ដោយៈ តាកែវ / តាកែវៈ នៅព្រឹកថ្ងៃទី ១០ ខែវិច្ឆិកា ឆ្នាំ២០២០ នេះ កម្មការិនីសិប្បកម្មកាត់ដេរ នៅក្នុងក្រុងដូនកែវ មួយកន្លែង នាំគ្នាមកតវ៉ា នៅមុខមន្ទីរការងារ ដោយស្នើសុំឱ្យជួយពួកគាត់ លើករណីបាត់ម៉ូតូ ដែលចតផ្ញើ នៅក្នុងសិប្បកម្ម ពេលចូលធ្វើការ តែម្ចាស់ជាជនជាតិចិន មិនព្រមទទួលខុសត្រូវឡើយ លើករណីបាត់ម៉ូតូនេះ។
ក្រុមអ្នកតវ៉ា បានបញ្ជាក់ថា ការនាំគ្នាមកតវ៉ា ពីក្រុមកម្មការិនីទាំងនោះ នៅមន្ទីរការងារខេត្តតាកែវនេះ គឺពួកគាត់ មានគោលបំណង ចង់ឱ្យខាងមន្ទីរការងារ ចូលរួមជួយដល់ពួកគាត់ លើការដោះស្រាយ ជាមួយនឹងម្ចាស់សិប្បកម្ម ជាជនជាតិចិន ដែលមិនព្រមទទួលខុសត្រូវ លើករណីបាត់ម៉ូតូ របស់កម្មការិនី ដែលចតនៅកន្លែងផ្ញើ ដែលមានសន្តិសុខយាមកាម របស់ម្ចាស់សិប្បកម្ម កាលពីថ្ងៃទី៥ ខែវិច្ឆិកា ឆ្នាំ២០២០ ឋិតនៅចំណុចបេនកំពង់ទូកក្រោម ភូមិស្នោ សង្កាត់រកាក្នុង ក្រុងដូនកែវ ខេត្តតាកែវ។
ចំពោះបញ្ហាកម្មការិនីសិប្បកម្មនេះ មកធ្វើការតវ៉ាលើករណីបាត់ម៉ូតូ ក្នុងសិប្បកម្ម ពេលកំពុងចូលធ្វើការងារ សុំឲមន្ទីរការងារជួយនោះ លោក ម៉ឺង វីរីយ៉ា ប្រធានមន្ទីរការងារ បានប្រាប់តាមទូរស័ព្ទ នៅព្រឹកថ្ងៃទី ១០ វិច្ឆិកានេះថាៈ លោកនៅមិនទាន់ដឹងជុំវិញ បញ្ហានោះនៅឡើយទេ ហើយលោក នឹងឱ្យមន្ត្រីជំនាញរបស់លោក ធ្វើការសួរនាំពីដើមហេតុ នៃរឿងទាំងនេះ ។ ក្នុងនោះដែរ លោកបានបញ្ជាក់ថា ក្នុងច្បាប់ការងារ គឺមិនទាន់មានចែងថា ត្រូវឱ្យម្ចាស់សិប្បកម្ម ឬរោងចក្រ ត្រូវទទួលខុសត្រូវ លើករណីបាត់របស់របរ ឬមធ្យោបាយ ប្រើប្រាស់របស់កម្មករ និយោជិត នៅក្នុងពេលធ្វើការនោះទេ។
បើតាមសម្តីរបស់ម្ចាស់ម៉ូតូ ដែលបាត់ គឺកម្មការិនីឈ្មោះ សួរ វណ្ណតុល អាយុ២៧ឆ្នាំ រស់នៅភូមិធ្នង់ សង្កាត់រកាក្រៅ ក្រុងដូនកែវ បាននិយាយរៀបរាប់ថាៈ ម៉ូតូដែលបាត់នោះ ម៉ាកហុងដា ឌ្រីម ពណ៌ខ្មៅ សេរីឆ្នាំ២០២០ ជាម៉ូតូទិញបង់រំលោះ មិនទាន់ដាច់ផង។ នាងបានទិញ ដើម្បីជាមធ្យោបាយ មកធ្វើការងារ នៅសិប្បកម្មគ្មានឈ្មោះ មួយកន្លែង ឋិតនៅភូមិឃុំកើតហេតុខាងលើ លុះដល់ពេលចេញពី ធ្វើការងារ សម្រាកបាយថ្ងៃត្រង់ ស្រាប់តែម៉ូតូរបស់នាង បានបាត់ នៅសល់តែមួកសុវត្ថិភាព នៅក្នុងកន្លែងផ្ញើ របស់សិប្បកម្ម ។ នាង និងក្រុមកម្មការិនីផ្សេងទៀត បានទៅដាក់ពាក្យបណ្តឹង នៅអធិការដ្ឋានក្រុងដូនកែវ រួចរាល់ មកទល់ប៉ុន្មានថ្ងៃនេះ រកមិនឃើញនោះទេ ទើបពួកគាត់ នាំគ្នាស្នើសុំឱ្យខាងមន្ទីរការងារ ជួយដោះស្រាយ ជាមួយម្ចាស់សិប្បកម្ម ដេរសម្លៀកបំពាក់ ដែលគ្រប់គ្រងដោយ ជនជាតិចិននោះ ជួយទទួលខុសត្រូវ លើករណីបាត់ម៉ូតូ នៅក្នុងកន្លែងធ្វើការងារ ៕/V
