Home ព័ត៌មានជាតិ នយោបាយ គណបក្សនយោបាយ​...

គណបក្សនយោបាយ​ចំនួន​បី​ចងសម្ព័ន្ធភាព​អ្នកប្រជាធិបតេយ្យ​ខ្មែរ​

​ដោយៈ មុនី​រ័ត្ន​/​ភ្នំពេញៈ គណបក្សនយោបាយ​ចំនួន​បី គឺ​គណបក្ស​សំបុក​ឃ្មុំ​សង្គម​ប្រជាធិបតេយ្យ​របស់លោក​ម៉ម សូណង់ដូ គណបក្ស​ខ្មែរ​រួបរួម​ជាតិ​របស់លោក​ញឹក ប៊ុនឆៃ និង​គណបក្ស​ខ្មែរ​តែមួយ​របស់លោក​កែម រិ​ទ្ធិ​សិត បានសម្រេច​ចងសម្ព័ន្ធភាព​ជាមួយគ្នា​ដោយ​ដាក់ឈ្មោះថា “​សម្ព័ន្ធភាព​អ្នកប្រជាធិបតេយ្យ​ខ្មែរ (​ស​.​ប​.​ខ​) THE ALLIANCE OF KHMER DEMOCRATS ( A.K.D)”​។ ការប្រកាស​ជា​ផ្លូវការ​នៃ​ការ​ចងសម្ព័ន្ធភាព​នេះ នឹងត្រូវ​ធ្វើឡើង​នៅក្នុងពេល​ឆាប់ៗ​ខាងមុខនេះ​។​


​ ​
​បន្ទាប់ពី​ការប្រកាស​ចងសម្ព័ន្ធភាព​រវាង​គណបក្សនយោបាយ​ទាំងបី​រួច គឺ​សម្ព័ន្ធភាព​អ្នកប្រជាធិបតេយ្យ​ខ្មែរ នឹង​បើក​ជំហរ​គ្រប់​គណបក្សនយោបាយ​ទាំងអស់​ដើម្បី​ចូលរួម​។​
​ ​
​គោលបំណង​នៃ​ការបង្កើត​សម្ព័ន្ធភាព​អ្នកប្រជាធិបតេយ្យ​ខ្មែរ គឺ​ដើម្បី​បណ្តុះ​គំនិត​ជាតិនិយម​គំរូ​ថ្មី​មួយ ដើម្បី​យុវជន​ខ្មែរ​បន្តវេន ដោយ​គ្មាន​វប្បធម៌​លាប​ពណ៌ និង​គ្មាន​វប្បធម៌​ក្តិចត្រួយ​។ ហើយ​គណបក្ស​ទាំងបី គឺមាន​គោលដៅ​ដូចគ្នា និង​រឹតចំណង​សាមគ្គីភាព ដើម្បី​ការធ្វើ​កិច្ចសហប្រតិបត្តិការ​ស​ម្រា​ប់​ការបោះឆ្នោត​ក្រុម​ប្រឹក្សាឃុំ សង្កាត់ ឆ្នាំ​២០២២ និង​ការបោះឆ្នោត​ជ្រើសតាំង​តំណាងរាស្ត្រ អាណត្តិ​ទី​៧ ឆ្នាំ​២០២៣​។​


​ ​
​បើតាម​ប្រភព​ច្បាស់​ការណ៍​បាន​ប្រាប់​រស្មី​កម្ពុជា​ថា ចំពោះ​សមាសភាព​ក្បាលម៉ាស៊ីន​ដឹកនាំ​សម្ព័ន្ធភាព​អ្នក​ប្រជា​ធិបតេយ្យ​ខ្មែរ គឺ​លោក​ម៉ម សូណង់ដូ ជា​ប្រធាន​សម្ព័ន្ធភាព​អ្នកប្រជាធិបតេយ្យ​ខ្មែរ លោក​ញឹក ប៊ុនឆៃ ជា​អនុ​ប្រធាន លោក​គុជ លី (​អនុប្រធាន​គណបក្ស​ខ្មែរ តែមួយ​) អគ្គលេខាធិការ​។​


​ ​
​លោក​ម៉ម សូណង់ដូ បាន​ថ្លែងប្រាប់​រស្មី​កម្ពុជា​ថា ការ​ចងសម្ព័ន្ធ​អ្នកប្រជាធិបតេយ្យ​ខ្មែរ គឺត្រូវធ្វើ​ឲ្យ​បាន​គង់វង្ស​ល្អ ហើយ​ចង់បាន​លេខបូក ដោះស្រាយ​បញ្ហា​សង្គម​ឲ្យ​មាន​ភាពយុត្តិធម៌​។ “…​បើសិនជា​យើង​បាន​ជោគជ័យ​ហើយ បាន​សន្តិភាព​ហើយ បើសិនជា​យើង​មិន​ធ្វើ​លេខបូក​ទេ យើង​នៅតែ​មានគំនិត​ចង់​ធ្វើ​លេខសង ចង់​ចាញ់​ចង់​ឈ្នះ ចង់​ដណ្តើម​តួនាទី​គ្នា គឺ​ជំហរ​វា​មិន​រឹងមាំ​។ យើង​ធ្វើ​ដំណើរការ​ដើម្បី​លេខបូក យើង​មិន​ធ្វើ​លេខសង​ដូច​ពួក​សម រង្ស៊ី ទេ​។ ប៉ុន្តែ​អ្វីដែល​យើង​មាន យើង​ត្រូវតែទទួលស្គាល់ គោរព យកទៅអនុវត្ត ក្នុង​ទិ​ដៅ​ធ្វើ​លេខ​បូក​”​។​
​ ​
​លោក​សូណង់ដូ​បាន​បន្តថា ការ​ចងសម្ព័ន្ធភាព​អ្នកប្រជាធិបតេយ្យ​ខ្មែរ គឺ​ធ្វើជា​គំរូ​ដោយ​ចាប់ផ្តើម​ធ្វើ​ពី​គណបក្ស​បី គឺ​គណបក្ស​សំបុក​ឃ្មុំ​សង្គម​ប្រជាធិបតេយ្យ គណបក្ស​ខ្មែរ​រួបរួម​ជាតិ និង​គណបក្ស​ខ្មែរ​តែមួយ​។ គណបក្ស​ទាំងបី​មាន​គោលនយោបាយ​ប្រហាក់ប្រហែលគ្នា និង​ទិសដៅ​ដូចគ្នា​ទាក់ទង​រឿង​ជាតិ សន្តិភាព និង​យុវជន​។ ហើយក៏​មានការ​លើកឡើង​អំពី​សន្ធិសញ្ញា​សន្តិភាព ២៣ តុលា ផងដែរ​។
​ ​
​លោក​បាន​បញ្ជាក់ថា ការ​ចងសម្ព័ន្ធភាព​នេះ គឺ​គណបក្ស​ទាំងបី​មិន​ច្របាច់​បញ្ចូល​គ្នា​ទេ ដោយ​គណបក្ស​និ​មួយ​ៗ រក្សាទុក​នៅ​ដដែល ពោលគឺ​មិន​ច្របាច់​ចូលគ្នា​តែមួយ ហើយក៏​មិន​រំលាយ​គណបក្ស​ទាំងបី​ចូលគ្នា​ដែរ​។ ហើយ​​អ្វីដែល​ធ្វើ​នេះ គឺមាន​បំណង​ចង់​ឲ្យ​គណបក្សនយោបាយ​នានា​ចូលរួម​ជាមួយ​សម្ព័ន្ធភាព​អ្នកប្រជាធិប​តេយ្យ​ខ្មែរ​។​
​ចំណែក​លោក​គុជ លី អនុប្រធាន​គណបក្ស​ខ្មែរ​តែមួយ មាន​ថ្លែងប្រាប់​រស្មី​កម្ពុជា​ថា សម្ព័ន្ធភាព​អ្នកប្រជា​ធិបតេយ្យ​ខ្មែរ នឹង​ចេញ​ជា​រូបរាង​នៅពេល​ឆាប់ៗ​ខាងមុខនេះ ដោយ​គណបក្ស​ទាំ​អ​បី​បាន​ស្រុះស្រួល​គ្នា​អស់ហើយ​។

​រីឯ​លោក​ញឹក ប៊ុនឆៃ ប្រធាន​គណបក្ស​ខ្មែរ​រួបរួម​ជាតិ មិនអាច​សុំ​ការអត្ថាធិប្បាយ​បានទេ ដោយ​ទូរស័ព្ទ​មិនអាច​ទំនាក់ទំនង​បាន​៕

ទីតាំងផ្សាយពាណិជ្ជកម្ម

- Advertisment -

Most Popular

អភិបាលរងខេត្តកំពង់ឆ្នាំងដ...

ដោយ:ទេពកង្រី/កំពង់ឆ្នាំងៈ...

អាវុធហត្ថឃាត់ខ្លួនបុរសម្ន...

ដោយ:ទេពកង្រី/កំពង់ឆ្នាំងៈ...

អ្នកនាំពាក្យ​ក្រសួងសុខាភិ...

ដោយ: មុនីរ័ត្ន / ភ្នំពេញ:...

នាយកដ្ឋាន​ព័ត៌មានវិទ្យា រ...

​ដោយៈ មុនី​រ័ត្ន / ភ្នំពេ...