សកម្មភាព​មនុស្សធម៌​នៃ​ការចែករំលែក បន្ត​ទាក់ទាញ​ទឹកចិត្ត​យុវវ័យ​!

​ដោយ​:​ម៉េង​ឆៃ​/ ភ្នំពេញ​: ក្នុង​រយៈពេល​ប៉ុន្មាន​ថ្ងៃនេះ​សប្បុរសជន​កាន់តែច្រើន បាន​ចូលរួម​ឧបត្ថម្ភ ដោយ​បរិច្ចាគ​ត្រឹមតែ ១​ដុល្លារ ក្នុង​ម្នាក់ ដល់​មន្ទីរ​កុមារ​អង្គរ ក្នុង​ខេត្តសៀមរាប​។ សារ​ចែករំលែក ត្រូវបាន​ធ្វើឡើង​តាម​ហ្វេ​ស​ប៊ុ​ក ដោយ​ដាក់​វេន​មិត្តភក្តិ បងប្អូន​បន្ទាប់ តាមរបៀប Challenge ដូច​កាលពី​ប៉ុន្មាន​ឆ្នាំមុន ដែល​គេ​លេង​ចាក់​ទឹកកក និង​ញ៉ាំ​ម្ទេស ជាដើម​។​

​លើក​នេះ អ្នកលេង​ហ្វេ​ស​ប៊ុ​ក ដែលជា​យុវវ័យ​ខ្មែរ​ហើយ បាន​ចូលរួម​បរិច្ចាគ​ថវិកា ១​ដុល្លារ​អាម៉េរិក តាម​កុង​អេ​ប៊ី​អេ​( ABA) ឬ វី​ង​(Wing) ហើយ​បាញ់​ចូល​កុង ABA និង Wing របស់​មន្ទីរពេទ្យ​កុមារ​អង្គរ នៅ​ខេត្តសៀមរាប​។​អ្នកខ្លះ មិនមាន​កុង​ធនាគារ ABA ដើម្បី​វេរ​លុយ ក៏បាន​ឲ្យ​លុយ ១​ដុល្លារ ទៅ​អ្នកមាន​កុង ABA ដើម្បី​ឲ្យ​គេ ជួយ​បាញ់​លុយ ១​ដុល្លារ​នោះ ទៅកាន់​មន្ទីរពេទ្យ​កុមារ​អង្គរ ដើម្បី​ជួយ​ដល់​ដំណើរការ​មន្ទីរពេទ្យ ដែល​ពិនិត្យ​ព្យាបាល​កុមារ​កម្ពុជា ដោយ​មិន​គិតថ្លៃ​នេះ​។​

​ក្នុង​សារ​លើ​ហ្វេ​ស​ប៊ុ​ក បានសរសេរថា «​លេង​ហ្គេម #១​ដុល្លារ សម្រាប់​កុមារ​កម្ពុជា #onedollarchallengeforcambodianchildren ក្នុង​កម្មវិធី #​រត់​ដើម្បី​សប្បុរសធម៌​ជាមួយ​សាយ #RUNWITHSAI ដោយ​គ្រាន់តែ​ធ្វើការ​បរិច្ចាគ ១ ដុល្លារ ទៅកាន់​មន្ទីរពេទ្យ​កុមារ​អង្គរ screenshort transactions ព្រមទាំង​ភ្ជាប់​ជាមួយនឹង​រូបថត​របស់​លោកអ្នក រួច tag ទៅកាន់​មិត្ត​ភ​ក្កិ ១០ នាក់​បន្តទៀត ដើម្បី​ចូលរួម​លេង​ហ្គេម​មួយ​នេះ post នៅលើ wall របស់លោក​អ្នក​។ ចូលរួម​ទាំងអស់គ្នា ដើម្បី​មន្ទីរពេទ្យ​កុមារ​អង្គរ ដើម្បី​កុមារ​កម្ពុជា ដើម្បី​សង្គមជាតិ​យើងទាំងអស់គ្នា​។ #​រត់​ដើម្បី​សប្បុរសធម៌​ជាមួយ​សាយ #​រត់​ដើម្បី​កុមារ​កម្ពុជា #SaiRunCharityKH official website : https://saicambodianartist.com សំរាប់​ការបរិច្ចាគ​លើ ABA App : 000 320 555 (Angkor Hospital for Children Limited) និង​Wing : 03206872 (AHC Patient Contributions)»​។​

​មន្ទីរពេទ្យ​កុមារ​អង្គរ បាន​បង្កើតឡើង នៅ​ឆ្នាំ​១៩៩៩ ដោយមាន​ស្ថាបនិក លោក ខេន​រ៉ូ អី​ហ្ស៊ូ​។ មកដល់ពេល​នេះ មន្ទីរពេទ្យ​កុមារ​អង្គរ បាន​ជួយ​ព្យាបាល​កុមារ​ក្រីក្រ​កម្ពុជា ដោយ​ក្នុង​មួយថ្ងៃ មាន​កុមារ​ចន្លោះ​ពី ៥០០ ទៅ ៦០០​នាក់ ដែល​ទទួល​សេវា​ព្យាបាល​ដោយ​ឥតគិតថ្លៃ ក្នុង​មន្ទីរពេទ្យ នៅ​ទី​រួម​ខេត្តសៀមរាប​នេះ​។​
​ដោយ​សារ​​កំណើន​នៃ​អ្នកជំងឺ ចេះតែ​កើនឡើង​ឥតឈប់ឈរ ហើយ​ការព្យាបាល ក៏​មិន​គិតលុយ​ថែមទៀត ដូច្នេះ​មន្ទីរពេទ្យ​កុមារ​អង្គរ ត្រូវការ​ធនធាន​ហិរញ្ញវត្ថុ កាន់តែច្រើន ដើម្បី​ផ្គត់ផ្គង់​រាល់​ការចំណាយ​របស់ខ្លួន​។

​ក្នុង​ដំណើរការ​កន្លងមក មិន​ខុសពី​មន្ទីរពេទ្យ​គន្ធបុប្ផា​ប៉ុន្មាន​ទេ គឺ​មន្ទីរពេទ្យ​កុមារ​អង្គរ ទទួលបាន​ជំនួយ​ពី​សប្បុរស​ជនជាតិ និង​អន្តរជាតិ ព្រមទាំង​រាជរដ្ឋាភិបាល ដើម្បី​ជួយ​ឲ្យ​មន្ទីរពេទ្យ មានលទ្ធភាព​ជួយ​កុមារ​កម្ពុជា​យើង​។​

​កន្លងមក មាន​ខាង​សណ្ឋាគារ ភោជនីយដ្ឋាន អង្គការ និង​ស្ថាប័ន​ក្រុមហ៊ុន​មួយចំនួន នៅ​ខេត្តសៀមរាប បានរៀបចំ​ព្រឹត្តិការណ៍ ឬ​កម្មវិធី​សប្បុរសធម៌​ជាច្រើន ដើម្បី​រក​ថវិកា ជួយ​មន្ទីរពេទ្យ កុមារ​អង្គរ​។ ក្រៅពីនេះ ខាង​មន្ទីរពេទ្យ​ផ្ទាល់ ក៏​ធ្លាប់​បានរៀបចំ​បុណ្យផ្កា​សាមគ្គី រក​ថវិកា សម្រាប់​ទ្រទ្រង់ ដល់​មន្ទីរពេទ្យ​ខ្លួន​ផងដែរ​។

​ក្នុង​សកម្មភាព​មនុស្សធម៌រ​បស់​យុវជន​កម្ពុជា​យើង​លើក​នេះ ជា​ផ្នែក​មួយ​ចូលរួម​ចែករំលែក ដើម្បី​ជួយ​ដល់​ដំណើរការ​មន្ទីរពេទ្យ សម្រាប់​ពិនិត្យ​ព្យាបាល​កុមារ​កម្ពុជា ក្នុង​គ្រួសារ​ក្រីក្រ​រាប់លាន​នាក់​។

​ការចូលរួម​ចែករំលែក​ត្រឹមតែ ១​ដុល្លារ ដែល​មិន​ស្មើនឹង​ថ្លៃ​កាហ្វេ​មួយ​កែវ ដែល​យុវវ័យ​យើង​មួយចំនួន និយម​ចូល​ហាង​ប្រ៊េ​នៗ រៀងរាល់​ថ្ងៃនោះ​ផង​។ តែ​ការចូលរួម​បរិច្ចាគ​នេះ ទទួលបាន​មកវិញ​នូវ​ការកោតសរសើរ លើកទឹកចិត្ត ហើយ​អ្នកធ្វើ​ទាន​នេះ ក៏​រីករាយ និង​បាន​បុណ្យ​ច្រើនណាស់​។​

​សូម​ឧទ្ទិស​ដ៏​សកម្មភាព​មនុស្សធម៌​នេះ សូម​ឲ្យ​បន្ត​ជាប្រចាំ​រៀងរាល់ខែ ព្រោះថា ដំណើរការ​មន្ទីរពេទ្យ​កុមារ​អង្គរ ក៏ដូចជា​មន្ទីរពេទ្យ​គន្ធបុប្ផា គឺ​ត្រូវតែ​ការ​រាប់លាន​ដុល្លារ ក្នុង​១​ខែៗ​ដើម្បី​បន្ត​បេសកកម្ម​ជួយសង្គ្រោះ​កុមារ​កម្ពុជា​រាប់លាន​នាក់​។​

​ជា​ការពិតហើយ ក្នុង ១​ឆ្នាំៗ រាជរដ្ឋាភិបាល បាន​ចំណាយ​មិនតិច​លាន​ដុល្លារ​នោះទេ លើ​សកម្មភាព និង​ដំណើរការ​មន្ទីរពេទ្យរ​ដ្ឋ នៅ​ថ្នាក់ជាតិ ក៏ដូចជា មន្ទីរពេទ្យ​ខេត្ត​រាជធានី ក្រុង​ស្រុក​ខណ្ឌ និង​មណ្ឌល​សុខភាព នៅតាម​ឃុំ​សង្កាត់​ទូទាំងប្រទេស​។ ប៉ុន្តែ​សកម្មភាព​តាម​មន្ទីរពេទ្យ និង​មណ្ឌល​សុខភាព​មួយចំនួន ហាក់​នៅមានកម្រិត​។ សេវា​ពិនិត្យ​ព្យាបាល​នៅ​ពេទ្យ​រដ្ឋ ក៏​ហាក់ដូចជា ខុសគ្នា​ឆ្ងាយ​ពី​មន្ទីរពេទ្យ​កុមារ គន្ធបុប្ផា ក៏ដូចជា មន្ទីរពេទ្យ​កុមារ​អង្គរ មិន​ថា នៅ​ភ្នំពេញ ឬ​នៅ​ខេត្តសៀមរាប នោះទេ​។​

​បើ​និយាយ​ពី​គ្រូពេទ្យ​វិញ គឺ​ស្ទើរតែ​ទាំងអស់ ជា​គ្រូពេទ្យ​ខ្មែរ​យើង បម្រើការ​នៅតាម​មន្ទីរពេទ្យ​គន្ធបុប្ផា នៅ​ភ្នំពេញ ក៏ដូចជា នៅ​សាខា​ខេត្តសៀមរាប និង​នៅ​មន្ទីរពេទ្យ​កុមារ​អង្គរ ខេត្តសៀមរាប​។ ពេទ្យ​បរទេស មាន​មិន​ច្រើន ជាង​ពេទ្យ​ខ្មែរ​យើង​ទេ​។ គុណភាព ចំណេះ ជំនាញ​នៃ​ការពិនិត្យ​ព្យាបាល រាប់ទាំង​ការវះកាត់​ផង គឺ​ពេទ្យ​ខ្មែរ​យើង មិន​ចាញ់​ពេទ្យ​បរទេស​ប៉ុន្មាន​ឡើយ​។ គ្រូ​ព​ទ្យ​ជនជាតិខ្មែរ​យើង​កាន់តែ​ច្រើនឡើងៗ សព្វថ្ងៃ ក៏​អាច​ពិនិត្យ​ព្យាបាល​កុមារ ដោយ​ការវះកាត់​ផង ក៏បាន​ជាសះស្បើយ​ដែរ​។​

​ដូច្នេះ​បើ​នៅតាម​មន្ទីរពេទ្យ​រដ្ឋ​របស់​យើង​ទាំងអស់ ពង្រឹងគុណភាព​លើ​សេវា​ពិនិត្យ​ព្យាបាល ហើយ​កុំ​យក​ថ្លៃ​ពេក លើ​សេវា​ពិនិត្យ​ព្យាបាល លុបបំបាត់​អំពើ​មិន​ស្មោះត្រង់ ព្រមទាំង​ដំឡើង​ប្រាក់ខែ​ឲ្យ​បុគ្គលិក​ពេទ្យ ដូច​នៅតាម​ពេទ្យ​គន្ធបុប្ផា និង​ពេទ្យ​កុមារ​អង្គរ នោះ​ជំនឿ​គ្រូពេទ្យ​យើង នៅតាម​ពេទ្យ​រដ្ឋ អាច​នឹង​ស្រោចស្រង់​បានមក​វិញ​។

​សំខាន់​មួយទៀត​សេវា​ក្រៅផ្លូវការ នៅ​ពេទ្យ​រដ្ឋ ត្រូវ​លុបបំបាត់ ហើយ​សីលធម៌​គ្រូពេទ្យ សម្តី​របស់​ពេទ្យ នៅ​មន្ទីរពេទ្យ​រដ្ឋ ក៏​គួរតែ​សុភាពរាបសារ ដូច​អ្វីដែល​គ្រូពេទ្យ​ខ្មែរ​យើង បាន​រៀនសូត្រ និង​អនុវត្ត​នៅតាម​មន្ទីរពេទ្យ​កុមារ​គន្ធបុប្ផា និង​ពេទ្យ​កុមារ​អង្គរ នោះ​ប្រជាពលរដ្ឋ​ខ្មែរ​យើង នឹងមាន​ជំនឿ​កាន់តែច្រើន​លើ​ពេទ្យ​ខ្មែរ​យើង​។​
​រាជរដ្ឋាភិបាល ពិចារណា យក​គំរូ​ការងារ និង​សេវា​ពិនិត្យ​ព្យាបាល នៅ​មន្ទីរពេទ្យ​សប្បុរសធម៌ គន្ធបុប្ផា និង​មន្ទីរពេទ្យ​កុមារ​អង្គរ ហើយ​អនុវត្តតាម​មន្ទីរពេទ្យ​រដ្ឋ​យើង​ទាំងអស់​។ បើ​ស្រុក​យើង មាន​សេវា​ពិនិត្យ​ព្យាបាល ដូច​ពេទ្យ​សប្បុរសធម៌​ទាំងពីរ​នេះ គឺជា​ភ័ព្វសំណាង​របស់​កុមារ និង​ប្រជាជន​កម្ពុជា​យើង​ហើយ​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular

អ៊ីរ៉ង់​ចោទ​អ៊ីស្រាអែល​ថា...

​ប្រែ​សម្រួល : កញ្ញា​ដា​ល...

សម្តេច​តេ​ជោ ហ៊ុន សែន ធ្វ...

ដោយៈ​តារា​រិ​ទ្ធ​/​ភ្នំពេ...

La Liga ចុង​សប្តាហ៍ ៖ Atl...

​ប្រែ​សម្រួល : កញ្ញា​ដា​ល...