Home ព័ត៌មានជាតិ សេដ្ឋកិច្ច កសិករ​សម្រុក​...

កសិករ​សម្រុក​ប្រមូល​ផល​ដំឡូង​មី​មុន​អាយុ​កំណត់​ព្រោះ​ខ្លាច​ភ្លៀង​ធ្លាក់​ជោកជាំ​

ដោយ​:​ភ្នំ​ខៀវ​/​ប៉ៃលិនៈប្រជាកសិករ​ ប្រមូល​ផល​ដំឡូង​មី​ មួយចំនួន ​នៅក្នុង​ភូមិ​តា​ង៉ែ​ន​លើ សង្កាត់​ប៉ៃលិន ក្រុងប៉ៃលិន បាន​បង្ខំចិត្ត ​នាំគ្នាប្រមូល​ផល​​ដំឡូង​មី ​នៅតាម​ចម្ការ ​របស់​ខ្លួន ​ទាំង​មិនទាន់​គ្រប់​ខែ​ពេញលេញ​ដោយ​អះអាងថា​ បច្ចុប្បន្ន ​អាកាសធាតុ​ប្រែប្រួល​ខ្លាំង ​ភ្លៀង​​​ធ្លាក់​មិន​ទៀងទាត់ ខ្លាច​ភ្លៀង​ធ្លាក់​ជោកជាំ​ខ្លាំង ​នាំ​ឲ្យ​រលួយ​មើមដំឡូង​ ខាតបង់​ច្រើន ម្យ៉ាងទៀត​ ឲ្យ​ទាន់​ និង​តម្លៃ​ទីផ្សារ​ដំឡូង ​មាន​ហាងឆេង​ឡើង​ខ្ពស់ជាង​មុន​ផង​។ នេះ​ជាការ​បញ្ជាក់​ របស់​កសិក​រ​មួយរូប​។​

​កសិករ​ខាងលើ​ បាន​រៀបរាប់ថា ឆ្នាំនេះ​ គាត់​ដាំ​ដុះ​ដំឡូង​មី​ បាន​ចំនួន ២​ ហិកតា ចាប់តាំងពី​ខែមីនា​មក ​ដំឡូង​របស់គាត់​​ មាន​អាយុ​ជិត ​៨ ​ខែ​ហើយ ខណៈដែល​ដំឡូង​មី​ពេញ​អាយុ​ ​អាច​ប្រមូល​ផល​បាន ​មាន​រយ​:​ពេល​១​ឆ្នាំ​។ គាត់​ក៏ដូចជា​កសិករ​ដទៃ​ដោយសារតែ​ពិនិត្យមើល​ស្ថានភាព​ទឹកភ្លៀង​ចំពោះមុខ​នេះ​បាន​បន្ត​ធ្លាក់​យ៉ាង​ជោគជាំ​ស្ទើរ​រាល់ថ្ងៃ ម្យ៉ាងទៀត​ដីចម្ការ​ដំឡូង​របស់គាត់​ស្ថិត​ត្រង់​ទី​ទំនាប​ផង​នោះ​ទើប​បង្ខំចិត្ត​ដក​ដំឡូង​លក់​ឲ្យ​ឈ្មួញ​ក្នុងតម្លៃ​ជាង​២០០​រៀល​ក្នុង​១​គីឡូក្រាម​។​

​លោក សាយ សុផាត ប្រធាន​មន្ទីរ​កសិកម្ម​រុក្ខាប្រមាញ់ និង​នេសាទ​ខេត្ត​ប៉ៃលិន​បាន​ឲ្យ​ដឹងថា នៅក្នុង​ឆ្នាំ​២០២០​នេះ ប្រជាកសិករ​បង្កបង្កើន​ផលដំណាំ​កសិកម្ម​បាន​សរុប​ចំនួន ៦៩,២០៦​ហិកតា ក្នុងនោះ​ខូចខាត​ដោយសារ​គ្រោះធម្មជាតិ​ជំនន់​ទឹកភ្លៀង​ចំនួន ៣,៧៨៥ ហិកតា ។ ដោយឡែក​ចំពោះ​ដំណាំ​ដំឡូង​មី​កសិករ​អនុវត្តបាន​លើ​ផ្ទៃដី​ចំនួន ៣៩,៧៤០​ហិកតា ខូចខាត​អស់​ចំនួន ៣,១០៦ ហិកតា​៕​

ទីតាំងផ្សាយពាណិជ្ជកម្ម

- Advertisment -

Most Popular