ្ទៃមេឃ​ងងឹត​គ្មាន​ពន្លឺ​ថ្ងៃ នៅលើ​ខេត្ត​មណ្ឌល​គី​រី​។​

​លោក​ខែម ភារ​ម្យ ប្រធាន​មន្ទីរ​ធនធានទឹក និង ឧតុនិយម​ខេត្តមណ្ឌលគិរី បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​១០​ខែវិច្ឆិកា​ឆ្នាំ​២០២០​ថា ភ្លៀងរលឹម​បាន​ចាប់ ផ្តើម​ធ្លាក់​មកលើ​ខេត្តមណ្ឌលគិរី តាំងពី​ម៉ោង​៣​ទាបភ្លឺ​ថ្ងៃនេះ​(១០​វិច្ឆិកា​) រហូតមក ដល់ពេលនេះ​(​ម៉ោង​៨​ព្រឹក​)​មេឃងងឹត​គ្មាន​ពន្លឺ​ថ្ងៃ​ភ្លៀង​នៅតែ​បន្ត​ធ្លាក់​ជាមួយនិង​ខ្យល់​បក់​តិចៗ ធាតុអាកាស​ត្រជាក់​បាន​ចុះ​ដល់​រង្វង់​កម្រិត​១៨​អង្សា​សេ​កាលពីពេល​ព្រឹក​។​

​ប្រធាន​មន្ទីរ​ខាងលើ​និយាយ​ឱ្យដឹងទៀតថា កាលពី​ថ្ងៃទី​៩​ខែវិច្ឆិកា​សី​តុ​ណ្ហ ភាព​ពេលព្រឹក​នៅក្នុងរ​ង្វ​ង់​១៩​អង្សា​សេ​។ នៅពេលនេះ​ភ្លៀងរលឹម​កម្រិត​ច្រើន​បាន​កំពុង​បន្ត​ធ្លាក់​ជាមួយ​ផ្ទៃ​មេឃងងឹត​ដោយសារ​ឥទ្ធិពល​ព្យុះ​។​

​លោក​ម៉ៅ ប៊ុនធឿន​ប្រធាន​មន្ទីរ​ធនធានទឹក​និង​ឧតុនិយម​ខេត្តរតនគិរី​បាន ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​១០ ខែវិច្ឆិកា​ថា ភ្លៀង​ផ្សែង​ក្រូច​បានចាប់ផ្តើម​រោយ តាំងពី​យប់​មកដល់​ព្រឹក​មាន​កម្រិត​២​មី​លី​ម៉ែត្រ​ហើយ​នៅតែ​បន្ត​ធ្លាក់​មកទៀត​ជាមួយនឹង​អាកាសធាតុ​ត្រជាក់​ចុះ​ដល់​រង្វង់​១៩​អង្សា​សេ ដែល​កាលពី​ថ្ងៃ​ម្សិលមិញ​មាន​កម្រិត​ត្រឹម​២២​អង្សា​សេ​។ ផ្ទៃមេឃ​គ្មាន​ពន្លឺ​ថ្ងៃ​និង​គ្មាន​ខ្យល់​។​

​ក្រសួង​ធនធានទឹក​និង​ឧតុនិយម កាលពី​ថ្ងៃទី​៨ ខែវិច្ឆិកា ឆ្នាំ​២០២០ បាន​ប្រ កាស​ព័ត៌មាន​ថា​នៅ​ថ្ងៃទី​៨ ខែវិច្ឆិកា ឆ្នាំ​២០២០​នេះ​វិ​សម្ពាធ (Tropical Depression) បាន និង​កំពុង​ស្ថិតនៅក្នុង​សមុទ្រ​ចិន​ខាងត្បូង​នឹងធ្វើ​ដំណើរ​ឆ្ពោះ មក​ទិសបស្ចឹម ដោយ​បង្កើន​ឥទ្ធិពល​របស់ខ្លួន​ទៅជា​កូន​ព្យុះ​ទី​២១​ឈ្មោះ​អ៊ី​តូ​(ETAU) នៅ​ថ្ងៃទី​១០ ខែវិច្ឆិកា​ឆ្នាំ​២០២០ ។

​តាម​ការ​ព្យាករ​ព្យុះ​នេះ នឹង​ថមថយ​ឥទ្ធិពល​ទៅជា​វិ​សម្ពាធ (Tropical Depression) ពេល​ចូលដល់​លើ​ឆ្នេរ​ភាគ ខាងត្បូង​ប្រទេស​វៀតណាម នៅ​ថ្ងៃទី​១០ ខែវិច្ឆិកា ឆ្នាំ​២០២០ ហើយ​បន្ទាប់មក​ទៅ ជា​សម្ពាធ​ទាប (Low Pressure) ពេល​ចូល​មកដល់​លើ​ភាគ​ខាងកើត ប្រទេស​កម្ពុជា នៅ​ថ្ងៃទី​១១ ខែវិច្ឆិកា ឆ្នាំ​២០២០​។ លក្ខណៈ​បែបនេះ​នឹងធ្វើ​ឲ្យ​អាកាសធាតុ​នៅ​ព្រះរាជា​ណា ចក្រ​កម្ពុជា​ចាប់ពី​យប់​ថ្ងៃទី​១០ ដល់​ថ្ងៃទី​១២ ខែវិច្ឆិកា ឆ្នាំ​២០២០​​​ មាន​ស្ថានភាព​ដូចជា​នៅ​រាជធានី​ភ្នំពេញ​និង​ខេត្ត​នៅ​តំបន់ ខ្ពង់រាប ភាគ​ឦសាន ខេត្ត​ភាគ​ខាងកើត​ជាប់​ព្រំដែន​ប្រទេស​វៀតណាម និង​ខេត្ត​ភាគខាងត្បូង នឹង​អាចមាន​ភ្លៀងខ្យល់​ក្នុង​កម្រិត​ពី​បង្គួរ​ទៅ​ច្រើន​។ ខេត្ត​នៅ​តំបន់​មាត់សមុទ្រ​នឹង​អាចមាន​ភ្លៀងខ្យល់​ក្នុង​កម្រិត​ពី​តិច​ទៅ​បង្គួរ​និង​រលក​សមុទ្រ​មាន​កម្ពស់​មធ្យម​៕​

ទីតាំងផ្សាយពាណិជ្ជកម្ម

- Advertisment -

Most Popular