Home ព័ត៌មានជាតិ នយោបាយ សេចក្តីព្រាងច...

សេចក្តីព្រាងច្បាប់​ចំនួន​៦​បាន​ឆ្លង​ផុត​ព្រឹទ្ធសភា​

ដោយៈ​ញ៉ែម​សុផល​/​ភ្នំពេញ​:​ព្រឹទ្ធសភា​នា​ព្រឹក​ថ្ងៃទី​១២​ខែវិច្ឆិកា​បាន​បន្ត​សម័យប្រជុំ​រប​ស់​ខ្លួន​ដើម្បី​ពិនិត្យ​និង​ឱ្យយោបល់​លើ​សេចក្តីព្រាងច្បាប់​ចំនួន​៦​ក្រោម​អធិបតីភាព​សម្តេច​វិបុល​សេនា​ភក្តី​សាយឈុំ​ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា​។​ក្រោយ​ការពិនិត្យ​និង​ពិភាក្សា​រួច​អង្គ​ព្រឹទ្ធសភា​ដែលមាន​វត្តមាន​សមាជិក​ព្រឹទ្ធសភា​ចំនួន​៥២​រូប​បានអនុម័ត​និង​ឯកភាព​ចំពោះ​សេចក្តីព្រាងច្បាប់​ទាំង​៦​ដែល​អនុម័ត​ដោយ​រដ្ឋសភា​កន្លងទៅ​ថ្មីៗ​នេះ​។​

សេចក្តីព្រាងច្បាប់​ទាំង​៦​នោះ​មាន​៖១. សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​ពិធីសារ​ខណ្ឌសីមា និង​បោះបង្គោល​ព្រំដែន​គោក រវាង​ព្រះរាជាណាចក្រ​កម្ពុជា និង​សាធារណរដ្ឋ​សង្គមនិយម​វៀតណាម ។​២. សេចក្តីព្រាងច្បាប់ ស្តីពី​ការអនុម័ត​យល់ព្រម​លើ​សន្ធិសញ្ញា​ស្តីពី​ការហាមឃាត់​អាវុធ​នុយក្លេអ៊ែរ​។​៣.​សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​ពិធីសារ​ទីមួយ​ធ្វើ​វិសោធនកម្ម​កិច្ចព្រមព្រៀង​ស្តីពី​ភាពជា​ដៃគូ​សេដ្ឋកិច្ច​ទូលំទូលាយ​រវាង​រដ្ឋ​ជា​សមាជិកសមាគម​ប្រជាជាតិ​អាស៊ីអាគ្នេយ៍ និង​ជប៉ុន ។​៤.​សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​ពិធីសារ​អនុវត្ត​កញ្ចប់​សន្យា​ទី​១០ ក្រោម​កិច្ចព្រមព្រៀង​ក្របខ័ណ្ឌ​អាស៊ាន​ស្តីពី​សេវាកម្ម​។​៥.​សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​កិច្ចព្រមព្រៀង​ស្តីពី​ការវិនិយោគ​ក្រោម​កិច្ចព្រមព្រៀង​ក្របខ័ណ្ឌ​ស្តីពី​កិច្ចសហប្រតិបត្តិការ​សេដ្ឋកិច្ច​ទូលំទូលាយ​រវាង​សមាគម​ប្រជាជាតិ​អាស៊ីអាគ្នេយ៍​និង​សាធារណរដ្ឋ​ឥណ្ឌា​និង​៦.​សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​កិច្ចព្រមព្រៀង​ស្តីពី​ការវិនិយោគ​រវាង​បណ្តា​រដ្ឋ​សមាជិក នៃ​សមាគម​ប្រជាជាតិ​អាស៊ីអាគ្នេយ៍​និង​រដ្ឋាភិបាល​នៃ​តំបន់​រដ្ឋបាល​ពិសេស​ហុងកុង​នៃ​សាធារណរដ្ឋ​ប្រជាមានិត​ចិន​។​

​សេចក្តីព្រាងច្បាប់ ស្តីពី​ការអនុម័ត​យល់ព្រម​លើ ពិធីសារ​ខណ្ឌសីមា និង​បោះបង្គោល​ព្រំដែន​គោក​រវាង​ព្រះរាជាណាចក្រ​កម្ពុជា និង​សាធារណរដ្ឋ​សង្គមនិយម​វៀតណាម គឺជា​ឯកសារ​គ្រឹះ​រឹងមាំ​ក្នុងការ​ការពារ​បូរណភាព​ទឹកដី​កម្ពុជា​ដោយ​កំណត់​ខ្សែ ព្រំដែន​មិន​កែប្រែ​រឹងមាំ​យូរអង្វែង​សម្រាប់​កូន​ខ្មែរ​ជំនាន់​ក្រោយ​និង​បង្កើន​ទំនាក់ទំនង​អ្នកជិតខាង​ល្អ​]\]​ថែរក្សា​បាន​នូវ​ព្រំដែន​សន្ដិភាព សាមគ្គីភាព មិត្តភាព សហប្រតិបត្តិការ និង​ការអភិវឌ្ឍ​រវាង​ប្រជាជាតិ និង​ប្រជាជន​នៃ​ប្រទេស​ទាំងពីរ​។ នេះ​គឺជា​ជោគជ័យ​នៃ​ការអនុវត្ត​ជាក់ស្ដែង​នូវ​នយោបាយ​ដ៏​ត្រឹមត្រូវ​របស់​រាជរដ្ឋាភិបាល​នៃ​ព្រះរាជាណាចក្រ​កម្ពុជា ក្នុងការ​ការពារ​ឯក​រាជ្យ អធិបតេយ្យភាព បូរណភាព​ទឹកដី និង​ទទួលខុសត្រូវ​ចំពោះ​ប្រវត្តិសាស្ដ្រ​ប្រទេសជាតិ​កម្ពុជា ស្របតាម​មាត្រា​៥២ ជំពូក​ទី​៤ នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​។​

​សេចក្តីព្រាងច្បាប់​នេះ​តាក់តែងឡើង​មាន​៣​មាត្រា​ត្រូវបាន​រដ្ឋសភា​នៃ​ព្រះរាជាណាចក្រ​កម្ពុជា​អនុម័ត​យល់ព្រម​ជា​លើកដំបូង​ចំនួន​១១៦​សំឡេង​នៃ​ចំនួន​សមាជិក​រដ្ឋសភា​ទាំងមូល កាលពី​ថ្ងៃទី​២ ខែវិច្ឆិកា ឆ្នាំ​២០២០ នា​សម័យប្រជុំ​រដ្ឋសភា​លើក​ទី​៥ នីតិកាល​ទី​៦​។​ឯកឧត្តម​វ៉ា គឹមហុង ទេសរដ្ឋមន្ដ្រី​ទទួលបន្ទុក​កិច្ចការ​ព្រំដែន និង​ជា​ប្រធាន​គណៈកម្មាធិការ​ចម្រុះ​កិច្ចការ​ព្រំដែន អមដោយ​ថ្នាក់ដឹកនាំ​មន្ត្រីជាន់ខ្ពស់​និង​មន្ត្រី​ជំនាញ​បាន​អញ្ជើញ​មក​ការពារ​សេចក្តីព្រាងច្បាប់​នេះ​។​អង្គប្រជុំ​ព្រឹទ្ធសភា​បាន​ពិនិត្យ​និង​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល​ដោយ​ឥត​កែប្រែ​ចំនួន​៥២​សំឡេង​នៃ​ចំនួន​សមាជិក​ព្រឹទ្ធសភា​ទាំងមូល​។​

​សេចក្តីព្រាងច្បាប់ ស្តីពី​ការអនុម័ត​យល់ព្រម​លើ​សន្ធិសញ្ញា ស្តីពី​ការហាមឃាត់​អាវុធ​នុយក្លេអ៊ែរ មាន ០៣​មាត្រា​បាន​ត្រូវ​អង្គប្រជុំ​ព្រឹទ្ធសភា​បាន​ពិនិត្យ និង​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល ដោយ​ឥត​កែប្រែ​ចំនួន ៥២​សំឡេង​នៃ​ចំនួន​សមាជិក​ព្រឹទ្ធសភា​ទាំងមូល​។​សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រី​ក្រសួងការពារជាតិ អមដោយ​ថ្នាក់ដឹកនាំ មន្ត្រីជាន់ខ្ពស់​និង​មន្ត្រី​ជំនាញ​បាន​អញ្ជើញ​មក​ការពារ​សេចក្តីព្រាងច្បាប់​នេះ​។​
​ព្រះរាជាណាចក្រ​កម្ពុជា​ប្រកាន់​ភ្ជាប់​នូវ​នយោបាយ​អ​ព្យា​ក្រឹត្យ មិន​ចូលបក្ស​សម្ព័ន្ធ និង​ហាមឃាត់​ដាច់ខាត​ការផលិត ការដឹកជញ្ជូន​ការប្រើប្រាស់​ការរក្សា​ទុក​អាវុធ​គីមី​អាវុធ​នុយក្លេអ៊ែរ​អាវុធ​ជីវសាស្ដ្រ​និង​អាវុធ​វិទ្យុសកម្ម​។​រាជរដ្ឋាភិបាល​កម្ពុជា​ប្រកាន់​ជំហរ​រឹងប៉ឹង សុទិដ្ឋិនិយម បានធ្វើ​ទំនាក់ទំនង​យ៉ាង​ជិតស្និទ្ធ​ជាមួយ​អង្គការ ស្ថាប័ន​ជាតិ ស្ថាប័ន​អន្ដរជាតិ ដើម្បី​ចុះហត្ថលេខា​លើ​សន្ធិសញ្ញា​ស្ដីពី​ការហាមឃាត់​អាវុធ​នុយក្លេអ៊ែរ​នេះ​កាលពី​ថ្ងៃទី​៩​ខែមករា​ឆ្នាំ​២០១៩​ក្នុង​គោលបំណង​មិន​អនុញ្ញាតឱ្យ​ប្រទេស​ណាមួយ​មាន​អាវុធ​នុយក្លេអ៊ែរ​និង​ផ្ដល់ជំនួយ​ទ្រទ្រង់​លើកទឹកចិត្ត​ដល់​បណ្ដា​ប្រទេស​ហត្ថលេខី​នៃ​តំបន់​គ្មាន​អាវុធ​នុយក្លេអ៊ែរ​។ ម្យ៉ាងទៀត​ផ្អែក​តាម​មាត្រា​៥៤​នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​និង​ច្បាប់​ស្ដីពី​ការហាមឃាត់​អាវុធ​គីមី​អាវុធ​នុយក្លេអ៊ែរ អាវុធ​ជីវសាស្ដ្រ និង​អាវុធ​វិទ្យុសកម្ម ដែល​ត្រូវ​បានប្រកាស​ឱ្យប្រើ​ដោយ​ព្រះរាជក្រម​លេខ​៖ នស​/​រកម​/១២០៩/០២៣ ចុះ​ថ្ងៃទី​៣ ខែធ្នូ ឆ្នាំ​២០០៩ ព្រះរាជាណាចក្រ​កម្ពុជា​ហាម​ដាច់ខាត​ចំពោះ​ការផលិត ការដឹកជញ្ជូន ការប្រើប្រាស់ ការរក្សា​ទុក​អាវុធ​គីមី​អាវុធ​នុយក្លេអ៊ែរ​អាវុធ​ជីវសាស្ដ្រ​និង​អាវុធ​វិទ្យុសកម្ម​។​ការប្រកាន់​ជំហរ​មិន​ពាក់ព័ន្ធ​នឹង​ការផលិត​អាវុធ​នុយក្លេអ៊ែរ ជា​វិធានការ​រួមចំណែក​រប​ស់​ប្រទេស​កម្ពុជា ក្នុង​ការរក្សា​សន្ដិភាព សន្ដិសុខ សុវត្ថិភាព​និង​ទប់ស្កាត់​នូវ​ការរីក​សាយ ភាយ​អាវុធ​មហា​ប្រល័យ​។​
​ចំណែក​សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​ពិធីសារ​ទីមួយ​ធ្វើ​វិសោធនកម្ម​កិច្ចព្រមព្រៀង​ស្តីពី​ភាពជា​ដៃគូ​សេដ្ឋកិច្ច​ទូលំទូលាយ​រវាង​រដ្ឋ​ជា​សមាជិកសមាគម​ប្រជាជាតិ​អាស៊ីអាគ្នេយ៍ និង​ជប៉ុន នឹង​ធ្វើឱ្យ​ពាណិជ្ជកម្ម​អាស៊ាន​-​ជប៉ុន មាន​ភាពល្អ​ប្រសើរឡើង​ឆ្លើយតប​ទៅនឹង​ការវិវឌ្ឍ​នៃ​សេដ្ឋកិច្ចពិភពលោក នឹង​ត​ភ្ជាប់​សេដ្ឋកិច្ច​រវាង​អាស៊ាន​-​ជប៉ុន​តាមរយៈ​ការធ្វើ​សេរីភាវូបនីយកម្ម​លើ​ពាណិជ្ជកម្ម សេវាកម្ម​បម្លាស់​ទី​រូបវន្តបុគ្គល ការវិនិយោគ ព្រមទាំង​លើកកម្ពស់​សហ​-​ប្រតិបត្តិការ​សេដ្ឋកិច្ច និង​បច្ចេកទេស​រវាង​អាស៊ាន​-​ជប៉ុន​។​ព្រះរាជាណាចក្រ​កម្ពុជា​នឹងមាន​កាលានុវត្តភាព​កាន់តែច្រើន​បន្ថែមទៀត ក្នុងការ​ទទួលបាន​ផលប្រយោជន៍​ពី​កិច្ចព្រមព្រៀង​ដែល​បានធ្វើ​វិសោធនកម្ម​រួច​នេះ ដោយសារ​ជប៉ុន​ជាទី​ផ្សារ​មូលធន​ដ៏​ធំ​ក្នុង​តំបន់ ព្រមទាំង​មាន​បច្ចេកវិទ្យា​ជឿនលឿន​។​


​សេចក្តីព្រាងច្បាប់​នេះ តាក់តែងឡើង​មាន ០៣​មាត្រា ត្រូវបាន​រដ្ឋសភា​នៃ​ព្រះរាជាណាចក្រ​កម្ពុជា អនុម័ត​យល់ព្រម​ជា​លើកដំបូង​ចំនួន​១១៦​សំឡេង នៃ​ចំនួន​សមាជិក​រដ្ឋ​សភា​ទាំងមូល កាលពី​ថ្ងៃទី​២ ខែវិច្ឆិកា ឆ្នាំ​២០២០ នា​សម័យប្រជុំ​រដ្ឋសភា​លើក​ទី​៥ នីតិកាល​ទី​៦​។​លោក ជា វ៉ាន់​ដេ​ត រដ្ឋមន្ត្រីក្រសួង​ប្រៃសណីយ៍ និង​ទូរគមនាគមន៍ អមដោយ​ថ្នាក់ដឹកនាំ​មន្ត្រីជាន់ខ្ពស់​និង​មន្ត្រី​ជំនាញ​បាន​អញ្ជើញ​មក​ការពារ​សេចក្តីព្រាងច្បាប់​នេះ​។​អង្គប្រជុំ​ព្រឹទ្ធសភា​បាន​ពិនិត្យ និង​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល ដោយ​ឥត​កែប្រែ​ចំនួន ៥២​សំឡេង នៃ​ចំនួន​សមាជិក​ព្រឹទ្ធសភា​ទាំងមូល​។​
​រីឯ​សេចក្តីព្រាងច្បាប់ ស្តីពី​ការអនុម័ត​យល់ព្រម​លើ​ពិធីសារ​អនុវត្ត​កញ្ចប់​សន្យា​ទី​១០ ក្រោម​កិច្ចព្រមព្រៀង​ក្របខ័ណ្ឌ​អាស៊ាន​ស្តីពី​សេវាកម្ម នឹង​ពង្រឹង​កិច្ចសហប្រតិបត្តិការ​លើ​វិស័យ​សេវាកម្ម ដោយ​លុបបំបាត់​ឱ្យបាន​ច្រើន​បំផុត​នូវ​ការ​រឹតត្បិត​នានា ចំពោះ​ពាណិជ្ជកម្ម សេវាកម្ម​ក្នុងចំណោម​បណ្តា​រដ្ឋ​សមាជិក​អាស៊ាន ពង្រីក​វិសាលភាព និង​ធ្វើឱ្យ​កាន់តែ​ស៊ីជម្រៅ​ជាង​មុន ក្នុង​ការធ្វើ​សេរីភាវូបនីយកម្ម​ពាណិជ្ជកម្ម សេវាកម្ម​លើ​វិស័យ ឬ​អនុវិស័យ​ថ្មីៗ​បន្ថែមទៀត​ឱ្យបាន​លើសពី​អ្វីដែល​បានធ្វើ​ឡើង​ដោយ​បណ្តា​រដ្ឋ​សមាជិក​អាស៊ាន នៅក្រោម​កិច្ចព្រមព្រៀង​ទូទៅ​ស្តីពី ពាណិជ្ជកម្ម សេវាកម្ម​របស់​អង្គការ​ពាណិជ្ជកម្ម​ពិភពលោក ហើយ​រួមចំណែក​ក្នុងការ​ធ្វើឱ្យ​កាន់តែ​ស៊ីជម្រៅ និង​ពង្រីក​ការធ្វើសមាហរណកម្ម​សេដ្ឋកិច្ច ព្រមទាំង​ការតភ្ជាប់​នានា ដើម្បី​សម្រេចបាន​នូវ​សហគមន៍​សេដ្ឋកិច្ច​អាស៊ាន ដោយមាន​ការចូលរួម​ពី​វិស័យ​ឯកជន ក៏ដូចជា​រួមចំណែក​ក្នុងការ​សម្រេចបាន​នូវ​គោលដៅ​តាម​ការកំណត់​របស់​ផែនការ​លម្អិត​សហគមន៍​សេដ្ឋកិច្ច​អាស៊ាន​២០២៥​។​
​សេចក្តីព្រាងច្បាប់​នេះ​តាក់តែងឡើង​មាន ៣​មាត្រា ត្រូវបាន​រដ្ឋសភា​នៃ​ព្រះរាជាណាចក្រ​កម្ពុជា អនុម័ត​យល់ព្រម​ជា​លើកដំបូង​ចំនួន​១១៦​សំឡេង នៃ​ចំនួន​សមាជិក​រដ្ឋ​សភា​ទាំងមូល កាលពី​ថ្ងៃទី​២ ខែវិច្ឆិកា​ឆ្នាំ​២០២០​នា​សម័យប្រជុំ​រដ្ឋសភា​លើក​ទី​៥​នីតិកាល​ទី​៦​។​លោក​ជា វ៉ាន់​ដេ​ត រដ្ឋមន្ត្រីក្រសួង​ប្រៃសណីយ៍ និង​ទូរគមនាគមន៍​អមដោយ​ថ្នាក់ដឹកនាំ​មន្ត្រីជាន់ខ្ពស់​និង​មន្ត្រី​ជំនាញ​បាន​អញ្ជើញ​មក​ការពារ​សេចក្តីព្រាងច្បាប់​នេះ​។​អង្គប្រជុំ​ព្រឹទ្ធសភា​បាន​ពិនិត្យ និង​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល ដោយ​ឥត​កែប្រែ​ចំនួន ៥២​សំឡេង នៃ​ចំនួន​សមាជិក​ព្រឹទ្ធសភា​ទាំងមូល​។​


​ចំពោះ​សេចក្តីព្រាងច្បាប់​ស្តីពី​ការអនុម័ត​យល់ព្រម​លើ​កិច្ចព្រមព្រៀង​ស្តីពី​ការវិនិយោគ​ក្រោម​កិច្ចព្រមព្រៀង​ក្របខ័ណ្ឌ​ស្តីពី​កិច្ចសហប្រតិបត្តិការ​សេដ្ឋកិច្ច​ទូលំទូលាយ រវាង​សមាគម​ប្រជាជាតិ​អាស៊ី​-​អាគ្នេយ៍ និង​សាធារណរដ្ឋ​ឥណ្ឌា មាន​គោលបំណង​ជំរុញ​ការវិនិយោគ និង​បង្កើត​របប​វិនិយោគ​ដោយ​សេរី​ងាយស្រួល តម្លាភាព និង​ប្រកួតប្រជែង​ដែល​ធ្វើឱ្យមាន​សេរី​ភា​វូប​នី​កម្ម ការវិនិយោគ​កាន់តែខ្លាំង​ឡើង​បន្ថែមទៀត ព្រមទាំង​ពង្រឹង​កិច្ចសហប្រតិបត្តិការ​វិនិយោគ​ធ្វើការ​សម្របសម្រួល ការវិនិយោគ បង្កើន​នូវ​វិធាន បទ​ប្ប​ញ្ញ​តិ្ត​វិនិយោគ និង​ផ្តល់​ការការពារ​ការវិនិយោគ ដែលមាន​តម្លាភាព​ចំពោះ​វិនិយោគិន​នៃ​ភាគី​ម្ខាង​លើទឹក​ដី​នៃ​ភាគី​ម្ខាង​ទៀត ដោយ​ឈរលើ​មូលដ្ឋាន​ស្មើភាព​និង​ផ្តល់​ផលប្រយោជន៍​ឱ្យ​គ្នា​ទៅវិញទៅមក ព្រមទាំង​បាន​ឆ្លុះបញ្ចាំង​អំពី​ការប្តេជ្ញា​រួម​របស់​ប្រទេស​ទាំងអស់ ដើម្បី​បង្កើត និង​លើកកម្ពស់​តំបន់​ពាណិជ្ជកម្ម និង​វិនិយោគ​ក្នុង​តំបន់​អាស៊ាន​-​ឥណ្ឌា​មួយ ដែល​រួមមាន​តំបន់​ពាណិជ្ជកម្ម​សេរី​សម្រាប់​ទំនិញ សេវាកម្ម និង​ការវិនិយោគ​។​តាមរយៈ​កិច្ចព្រមព្រៀង​នេះ​ព្រះរាជាណាចក្រ​កម្ពុជា​ពិតជា​បាន​បោះជំហាន​ថ្មី​មួយទៀត​ក្នុងការ​ទាក់ទាញ​វិនិយោគិន​ពី​ប្រទេស​ឥណ្ឌា​មក​វិនិយោគ​នៅ​កម្ពុជា ក្នុងឋានៈ​កម្ពុជា​ជា​សមាជិក​អាស៊ាន​។​
សេចក្តីព្រាងច្បាប់​នេះ តាក់តែងឡើង​មាន ៣​មាត្រា ត្រូវបាន​រដ្ឋសភា​នៃ​ព្រះរាជាណាចក្រ​កម្ពុជា អនុម័ត​យល់ព្រម​ជា​លើកដំបូង​ចំនួន​១១៦​សំឡេង នៃ​ចំនួន​សមាជិក​រដ្ឋ​សភា​ទាំងមូល កាលពី​ថ្ងៃទី​២ ខែវិច្ឆិកា ឆ្នាំ​២០២០ នា​សម័យប្រជុំ​រដ្ឋសភា​លើក​ទី​៥ នីតិកាល​ទី​៦​។​លោក ជិន ប៊ុនស៊ាន ទេសរដ្ឋមន្ត្រី​ទទួលបន្ទុក​បេសកកម្ម​ពិសេស អនុប្រធាន​ក្រុមប្រឹក្សា​អភិវឌ្ឍន៍​កម្ពុជា អមដោយ​ថ្នាក់ដឹកនាំ មន្ត្រីជាន់ខ្ពស់ និង​មន្ត្រី​ជំនាញ បាន​អញ្ជើញ​មក​ការពារ​សេចក្តីព្រាងច្បាប់​នេះ​។​អង្គប្រជុំ​ព្រឹទ្ធសភា​បាន​ពិនិត្យ និង​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល ដោយ​ឥត​កែប្រែ​ចំនួន​៥២​សំឡេង នៃ​ចំនួន​សមាជិក​ព្រឹទ្ធសភា​ទាំងមូល​។​
​សេចក្តីព្រាងច្បាប់ ស្តីពី​ការអនុម័ត​យល់ព្រម​លើ​កិច្ចព្រមព្រៀង ស្តីពី​ការវិនិយោគ​រវាង​បណ្តា​រដ្ឋ​សមាជិក​នៃ​សមាគម​ប្រជាជាតិ​អាស៊ីអាគ្នេយ៍ និង​រដ្ឋាភិបាល​នៃ​តំបន់​រដ្ឋបាល​ពិសេស​ហុងកុង​នៃ​សាធារណរដ្ឋ​ប្រជាមានិត​ចិន មាន​គោលបំណង​ជំរុញ​លំហូរ​វិនិយោគ​រវាង​តំបន់​រដ្ឋបាល​ពិសេស​ហុងកុង និង​បណ្តា​រដ្ឋ​សមាជិកសមាគម​ប្រជាជាតិ​អាស៊ីអាគ្នេយ៍ តាមរយៈ​ការបង្កើតឱ្យមាន​នូវ​បរិយាកាស​ធុរកិច្ច​ដែលមាន​លក្ខណៈ​អំណោយផល ដើម្បី​ជំរុញ​គំនិត​ផ្តួចផ្តើម​ផ្នែក​ធុរកិច្ច​សម្រាប់​ការវិនិយោគ​ឱ្យ​កាន់តែ​ប្រសើរឡើង​ក្នុងចំណោម​ភាគី​នៃ​កិច្ចព្រមព្រៀង​។ កិច្ចព្រមព្រៀង​នេះ​ក៏​ជា​ផ្នែក​ដ៏​ធំ​មួយ​ក្នុង​ដំណើរការ​សមាហរណកម្ម​សេដ្ឋកិច្ច និង​សេរីភាវូបនីយកម្ម​ពាណិជ្ជកម្ម​រវាង​គូភាគី​ដែល​ត្រូវបាន​ផ្តួចផ្តើម​ដោយ​កិច្ចព្រមព្រៀង​ពាណិជ្ជកម្ម​សេរី​អាស៊ាន​-​ហុងកុង តាមរយៈ​ការ​ផ្តល់នូវ​ការធានា​សម្រាប់​ការវិនិយោគ និង​កិច្ចការពារ​ពេញលេញ​ចំពោះ​វិនិយោគិន​នៃ​ភាគី​ម្ខាង​ឬ​វិនិយោគិន​នៃ​រដ្ឋ​មិនមែន​ភាគី​លើទឹក​ដី​នៃ​ភាគី​ម្ខាង​ទៀត​ដោយ​ឈរលើ​មូលដ្ឋាន​ស្មើភាព​និង​គ្មាន​ការរើសអើង​ហើយ​ផ្តល់​ផលប្រយោជន៍​ឱ្យ​គ្នា​ទៅវិញ​ទៅ មក​។​តាមរយៈ​កិច្ចព្រមព្រៀង​នេះ ព្រះរាជាណាចក្រ​កម្ពុជា​ពិតជា​បាន​បោះជំហាន​ថ្មី​មួយទៀត​ក្នុងការ​ទាក់ទាញ​ក្រុមហ៊ុន​ដែល​ចុះបញ្ជី​នៅ​តំបន់​រដ្ឋបាល​ពិសេស​ហុងកុង ឱ្យមក​បណ្តាក់ទុន​វិនិយោគ​នៅ​កម្ពុជា​ប្រកបដោយ​ភាពជឿជាក់​លើ​រាជរដ្ឋាភិបាល​នៃ​ព្រះរាជាណាចក្រ​កម្ពុជា​។​
​សេចក្តីព្រាងច្បាប់​នេះ តាក់តែងឡើង​មាន ០៣​មាត្រា ត្រូវបាន​រដ្ឋសភា​នៃ​ព្រះរាជាណាចក្រ​កម្ពុជា អនុម័ត​យល់ព្រម​ជា​លើកដំបូង​ចំនួន ១១៦​សំឡេង នៃ​ចំនួន​សមាជិក​រដ្ឋ​សភា​ទាំងមូល កាលពី​ថ្ងៃទី​២ ខែវិច្ឆិកា ឆ្នាំ​២០២០ នា​សម័យប្រជុំ​រដ្ឋសភា​លើក​ទី​៥ នីតិកាល​ទី​៦​។​លោក ជិន ប៊ុនស៊ាន ទេសរដ្ឋមន្ត្រី​ទទួលបន្ទុក​បេសកកម្ម​ពិសេស អនុប្រធាន​ក្រុមប្រឹក្សា​អភិវឌ្ឍន៍​កម្ពុជា អមដោយ​ថ្នាក់ដឹកនាំ មន្ត្រីជាន់ខ្ពស់ និង​មន្ត្រី​ជំនាញ បាន​អញ្ជើញ​មក​ការពារ​សេចក្តីព្រាងច្បាប់​នេះ​។​អង្គប្រជុំ​ព្រឹទ្ធសភា​បាន​ពិនិត្យ និង​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល ដោយ​ឥត​កែប្រែ​ចំនួន ៥២​សំឡេង នៃ​ចំនួន​សមាជិក​ព្រឹទ្ធសភា​ទាំងមូល​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular

សម្តេច​តេ​ជោ​នាយករដ្ឋមន្ត...

​ដោយៈ​តារា​រិ​ទ្ធ​,​មុនី​...

ប្រជាពលរដ្ឋ​ងាយ​រងគ្រោះ​ច...

ដោយ​: ទេ​ពក​ង្រី / កំពង់ឆ...

រដ្ឋបាល​ខណ្ឌ​ពោធិ៍​សែន​ជ័...

ដោយ​៖ រ៉ា​ម៉ន / ភ្នំពេញ​៖...

បុរស​ម្នាក់​ចាប់រំលោភ​កូន...

​ដោយ​: សម្បត្តិ / ភ្នំពេញ...