Home ព័ត៌មានជាតិ សេដ្ឋកិច្ច ផ្ទៃដី​ស្រូវប...

ផ្ទៃដី​ស្រូវប្រាំង​រង​ផលប៉ះពាល់​ពី​ភ្លៀង​ចុងរដូវ​និង​ព្រែក​គោក​រាក់​ត្រូវបាន​ដោះស្រាយ​

ដោយៈ​ប​.​ខុន​/​ភ្នំពេញៈផ្ទៃដី​បង្កបង្កើនផល​ស្រូវប្រាំង​ជាង​១.០០០​ហិកតា​នៅ​ឃុំ​ខ្សាច់​អណ្តែត​និង​ឃុំ​ពង្រ​ក្នុង​ស្រុក​ឆ្លូង​ខេត្តក្រចេះ​ដែល​ប្រជាកសិករ​មិនទាន់​ធ្វើការ​សាបព្រោះ​បាន​ដោយសារ​ទឹក​លិច​បន្ទាប់ពី​មាន​ភ្លៀង​ច្រើន​នៅ​ចុងរដូវ​និង​ផ្លូវ​លំហូរ​ទឹក​គោក​រាក់​ធ្វើឱ្យ​ទឹក​ស្រក​យឺត​កំពុង​ត្រូវបាន​ដោះស្រាយ​ហើយ​។​នេះ​បើតាម​លោក​យិន​ងួន​កូ​លេនីន​អនុរដ្ឋលេខាធិការ​ក្រសួង​ធនធាន​ទឹកបាន​ប្រាប់​ឱ្យ​រស្មី​កម្ពុជា​នៅ​ព្រឹក​ថ្ងៃទី​១៩​ខែវិច្ឆិកា​នេះ​។​

រូបថតៈផ្ទៃដី​ស្រូវប្រាំង​រង​ផលប៉ះពាល់​ពី​ភ្លៀង​ចុងរដូវ​និង​ព្រែក​គោក​រាក់​ត្រូវបាន​ដោះស្រាយ​

​លោក​យិន​ងួន​កូ​លេនីន​បាន​បញ្ជាក់ថា​ករណី​ទឹក​បឹង​ព្រែក​តា​កុ​ច​ស្រក​យឺត​ធ្វើឱ្យប៉ះពាល់​ដល់​ការដាំដុះ​ស្រូវ​ប្រាំង​នេះ​កាលពី​ថ្ងៃទី​១៨​ក្រុមការងារ​ចម្រុះ​បាន​ចុះ​ពិនិត្យ​ជាក់ស្តែង​ឃើញថា​មកពី​មានការ​គោក​រាក់​ប្រវែង​១.៥០០​ម៉ែត្រ​នៅ​ព្រែក​ទួល​ថ្ងាន​ដែល​ចាំបាច់​ត្រូវ​កាយ​ស្តារ​ឱ្យ​ទឹក​ហូរ​បាន​លឿន​ស្រក​ផុតពី​ដីស្រែ​បាន​ឆាប់​។​ការងារ​កាយ​ស្តារ​នេះ​នឹង​ចាប់ផ្តើម​អនុវត្ត​បន្ទាប់ពី​មានការ​សម្រេច​ពី​លោក​រដ្ឋមន្ត្រី​ក្នុងពេល​ឆាប់ៗ​។​

​តំបន់​ខាងលើនេះ​លោក យិន ងួន​កូ​លេនីន និយាយថា​រាល់​ឆ្នាំ​ដល់​ខែ​នេះ​កសិករ​បាន​ដាំ​ដុះ​រួច​និង​កន្លែង​ខ្លះ​ស្រូវ​ជិត​ទុំ​ទៅហើយ តែ​ឆ្នាំនេះ​ឥឡូវ​មិនទាន់បាន​សាបព្រោះ​ផង​។​

រូបថតៈផ្ទៃដី​ស្រូវប្រាំង​រង​ផលប៉ះពាល់​ពី​ភ្លៀង​ចុងរដូវ​និង​ព្រែក​គោក​រាក់​ត្រូវបាន​ដោះស្រាយ​

​រំលឹក​ឱ្យដឹងថា​កាលពី​ថ្ងៃទី​១៨​ខែវិច្ឆិកា​ក្រុមការងារ​ចម្រុះ​រួមមាន​មន្ត្រី​ក្រសួង ធនធានទឹក​និង​ឧតុនិយម មន្ត្រី​អាជ្ញាធរ​ខេត្តក្រចេះ​និង​ខេត្ត​ត្បូងឃ្មុំ​បាន​ចុះ​ពិនិត្យ ស្ថានភាព​លំហូរ​ទឹក​នៅ​ទីតាំង​សំណង់​ស្ទាក់​ទឹក​ព្រែក​តា​កុ​ច ពិនិត្យ​ទីតាំង​ផ្ទៃ ដី​បង្កបង្កើនផល​កំពុង​លិច​ទឹក​នៅ​ឃុំ​ខ្សាច់​អណ្តែត និង​ឃុំ​ពង្រ ក្នុងស្រុក​ឆ្លូង​ខេត្តក្រចេះ ពិនិត្យ​លំហូរ​នៃ​ផ្លូវទឹក​នៅតាម​បណ្តោយ​ព្រែក​ត្រង់ចំណុច​ព្រែក​កង្ហារ​និង​ចំណុច​ស្ពាន​ព្រែកជីក ក្រោយ ពី​ចុះ​ពិនិត្យ​ស្ថានភាព​ជាក់ស្តែង និង​មានការ​ជួបប្រជុំ​ពិភាក្សា​រួច​ក្រុមការងារ​បាន​ឯកភាព​ដូចតទៅៈ​១-​រក្សាទុក​លំហូរ​នៃ​ផ្លូវទឹក​នៅ​សំណង់​ស្ទាក់​ទឹក​ព្រែក​តា​កុ​ច​នៅ​ដដែល​ដោយ​មិនមាន​បញ្ហា​ស្ទះ​ផ្លូវទឹក​លិច​ផ្ទៃដី​បង្កបង្កើនផល​នៅ​ខេត្តក្រចេះ​នោះទេ​,២-​ការត្រួតពិនិត្យ​លំហូរ​ផ្លូវទឹក​នៅតាម​ផ្លូវទឹក​មួ​យ​ចំនួន​ពិនិត្យឃើញថា​មាន​ទី​តាំ​ព្រែក​ទួល​ថ្ងាន់​គោក​រាក់​បន្តិច​ជាហេតុ​ស្ទះផ្លូវ​ទឹក​និង​ទី​៣-​ក្រុមការងារ​ខាង​ខេត្តក្រចេះ​សំណូមពរ​ឲ្យ​មានការ​ស្តារ​ព្រែក​ទួល​ថ្ងាន មាន​ប្រវែង​១.៥០០​ម៉ែត្រ ដើម្បី​ព​ន្លឿ​ន​ចរន្តទឹក​ហូរ មាន​ទីតាំង នៅ​ឃុំ​ជំនីក ស្រុក​ក្រូចឆ្មារ ខេត្ត​ត្បូងឃ្មុំ ៕​

រូបថតៈផ្ទៃដី​ស្រូវប្រាំង​រង​ផលប៉ះពាល់​ពី​ភ្លៀង​ចុងរដូវ​និង​ព្រែក​គោក​រាក់​ត្រូវបាន​ដោះស្រាយ​

ទីតាំងផ្សាយពាណិជ្ជកម្ម

- Advertisment -

Most Popular