Home ព័ត៌មានជាតិ សន្តិសុខ ​ឃាត់ខ្លួន​បុ...

​ឃាត់ខ្លួន​បុរស​កាន់​កាត​កាសែត​ម្នាក់ ក្នុងការ​បង្ក្រាប​រថយន្ត​ដឹកឈើ​

ដោយៈ សុខុម / ស្ទឹងត្រែងៈ បុរស​កាន់​កាត​កាសែត​ម្នាក់ ត្រូវបាន​កងរាជអាវុធហត្ថ ឃាត់​ខ្លួន ក្នុងពេល​ចុះបង្ក្រាប រថយន្ត​តូយ៉ូតា កាមរី (​ឆ្លាម​) ដឹកជញ្ជូន​ឈើ នៅ​ម៉ោងជាង ២ រសៀល ថ្ងៃទី​១២ ខែវិច្ឆិកា ឆ្នាំ​២០២០ ។​

​សមត្ថកិច្ច បាន​ប្រាប់​ឲ្យ​ដឹងថា រថយន្ត​តូយ៉ូតា កាមរី (​ឆ្លាម​) បាន​ដឹកឈើ​ប្រណីត ពី​ស្រុក​សៀម​ប៉ាង ខេត្តស្ទឹងត្រែង ក្នុង​បំណង​យក​លក់ នៅ​ស្រុក​ស្នួល ខេត្តក្រចេះ​។ សមត្ថកិច្ច បាន​​​ដេញ​ស្ទាក់ តាំងពី​ចំណុច​ដុង​ក្រឡ រហូតដល់​ត្រង់ ចំណុច​មុខ​វត្ត​អូរ​ព្រះ ស្ថិតក្នុង​ឃុំ​អូរ​គ្រៀង ស្រុក​សំបូរ ខេត្តក្រចេះ ទើប​ចាប់បាន​។ នៅក្នុងពេល​សមត្ថកិច្ច ចុះបង្ក្រាប​នោះ ឈ្មួញ​​ឈើ​នេះ បាន​បើក​ប៉ះ​រថយន្ត សមត្ថកិច្ច​អស់ ៣ គ្រឿង​ផង​។​

​សមត្ថកិច្ច បាន​ឲ្យ​ដឹង​ទៀតថាៈ រថយន្ត​ដឹកឈើ ដែល​កម្លាំង​អាវុធហត្ថ បង្ក្រាបបាន ជា​ប្រភេទ​រថយន្ត​តូយ៉ូតា កាមរី (​ឆ្លាម​) ព័ណ៌​ស្លែ ពាក់​ស្លាក​លេខ កំពង់ស្ពឺ 2A-2025 ។ ចំណែក អ្នកបើកបរ​រថយន្ត ឈ្មោះ តាន សុភ័ក្ត្រ ជា​ជំនួយ​ការនិពន្ធ​នាយក របស់​អង្គភាព​សារព័ត៌មាន​មួយ ក្នុងស្រុក ដែល​ឈរជើង​យក​ព័ត៌មាន នៅក្នុង​ខេត្តក្រចេះ​។​

​ក្រោយ​ការឃាត់ខ្លួន ជនសង្ស័យ រួមជាមួយ​រថយន្ត ដឹកឈើ​គ្រញូង ត្រូវបាន​បញ្ជូន​មកកាន់ បញ្ជាការដ្ឋាន កងរាជអាវុធហត្ថ ខេត្តស្ទឹងត្រែង ។ ដោយឡែក ឈើ​នៅក្នុង​រថយន្ត​នោះ នៅ​មិនទាន់​ដឹង​ពី​ចំនួន ពិតប្រាកដ​នៅឡើយ​ទេ ។ ចំពោះ​វត្ថុតាង​បទល្មើស ត្រូវបាន​ប្រគល់ ទៅ​ឲ្យ​មន្ត្រី​ព្រៃឈើ ខេត្តស្ទឹងត្រែង ដើម្បី​កសាង​សំណុំរឿង ចាត់ការ​តាម​នីតិវិធី​ច្បាប់​៕/V​

ទីតាំងផ្សាយពាណិជ្ជកម្ម

- Advertisment -

Most Popular