Home ព័ត៌មានជាតិ នយោបាយ លទ្ធផល​នៃ កិច...

លទ្ធផល​នៃ កិច្ចប្រជុំ​កំពូល អាស៊ាន​បូក​បី លើក​ទី ២៣

​ដោយ​: គ​ន្ធា​-​ទេព មង្គល / ភ្នំពេញ​: ក្នុងនាម​ជា​តំណាង​ដ៏​ខ្ពង់ខ្ពស់ របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​, នា​រសៀល​ថ្ងៃទី ១៤ ខែ វិច្ឆិកា ឆ្នាំ ២០២០, លោក​អគ្​គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ បាន​ដឹកនាំ គណៈ​ប្រតិភូ​ជាន់ខ្ពស់ បន្ត​ចូលរួម​កិច្ចប្រជុំ​កំពូល “​អាស៊ាន​បូក​បី លើក​ទី ២៣” តាម​ប្រព័ន្ធ​វីដេអូ នៅ​ទីស្ដីការក្រសួង សេដ្ឋកិច្ច និង ហិរញ្ញវត្ថុ ។ កិច្ចប្រជុំ​នេះ ដឹកនាំ​ដោយ​លោក ង្វៀន សួន ហ្វ៊ុ​ក (Nguyen Xuan Phuc) នាយក​រដ្ឋមន្ត្រី​នៃ​សាធារណរដ្ឋ​សង្គមនិយម​វៀតណាម ។​

​ថ្នាក់ដឹកនាំ​នៃ​អាស៊ាន​បូក​បី បាន​ពិភាក្សា និង​បញ្ជា​ក់នូវ ការប្តេជ្ញាចិត្ត​របស់​អា​ស៊ាន​បូក​បី ក្នុងការ​លើកកម្ពស់​ស​ន្តិ​ភាព​, ស្ថិរភាព និង​វិបុលភាព​នៅក្នុង​តំបន់ តាមរយៈ​ការគាំទ្រ និង​ការចូលរួមចំណែក របស់​ប្រទេស​បូក​បី ចំពោះ​​​​គំនិត​ផ្តួចផ្តើម​នានា សំដៅ​ជួយ​ដោះស្រាយ​បញ្ហា​បន្ទាន់ ក្នុងអំឡុងពេល​វិបត្តិ​នៃ​ជំងឺ​កូ​វីដ​-១៩ និង​សម្រាប់​អនាគត ដូចជា​៖ “​កិច្ចព្រមព្រៀង​ពហុ​នីយកម្ម​គំនិត​ផ្តួចផ្តើម​ឈៀង​ម៉ៃ (CMIM)”, “​ការបង្កើត​មូលនិធិ​អាស៊ាន​ឆ្លើយតប​ជំងឺ កូ​វីដ​-១៩” និង “​ការ​ស្តុក​បម្រុង​បរិក្ខារ​វេជ្ជសាស្ត្រ​ចាំបាច់​នានា​របស់​អាស៊ាន​បូក​បី សម្រាប់​តម្រូវ​ការ​បន្ទា​ន់​ផ្នែក​សុខភាព​សាធារណៈ​” ។​

​ឈរលើ​ស្មារតី​សាមគ្គីភាព និង​សហប្រតិបត្តិការ​ខ្ពស់ រវាង​អាស៊ាន​បូក​បី​, អង្គប្រជុំ បានបង្ហាញ​នូវ​ការគាំទ្រ និង​ឆន្ទៈ​រួម​យ៉ាង​មុតមាំ​លើ​ការស្រាវជ្រាវ​, អភិវឌ្ឍន៍ និង​ផលិត​វ៉ាក់សាំង ឱ្យសម្រេចបាន នាពេល​ឆាប់ៗ​នេះ ក៏​ដូចជា ការ​ចែកចាយ​វ៉ាក់សាំង​នេះ ឱ្យបាន​ទាន់ពេលវេលា ក្នុងតម្លៃ​សមស្រប សម្រាប់​ប្រជាជន​ទាំងអស់គ្នា ។ ថ្នាក់ដឹកនាំ​នៃ អាស៊ាន​បូក​បី ក៏បាន​ធ្វើការ​វាយតម្លៃ​ខ្ពស់ ចំពោះ​កិច្ចសហប្រតិបត្តិការ និង​ការចូលរួម​ជួយ​ជ្រោមជ្រែង​របស់​ប្រទេស​បូក​បី ក្នុង​ការជំរុញ​ការស្តារ និង​ការ​ងើបឡើង​វិញ​នៃ​សង្គម​-​សេដ្ឋកិច្ច​នៅក្នុង​តំបន់ តាមរយៈ​ការបើកចំហរ​រំហូរ​ពាណិជ្ជកម្ម​សេរី​, វិនិយោគ និង​ការ​ស្តារឡើងវិញ នៃ​ខ្សែ​ច្រវាក់​ផលិតកម្ម​នៅក្នុង​តំបន់ ។ ក្នុងន័យនេះ​, ការចុះហត្ថលេខា លើ​កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់ (RCEP) នា​ថ្ងៃស្អែក ថ្ងៃទី ១៥ ខែ វិច្ឆិកា ឆ្នាំ ២០២០ គឺជា​សក្ខីភាព​ជាក់ស្តែង នៃ​សហប្រតិបត្តិការ​សេដ្ឋកិច្ច​របស់ ប្រទេស​អាស៊ាន​បូក​បី​នេះ ក្នុងការ​ជំរុញ​កំណើន​, ការលើកកម្ពស់ ភាពរឹងមាំ និង ភាព​ធន់​នៃ​សេដ្ឋកិច្ច​បន្ថែម​មួយកម្រិត​ទៀត ។ នៅក្នុង​ដំណាក់កាល នៃ​ការស្តារ​សង្គម​-​សេដ្ឋកិច្ច​ឡើងវិញ​នេះ ថ្នាក់ដឹកនាំ​អាស៊ាន​បូក​បី ក៏បាន​កត់សម្គាល់​ពីសា​រៈ​សំខាន់​នៃ​ការតភ្ជាប់​នៅក្នុង​តំបន់ និង នវានុវត្តន៍​ផ្នែក​បច្ចេកវិទ្យា​ឌីជីថល ដែល​នឹង​ក្លាយទៅជា​សសរស្តម្ភ​ដ៏​ចម្បង នៃ​ការអភិវឌ្ឍ​ប្រកបដោយ​ចីរភាព ។​

​ជា​លទ្ធផល​, ក្រោម​ស្មារតី​សាមគ្គីភាព​, ការរក្សាបាន​នូវ​ស្មារតី និង​យន្តការ​ពហុភាគី​និយម និង​ការរួបរួម​ជា​ថាមពល​ភាព ក្នុងការ​ដោះស្រាយ​បញ្ហា​កម្រិត​តំបន់ និង​សកល​, ថ្នាក់ដឹកនាំ​អាស៊ាន​បូក​បី ក៏បាន​ប្តេជ្ញាចិត្ត​ខ្ពស់​ក្នុង​ការរក្សា​សន្តិភាព និង​ស្ថិរភាព​នៅក្នុង​តំបន់ តាមរយៈ​យន្តការ​ដោះស្រាយ បញ្ហា​នានា ដោយ​សន្តិវិធី​, ការអនុលោម​តាម​គោលការណ៍ នៃ​ច្បាប់​អន្តរជាតិ និង​ការរំសាយ​អាវុធ​នុយ​ក្លេ​អែរ នៅ​ឧបទ្វីប​កូរ៉េ ។ ស្របគ្នា​នេះដែរ​, ថ្នាក់ដឹកនាំ​អាស៊ាន​បូល​បី បាន​ឯកភាពគ្នា ចំពោះ​ការបង្កើត “​ក្រុមការងារ​អាស៊ាន​បូក​បី ដោះស្រាយ​ជំងឺ​រាតត្បាត​”, “​ការ​ស្តុក​បម្រុង​បរិក្ខារ​វេជ្ជសាស្ត្រ​ចាំបាច់​នានា​របស់​អាស៊ាន​បូក​បី សម្រាប់​តម្រូវការ​បន្ទា​ន់​ផ្នែក​សុខភាព​សាធារណៈ​” និង​ការដាក់ចេញ​នូវ “​សេចក្តីប្រកាស​របស់​ថ្នាក់ដឹកនាំ​អាស៊ាន​បូក​បី ស្តីពី​ការពង្រឹង​កិច្ចសហប្រតិបត្តិការ​អា​ស៊ាន​បូក​បី​សម្រាប់​ភាពរឹងមាំ​សេដ្ឋកិច្ច និង​ហិរញ្ញវត្ថុ ក្នុងពេល​ប្រឈម ទៅនឹង​បញ្ហា​កើតមានឡើង​” ដើម្បី​បង្កើន​សមត្ថភាព និង​ពង្រឹង​សហប្រតិបត្តិ​- ការជំរុញ​ដល់​ការឆ្លើយតប​ទៅនឹង​វិបត្តិ​សេដ្ឋកិច្ច​-​ហិរញ្ញវត្ថុ និង​បញ្ហា​ប្រឈម​ដទៃទៀត នៅក្នុង​តំបន់ និង​សកល នាពេល​អនាគត ៕​

ទីតាំងផ្សាយពាណិជ្ជកម្ម

- Advertisment -

Most Popular

សម្តេច​តេ​ជោ ហ៊ុន សែន អញ្...

​ដោយៈ​តារា​រិ​ទ្ធ​-​គ...

យុទ្ធនាការ​ «​ស្អាត​ជា​ទម...

​ដោយៈ​រ៉ា​ម៉ន​/​ភ្នំពេញៈ​...

ករណី​ពុល​ស្រា​នៅក្នុង​ស្រ...

ដោយៈ​ទេ​ពក​ង្រី​/​កំពង់ឆ្...

ស្ត្រី​មាន​ផ្ទៃពោះ​ម្នាក់...

​ដោយៈ​ចាន់តូ​/​ភ្នំពេញៈ ប...