ដោយៈ ជា សីហៈ/ភ្នំពេញៈ ដើម្បីបង្កើនគុណភាព និងភាពទាក់ទាញលើវិស័យទេសចរណ៍ របស់ខេត្តកំពង់ធំ ក៏ដូចជាចូលរួមចំណែកការអភិវឌ្ឍសេដ្ឋកិច្ចមូលដ្ឋាន ក្រសួងទេសចរណ៍ សហការជាមួយរដ្ឋបាលខេត្តកំពង់ធំ និងសហភាពសហពន្ធ័យុវជនកម្ពុជាបានប្រកាស ដាក់ចេញនូវកម្មវិធីប្រកួតប្រជែងគម្រោងប្លង់ស្ថាបត្យកម្មលើគម្រោងស្ថាបត្យកម្មវិថីលក់ ម្ហូបអាហារ (FOOD STREET)សម្រាប់ក្រុងស្ទឹងសែនដែលជាជ័យលាភីទីក្រុងស្អាតចំណាត់ថ្នាក់ ផ្ការំដួលពីរទងថ្នាក់ជាតិ២០១៨-២០២១។
បេក្ខជនដែលត្រូវចូលរួមគឺត្រូវមាន លក្ខខណ្ឌដូចខាងក្រោម ៖
១. សម្រាប់តែនិស្សិតដែលកំពុងសិក្សាឆ្នាំទី៣ ទី៤ និងទី៥ ឬបញ្ចប់ការសិក្សាហើយក្តី តាមបណ្តាសាកលវិទ្យាល័យ វិទ្យាស្ថាន ដែលមានជំនាញ ស្ថាបត្យកម្ម និងនគរោបនីយវិទ្យា ឬទេសចរណ៏ និងជំនាញពាក់ព័ន្ធ (១ក្រុមមានសមាជិក០៣រូប)។
២.ដាក់ពាក្យសុំប្រកួតប្រជែងស្នាដៃ៖ តាមរយៈប្រព័ន្ធ Online ៖: http://cambodiacleancity.gov.kh/kh/architecture_register
៣.រយៈពេល៖ ចាប់ផ្តើមទទួលពាក្យប្រកួតប្រជែងចាប់ពីថ្ងៃផ្សាយដំណឹងនេះតទៅរហូតដល់ ថ្ងៃទី៣០ ខែវិច្ឆិកា ឆ្នាំ២០២០។
៤.គោលការណ៍បច្ចេកទេស៖ គម្រោងស្ថាបត្យកម្មវិថីលក់ម្ហូបអាហារ (FOOD STREET) ត្រូវអនុវត្តន៍តាមគោលការណ៍បច្ចេកទេសដូចតទៅ៖
– ត្រូវមានសោភណភាពល្អព្រមទាំងបង្ហាញពីអត្តសញ្ញាណស្ថាបត្យកម្មបែបខ្មែរ ឬស្ថាបត្យកម្មបែបទំនើប ឬស្ថាបត្យកម្មបែបសហស្សវត្សរ៍ និងគោរពនូវបទដ្ឋាន និងក្បូនខ្នាតឱ្យបានច្បាស់លាស់។
– ត្រូវយកចិត្តទុកដាក់អំពីការអភិវឌ្ឍន៍បៃតងនិងលក្ខណៈនៃបែបបទទូទៅនៃស្ថាបត្យកម្មទាក់ទង នឹងទីតាំងភូមិសាស្ត្រនៃទីក្រុង ដែលមិនប៉ះពាល់សោភណភាពគំហើញនៃតំបន់ភាពស៊ីសង្វាក់ ជាមួយទិដ្ឋាភាព បរិស្ថាននិង វប្បធម៌សង្គមជុំវិញព្រមទាំងការធ្វើសមាហរណកម្មនៃគម្រោង នៅក្នុងទីតាំង រួមទាំងប្រើនូវសម្ភារៈដែលគិតគូរខ្ពស់ពីបរិស្ថានទីក្រុង។
– ត្រូវគិតគូរអំពីបែបបទនៃការអភិវឌ្ឍន៍ទីក្រុងប្រកបដោយភាពឆ្លាតវៃ (Smart City)
៥.ទំហំការងារ៖ គម្រោងស្ថាបត្យកម្មវិថីលក់ម្ហូបអាហារ (FOOD STREET) នេះមានទំហំការងារដូចខាងក្រោម៖
– ទស្សនៈស្ថាបត្យកម្ម និងការរៀបចំទីក្រុង
– គំនូសប្លង់ដែលមានមាត្រដ្ឋានច្បាស់លាស់(ប្លង់សរុប ប្លង់រូបភាពពីគ្រប់ទិសប្លង់ពុះយ៉ាងតិច ចំនួន២ រូបភាពនេត្រាទស្សន៍ រូបសំណាក់ស្ថាបត្យកម្ម និងប្លង់លម្អិតតាមការ ចាំបាច់)។
៦.អំពីជ័យលាភីនៃការប្រកួតប្រជែង៖ ចំពោះគម្រោងស្ថាបត្យកម្មដែលជាប់ចំណាត់ថ្នាក់លេខ១ ដល់លេខ៣នឹងទទួលជ័យលាភីពីគណៈកម្មាធិការជាតិវាយតម្លៃទីក្រុងស្អាតក្រសួងទេសចរណ៍ ដូចតទៅ៖
– គម្រោងស្ថាបត្យកម្មដែលជាប់ចំណាត់ថ្នាក់លេខ១ នឹងទទួលបានថវិកាចំនួន ៤ ០០០ ០០០ (បួនលានរៀល) និងវិញ្ញាបនបត្របញ្ជាក់ជ័យលាភី។
– គម្រោងស្ថាបត្យកម្មដែលជាប់ចំណាត់ថ្នាក់លេខ២ នឹងទទួលបានថវិកាចំនួន ៣ ០០០ ០០០ (បីលានរៀល) និងវិញ្ញាបនបត្របញ្ជាក់ជ័យលាភី។
– គម្រោងស្ថាបត្យកម្មដែលជាប់ចំណាត់ថ្នាក់លេខ៣ នឹងទទួលបានថវិកាចំនួន ២ ០០០ ០០០ (ពីរលានរៀល) និងវិញ្ញាបនបត្របញ្ជាក់ជ័យលាភី។
៧.ព័ត៌មានលំអិតសូមទំនាក់ទំនង គណៈកម្មការរៀបចំការប្រកួតប្រជែងនូវរៀងរាល់ម៉ោងធ្វើការ តាមរយៈលេខទូរស័ព្ទ០១០ ៣៤ ៤១ ៥១
កម្រងឯកសាររបស់ក្រសួងទេសចរណ៍ស្តីពី គោលការណ៍ណែនាំនានាក្នុងការទប់ស្កាត់ ជំងឺឆ្លងកូវីដ១៩ (http://cambodiacleancity.gov.kh/kh/architecture_register) ពាក្យសុំចូលរួមប្រកួតប្រជែង ស្ថាបត្យកម្មគម្រោងស្ថាបត្យកម្មវិថីលក់ម្ហូបអាហារ (STREET FOOD) – កម្រងឯកសារ ៕PC
