Home ព័ត៌មានអន្តរជាតិ ក្រុង​តូ​ក្យូ...

ក្រុង​តូ​ក្យូ និង​កូរ៉េខាងត្បូង​កំពុង​ជួប​កំណើន​នៃ​ការ​ឆ្លងកូវី​ដ​១៩

ប្រែ​សម្រួលៈ​វាសនា​/​តូ​ក្យូ​៖ ​អាជ្ញាធរ​ក្រុង​តូ​ក្យូ​បានប្រកាស​ការឆ្លង​វីរុស​កូរ៉ូណា​ថ្មី​ចំនួន​៥០០​ករណី​ទៀត​កាលពី​ថ្ងៃ​ពុធ​ទី​១៨​វិច្ឆិកា ជា​ចំនួន​ឆ្លង​ប្រចាំថ្ងៃ​ខ្ពស់បំផុត​នៅក្នុង​រដ្ឋធានី​ជប៉ុន​នេះ ចាប់តាំងពី​ជំងឺ​​ឆ្លង​សកល​នេះ​បាន​ចាប់ផ្តើម​វា​ប្រហារ​ជប៉ុន​មក​។​

​រដ្ឋាភិបាល​ក្រុង​តូ​ក្យូ​បាន​និយាយថា មាន​ការឆ្លង​ថ្មី​៤៩៣​ករណី ដោយ​កើន​លើស​ចំនួន​ឆ្លង​ខ្ពស់​បំផុត​ពី​មុន​៤៧២​ករណី​កាលពី​ថ្ងៃ​១​សីហា ក្នុងអំឡុង​ជប៉ុន​ជួប​ការឆ្លង​ខ្ពស់​បំផុត​នៅ​រលក​ទី​១​។​

​ការឆ្លង​ខ្ពស់បំផុត​នេះ​កើតឡើង​ចំ​ពេល​ប្រធាន​គណៈកម្មាធិការ​អូ​ឡាំ​ពិ​ច​អន្តរជាតិ ទើប​មក​ធ្វើ​ទស្សនកិច្ច​នៅ​ជប៉ុន​ដើម្បី​ពិភាក្សា​ជាមួយ​មន្ត្រី​អូ​ឡាំ​ពិ​ច​ជប៉ុន​អំពី​របៀប​ដែល​ជប៉ុន​នឹង​រៀបចំ​ការប្រកួត​​កីឡា​អូ​ឡាំ​ពិ​ច​យ៉ាងណា​ដើម្បី​កុំអោយ​ឆ្លងកូវី​ដ​១៩​។​

​ដោយសារ​ផ្ទុះ​ជំងឺ​កូវី​ដ​១៩​នេះ ជប៉ុន​បាន​ពន្យារពេល​ការរៀបចំ​ប្រកួត​អូ​ឡាំ​ពិ​ច​រហូតដល់​ខែ​កក្កដា​ឆ្នាំ​ក្រោយ​។​

​ជប៉ុន​ក៏​ជួប​កំណើន​ការ​ឆ្លងកូវី​ដ​១៩​នៅ​ទូទាំង​ប្រទេស​ដែរ​នៅ​ប៉ុន្មាន​សប្តាហ៍​មក​នេះ ហើយ​អ្នកជំនាញការ​បាន​ទទូច​អោយ​ពួក​មន្ត្រី​បង្កើន​វិធានការ​បង្ការ​។​

​ជប៉ុន​មាន​អ្នក​ឆ្លង​វីរុស​កូរ៉ូ​ណាសរុប​១២០.៨១៥​នាក់ និង​១.៩១៣​ស្លាប់​ដោយកូវី​ដ​១៩

​នៅ​កូរ៉េ​ខាងត្បូង​ក្បែរ​ខាង​ឯណេះ​វិញ អាជ្ញាធរ​បាន​រាយការណ៍​កំណើន​ការឆ្លង​ប្រចាំ​ថ្ងៃ​ខ្ពស់បំផុត​ផងដែរ ធៀប​នឹង​ការឆ្លង​នៅ​៣​ខែ​មក​នេះ​នៅ​ពេល​ប្រទេស​នេះ​ត្រៀម​អនុវត្ត​វិធានការ​គម្លាត​សង្គម​​នៅ​មហា​តំបន់​សេ​អ៊ូ​ល​។​

​ទីភ្នាក់ងារ​គ្រប់គ្រង​និង​បង្ការ​ជំងឺ​កូរ៉េ បាន​រាយការណ៍​ករណី​ឆ្លង​ថ្មី​ចំនួន​៣១៣​កាលពី​ថ្ងៃ​ពុធ ដោយ​នាំ​អោយ​ការឆ្លង​សរុប​ក្នុង​ប្រទេស​នេះ​ឡើងដល់​២៩.៣១១​នាក់ និង​៤៩៦​នាក់​ស្លាប់​។​

​វា​ជា​លើកដំបូង​ដែល​ការឆ្លង​ប្រចាំថ្ងៃ​នៅ​កូរ៉េ​ខាងត្បូង​ឡើង​ហួស​៣០០​នាក់ ចាប់តាំងពី​ចុង​ខែ​សីហា​មក​។​

​កូរ៉េខាងត្បូង​កំពុង​ព្យាយាម​ទប់​កំណើន​ការឆ្លង​ចាប់តាំងពី​ខ្លួន​បាន​បន្ធូរបន្ថយ​ច្បាប់​គម្លាត​សង្គម​ដ៏​តឹងរឹង​កាលពី​ខែ​មុន​។​កំណើន​នៃ​ការឆ្លង​ថ្មី​មាន​ពាក់ព័ន្ធ​នឹង​មន្ទីរពេទ្យ ផ្ទះ​មើល​ថែរ​មនុស្ស​ចាស់​​ព្រះវិហារ សាលារៀន ការិយាល័យ​និង​ការជួបជុំ​បែប​លក្ខណៈ​គ្រួសារ​៕

 

ទីតាំងផ្សាយពាណិជ្ជកម្ម

- Advertisment -

Most Popular