Home ព័ត៌មានជាតិ សង្គម សូម​គោរព​ឲ្យ​...

សូម​គោរព​ឲ្យ​បាន​ខ្ជាប់ខ្ជួន​នូវ​ការធ្វើ​ច​ត្តា​ឡី​ស័ក​និង​វិធានការ​របស់​ក្រសួងសុខាភិបាល​!

ដោយ​:​ម៉េង​ឆៃ​
កាលពី​យប់​ថ្ងៃទី​៩ ខែវិច្ឆិកា សម្តេច​អគ្គមហាសេនាបតី​តេ​ជោ​ហ៊ុនសែន​នាយក​រដ្ឋ​ម​ន្រី្ត​នៃ​ព្រះរាជាណាចក្រ​កម្ពុជា បាន​ផ្ញើ​សារ​ពិសេស​បន្ទាន់​ជា​សំឡេង ដោយ​សម្តេច​បាន​អំពាវនាវ​ឲ្យ​មានការ​ប្រុងប្រយ័ត្ន​ខ្ពស់ ទាក់ទង​នឹង​កូ​វីដ​១៩ និង​មិនត្រូវ​ភ័យ​ស្លន់ស្លោ​ទេ តែ​ក៏​ត្រូវគោរព​ឲ្យ​បាន​តាម​វិធានការ​របស់​ក្រសួងសុខាភិបាល​។​

​ក្នុង​សារ​ជា​សំឡេង ដែល​ត្រូវបាន​ផ្សព្វផ្សាយ​ដល់​បណ្តាញសារព័ត៌មាន សម្ដេច​តេ​ជោ​នាយករដ្ឋមន្ត្រី បាន​មានប្រសាសន៍ថា ព្រឹត្តិការណ៍​ថ្ងៃ​៣​វិច្ឆិកា​បាន​បង្ក​ឲ្យ​មាន​ស្ថានភាព​រំជើបរំជួល​នៅក្នុង​ទីក្រុង​ភ្នំពេញ​និង​ខេត្តកណ្ដាល​ហើយ​ទៅដល់​ខេត្តពោធិ៍សាត់​។ ខេត្ត​បន្ទាប់​ទៅ​ខេត្ត​ព្រះសីហនុ ខេត្តតាកែវ ខេត្តកំពត និង​ខេត្ត​កែប​។ ដោយឡែក ភាព​ធ្ងន់ធ្ងរ​នៅក្នុង​ទីក្រុង​ភ្នំពេញ ហើយ​អាចមាន​ផ្នែក​ខ្លះ នៅ​ខេត្តកណ្ដាល ជាទី​កន្លែង​តំបន់​អង្គរក្ស​រស់នៅ ជាដើម គឺ​នៅក្នុង​ដែនដី​ខេត្តកណ្ដាល បាន​បង្ក​នូវ​ការភ័យខ្លាច សម្រាប់​ប្រជាជន ក្នុង​ទីក្រុង​ភ្នំពេញ និង​នៅក្នុង​ខេត្តកណ្ដាល​។​
​សម្ដេច​តេ​ជោ ហ៊ុន សែន បាន​មានប្រសាសន៍ថា កាលពី​ថ្ងៃ​ទី​៩​វិច្ឆិកា បន្ទាប់ពី​ការធ្វើ​តេស្ត​លើក​ទី​២ គឺ​បានឃើញ​វិជ្ជមាន​ចំនួន បីនាក់ នៅក្នុង​នោះ មន្ត្រីជាន់ខ្ពស់​កម្ពុជា ចំនួន ២​នាក់ បូក​ជាមួយនឹង​អគ្គរដ្ឋទូត​ហុង​គ្រី​ម្នាក់ទៀត ហើយ​បើ​រាប់ទាំង​អង្គរក្ស​ការពារ​រដ្ឋមន្ត្រីការបរទេស​ហុង​គ្រី ចំនួន​អ្នក​ឆ្លង​វីរុស​កូ​វីដ​១៩ បាន​ឡើង​ទៅដល់ ៤​នាក់​ហើយ​។​

​ចំពោះមុខ​នេះ រាជរដ្ឋាភិបាល តាមរយៈ​ក្រសួង​អប់រំ បានសម្រេច​បិទ​ស្តា​ត​អូឡាំពិក បិទ​សាលារៀន​ទាំង​រដ្ឋ និង​ឯកជន នៅ​រាជធានី​ភ្នំពេញ និង​នៅ​ខេត្តកណ្ដាល ជា​បណ្ដោះអាសន្ន ក្នុង​រយៈពេល ២​សប្តាហ៍ គិត​ចាប់ពី​ថ្ងៃទី​៨​វិច្ឆិកា​។ KTV ក្លិប​កម្សាន្ត និង​សារមន្ទីរ ក៏ត្រូវ​បានប្រកាស​បិទ​ជា​បណ្តោះអាសន្ន​ផងដែរ​។​
​ក្នុង​សារ​ដដែលសម្ដេច​តេ​ជោ ក៏បាន​​អំពាវនាវ​ដល់​ប្រជាពលរដ្ឋ កុំ​មានការ​ភ័យ​ស្លន់ស្លោ ចំពោះមុខ​សភាពការណ៍​នេះ ព្រោះ​យើង​អាច​គ្រប់គ្រង​បាន​។​តែ​សម្តេច​មាន​កង្វល់​ពិតប្រាកដ​ទាក់ទង​ទៅនឹង​ការធ្វើ​ច​ត្តា​ឡី​ស័ក​ហើយ​សុំ​អំពាវនាវ​សាជាថ្មី​ម្ដងទៀត ចំពោះ​មន្ត្រី អ្នក​ជាប់​ពាក់ព័ន្ធ​ទាំងអស់ សូម​ធ្វើ​ច​ត្តា​ឡី​ស័ក ឲ្យ​បាន​ត្រឹមត្រូវ​បំផុត មិន​ថា ខ្លួន​ផ្ទាល់​នោះទេ សូម្បីតែ​ប្រពន្ធ​កូន​យើង​។​

​សម្តេច​តេ​ជោស្នើ​ដោយ​ទទូច ចំពោះ​អ្នកពាក់ព័ន្ធ​ដោយផ្ទាល់ រួមទាំង​ប្រពន្ធ​កូន និង​ក្រុមគ្រួសារ នៅក្នុង​ផ្ទះ ត្រូវធ្វើ​ច​ត្តា​ឡី​ស័ក ឲ្យ​បាន​ត្រឹមត្រូវ ព្រោះនេះ ជា​បញ្ហាសំខាន់ យើង​មិនត្រូវ​នាំខ្លួន​យើង​ចម្លង​មេរោគ​ឱ្យ​អ្នកដទៃ ឲ្យ​ទៅ​សង្គម​នោះទេ​។ ចង់​បញ្ចប់​ព្រឹត្តិការណ៍ ៣ វិច្ឆិកា ឲ្យ​បាន​ឆាប់ ជម្រើស​តែមួយគត់​របស់​យើង គឺ​ការធ្វើ​ច​ត្តា​ឡី​ស័ក ឲ្យ​បាន​ត្រឹមត្រូវ បើ​មិន​ដូច្នេះ​ទេ​យើង​អាច​ដើរទៅ​ចម្លង​នៅ​ខាងក្រៅ អ្វីដែល​គ្រោះថ្នាក់​ជាងនេះទៅទៀត ការបាត់​អ្នក​ខាងក្រៅ រឿង​ចម្លង​ទីកន្លែង​ផ្សេងៗ គឺជា​ការចម្លង​ចូល​សហគមន៍ ដោយ​គ្មាន​ដាន​ទាល់តែសោះ នោះ​ហើយ​គឺជា​មហន្តរាយ​វា​នឹង​កើត​រីក​មិន​ត្រឹមតែ​ទីក្រុង​ភ្នំពេញ​នោះទេ អាច​រីក​រាលដាល​ទៅដល់​ទូទាំងប្រទេស​ទៀតផង ។​

​ជាមួយគ្នានេះ សម្ដេច​តេ​ជោ ហ៊ុន សែន ក៏បាន​ចេញ​បញ្ជា​ឲ្យ​គ្រប់​ទីកន្លែង​ទាំងអស់ ដែលមាន​អ្នកធ្វើ​ច​ត្តា​ឡី​ស័ក ត្រូវធ្វើ​ច​ត្តា​ឡី​ស័ក ឲ្យ​បាន​ត្រឹមត្រូវ​បំផុត នៅតាម​ផ្ទះ និង​នៅ​កន្លែង​ធ្វើ​ច​ត្តា​ឡី​ស័ក ដែល​អាជ្ញាធរ​សមត្ថកិច្ច រៀបចំ​ឲ្យ​។ ក្នុងនោះ អាជ្ញាធរ​មូលដ្ឋាន ត្រូវតែ​រៀបចំ​ពិនិត្យ​តាមដាន​ឱ្យបាន​ច្បាស់លាស់​។ ប្រសិនបើ​គេ​មិន​ធ្វើបាន​ត្រឹមត្រូវ សុំ​ប្រញាប់ប្រញាល់​អញ្ជើញ​ពួកគាត់ ទៅកាន់​ទីកន្លែង​ធ្វើ​ច​ត្តា​ឡី​ស័ក ដែល​រៀបចំឡើង​ដោយ​ផ្នែក​សុខាភិបាល​។​

​សម្តេច​តេ​ជោ តែងតែ​រម្លឹក​ហើយ​រម្លឹក​ទៀត ពី​ជោគជ័យ​របស់​កម្ពុជា​យើង​ក្នុង​រយៈពេល​ជាង ១០​ខែ​កន្លងមក ដែល​ការពារ​បាន​នូវ​ការឆ្លង​ជំងឺ​កូ​វីដ​១៩ មិនឲ្យរាលដាល​ចូល​សហគមន៍ គឺ​ដោយសារតែ​ការធ្វើ​ច​ត្តា​ឡី​ស័ក​ដ៏​ត្រឹមត្រូវ​។​

​យ៉ាងណាក៏ដោយ ពាក់ព័ន្ធ​ព្រឹត្តិការណ៍​ថ្ងៃ​៣​វិច្ឆិកា អ្នកពាក់ព័ន្ធ​ដោយផ្ទាល់ និង​ដោយ​ប្រយោល​មួយចំនួន ក្នុងនោះ និយាយ​ឲ្យ​ចំ​លើ​ក្រុមគ្រួសារ​មន្ត្រីជាន់ខ្ពស់ ក៏ដូចជា​អ្នកកាសែត​ផ្ទាល់​តែម្តង​។ គឺ​អ្នក​មួយចំនួន​នោះ មិនបាន​ធ្វើ​ច​ត្តា​ឡី​ស័ក នៅតាម​ផ្ទះ​ឲ្យ​បាន​ត្រឹមត្រូវ​ឡើយ​។​

​ក្រោយ​ទៅយក​ព័ត៌មាន និង​ចូលរួម​កម្មវិធី​ជាមួយ​រដ្ឋមន្ត្រីការបរទេស និង​ពាណិជ្ជកម្ម​ហុង​គ្រី នៅ​ថ្ងៃទី​៣​វិច្ឆិកា គឺ​នៅ​យប់​ថ្ងៃទី​៣​វិច្ឆិកា និង​បន្ត​ដល់​ព្រឹក​ថ្ងៃទី​៤​វិច្ឆិកា ទាំង​មន្ត្រីជាន់ខ្ពស់ និង​ទាំង​អ្នកកាសែត បាន​ទៅ​ឡូ​កលំ​ជាមួយ​ក្រុមគ្រួសារ និង​ក្រុមការងារ ហើយ​មាន​រដ្ឋមន្ត្រី និង​មន្ត្រីជាន់ខ្ពស់​ខ្លះ ចុះ​មូលដ្ឋាន ដល់​ខេត្តព្រៃវែង និង​ខេត្តពោធិ៍សាត់ ជាដើម​។​

​នៅពេល​ដឹងថា រដ្ឋមន្ត្រីការបរទេស និង​ពាណិជ្ជកម្ម ហុង​គ្រី កើត​ជំងឺ​កូ​វីដ​១៩ នៅ​រសៀល​ថ្ងៃទី​៤​វិច្ឆិកា ក៏​នៅតែមាន​ក្រុមគ្រួសារ មន្ត្រីជាន់ខ្ពស់ និង​អ្នកកាសែត​មួយចំនួន នៅតែ​មិនបាន​ធ្វើ​ច​ត្តា​ឡី​ស័ក​តាម​ផ្ទះ​ឲ្យ​បាន​ត្រឹមត្រូវ តាម​វិធាន​សុខាភិបាល​នោះឡើយ​។ អ្នកធ្វើ​ច​ត្តា​ឡី​ស័ក​ជំពូក​នោះ ដល់​ថ្នាក់​ដឹកនាំកក្រសួង ក៏​នៅ​ដើរ​ហាត់ប្រាណ​ នៅតាម​ផ្លូវ​សាធារណៈ ដូច​អត់​មានរឿង​អី​កើតឡើង។ ចំណែក​អ្នក​នៅផ្ទះ​ជួល បន្ទប់​តែឯង បានចេញ​ក្រៅ​ផ្ទះ ដើម្បី​ទិញ​បាយទឹក​។ រីឯ​អ្នក​ខ្លះទៀត ក៏​នៅ​ឡូ​កលំ​ជាមួយ​ប្រពន្ធ​កូន និង​ក្រុមគ្រួសារ ដោយ​សំអាងថា ខ្លួន​មិន​អី មិនកើត​អី​ទេ ជាដើម​។​

​ដោយ​សង្កេតឃើញ​ការអនុវត្ត​មិន​ត្រឹមត្រូវ​ដូច្នេះ ទើប​សម្តេច​តេ​ជោ ហ៊ុន សែន បាន​ណែនាំ​ឲ្យ​ក្រសួង​សុខាភិបាល និង​អាជ្ញាធរ​រាជធានី​ភ្នំពេញ រៀបចំ​បើក​សណ្ឋាគារ រ៉េស៊ីដង់ សុខា ភ្នំពេញ នៅ​ជ្រោយចង្វារ ទល់មុខ​ព្រះបរមរាជវាំង ដើម្បី​ឲ្យ​អ្នក​ដែល​មិនមាន​លទ្ធភាព​ធ្វើ​ច​ត្តា​ឡី​ស័ក ដោយ​ខ្លួនឯង នៅផ្ទះ​ឲ្យ​បាន​ត្រឹមត្រូវ ទៅ​ស្នាក់នៅ ក្នុងអំឡុង​ពេលធ្វើ​ច​ត្តា​ឡី​ស័ក​នេះ​។​

​ក៏ប៉ុន្តែ​អ្វីដែល​គួរ​ឲ្យ​សោកស្តាយ​នោះ បន្ទប់​សណ្ឋាគារ​លំដាប់​ផ្កាយ ៥ ចំនួន ៤០០ បន្ទប់ ដែល​ត្រៀម​បម្រុង​សម្រាប់​អ្នកធ្វើ​ច​ត្តា​ឡី​ស័ក ដោយ​មិន​គិតថ្លៃ មាន​ទាំង​អាហារ ៣​ពេល និង​ការមើល​ថែទាំ​យ៉ាង​ត្រឹមត្រូវ បែរជា​មាន​អ្នក​ទៅធ្វើ​ច​ត្តា​ឡី​ស័ក តែ​ជាង ១០​នាក់​ប៉ុណ្ណោះ ខណៈដែល​អ្នក​ដែល​ពាក់ព័ន្ធ​នឹង​ព្រឹត្តិការណ៍​ថ្ងៃ​៣​វិច្ឆិកា ត្រូវបាន​ក្រសួងសុខាភិបាល ប្រកាសថា មាន​ចំនួន​ដល់​ទៅ ១១៦៦​នាក់ ដែល​បាន​ទៅធ្វើ​តេស្ត​លើក​ទី​១ និង​លើក​ទី​២​។​

​ដូច្នេះ​ដើម្បី​អនុវត្តតាម​អនុសាសន៍​របស់​សម្តេច​តេ​ជោ ហ៊ុន សែន ផង និង​ដើម្បី​ចូលរួម​ការការពារ​កា​រ​ចម្លង​វីរុស​កូ​វីដ​១៩ ទៅ​សហគមន៍​ផង គួរតែ​អ្នកធ្វើ​ច​ត្តា​ឡី​ស័ក​ទាំងអស់ បើ​ធ្វើ​ច​ត្តា​ឡី​ស័ក នៅតាម​ផ្ទះ​រៀងៗ​ខ្លួន ត្រូវតែ​អនុវត្ត​ឲ្យ​បាន​ត្រឹមត្រូវ តាម​ការណែនាំ​របស់​ក្រសួងសុខាភិបាល ដោយ​ដាក់ខ្លួន​ឲ្យ​នៅ​ដាច់ដោយឡែក ក្នុង​រយៈពេល ១៤​ថ្ងៃ ហើយ​ធ្វើតេស្ត​តាម​ការកំណត់​របស់​ក្រសួងសុខាភិបាល​។

​ការធ្វើ​តេស្ត​នេះ​ទៀតសោត ក៏​ក្រសួងសុខាភិបាល គួរតែ​គិត​ឡើងវិញ ព្រោះថា អ្នកធ្វើ​ច​ត្តា​ឡី​ស័ក នៅផ្ទះ ដល់ពេល​ធ្វើតេស្ត ត្រូវ​ឲ្យ​ពួកគាត់​ធ្វើដំណើរ​ពី​ផ្ទះ ទៅធ្វើ​តេស្ត នៅ​ទីស្តីការគណៈរដ្ឋមន្ត្រី​។ សំណួរ​សួរថា ពី​ផ្ទះ ទៅ​កន្លែង​ធ្វើតេស្ត តើ​អ្នកធ្វើ​ច​ត្តា​ឡី​ស័ក ត្រូវធ្វើ​ដំណើរ ឆ្លងកាត់​អ្វីខ្លះ​? ប៉ះពាល់​នឹង​អ្នកដំណើរ​យ៉ាងណាខ្លះ​? នេះ​ជា​ចំណុច​គួរ​គិតគូរ​ឡើងវិញ​។​

​បើ​យក​ល្អ គួរតែ​ប្រមូល​ក្រុម​អ្នកធ្វើ​ច​ត្តា​ឡី​ស័ក​ទាំងអស់ ទៅ​កន្លែង​មួយ ឬក៏​នៅ​សណ្ឋាគារ ដែល​ក្រសួងសុខាភិបាល រាជរដ្ឋាភិបាល​រៀបចំ ហើយ​ពេទ្យ ចុះទៅពិនិត្យ​ធ្វើតេស្ត នៅ​ទីនោះ​តែម្តង​។ ចំពោះ​អ្នកធំៗ ដែល​ធ្វើ​ច​ត្តា​ឡី​ស័ក តាម​ផ្ទះ ក៏​គួរតែ​ចាត់​ពេទ្យ ឲ្យ​ទៅធ្វើ​តេស្ត​ដល់ផ្ទះ ដូច​ករណី​សម្តេច​តេ​ជោ និង​រដ្ឋមន្ត្រី​មួយចំនួន​។ កងកម្លាំង​មាន​សមត្ថកិច្ច ក៏​ត្រូវតែ​ដាក់ពង្រាយ​ប្រចាំការ យាមកាម​ជាប់​ជានិច្ច នៅ​កន្លែង​ធ្វើ​ច​ត្តា​ឡី​ស័ក ដើម្បី​ឲ្យ​ប្រាកដថា មិនមាន​អ្នកចេញ​ក្រៅ​មណ្ឌល​ច​ត្តា​ឡី​ស័ក​។​តែបើ​នៅតាម​ផ្ទះ​ប្រហែលជា​ពិបាក​ក្នុងការ​គ្រប់គ្រង​បន្តិច​តាម​សង្គម​យើង​សព្វថ្ងៃ​។​

​ទន្ទឹមនេះដែរ​ក្រសួងសុខាភិបាល ដាក់ចេញ​វិធានការ​សំខាន់​អំឡុងពេល​ច​ត្តា​ឡី​ស័ក ។​ក្នុងនោះ​មានៈ ត្រូវ​នៅ​ដាច់ដោយឡែក ១៤​ថ្ងៃ​។​តាមដាន​រោគសញ្ញា​។​នៅ​ដាច់ដោយឡែក​ពី​សមាជិកគ្រួសារ​។​ប្រើ​សម្ភារៈ​ដាច់ដោយឡែក​។​លាង​សម្អាត​ដៃ​។​ខ្ទប់មាត់ ច្រមុះ​ពេល​ក្អក ឬ​កណ្ដាស់​។ ហូប​អាហារ​ឆ្អិន​។​អនាម័យ​ល្អ​កន្លែង​រស់នៅ និង​រក្សា​អារម្មណ៍​ឱ្យ​នឹងនរ​។​
​ ​ក្រសួង​បាន​បញ្ជាក់ថា បុគ្គល​ល្មើស​នឹងត្រូវ​ពិន័យ​ជា​ប្រាក់​ពី ពីរ​សែន​រៀល ដល់ មួយ​លាន​រៀល ឬ​ទោស​ព្រហ្មទណ្ឌ ជា​ធរមាន​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular

ឃាត់ខ្លួន​ជនសង្ស័យ ពីរ​នា...

ដោយៈ ទេ​ពក​ង្រី / កំពង់ឆ្...

EL : Arsenal, Leicester, ...

​ប្រែ​សម្រួល : កញ្ញា​ដា...

ម៉ាឡេស៊ី​តំរូវអោយ​និយោជក​...

​ប្រែ​សម្រួលៈ​វាសនា​/​គូ​...

សមត្ថកិច្ច ឃាត់ខ្លួន​ជនសង...

ដោយៈ ស​រិ​ទ្ធ / ភ្នំពេញៈ ...