Home ព័ត៌មានជាតិ សេដ្ឋកិច្ច ដីព្រៃ​ជាង​២០...

ដីព្រៃ​ជាង​២០០​ហិកតា​នៅ​ឃុំ​ឫស្សី​ជ្រុំ រង​ការទន្ទ្រាន​យក​ធ្វើ​ជាកម្មសិទ្ធិឯកជន​

ដោយ​: សុ​ផានី​តា / កោះកុង​: ដីព្រៃ​ឈើ​ជាង​២០០​ហិកតា​នៅក្នុង​ឃុំ​ឫស្សី​ជ្រុំ ស្រុក​ថ្មបាំង បាន​រង​ការកាប់បំផ្លាញ​ទន្ទ្រាន​យក​ដី​ធ្វើជា​កម្មសិទ្ធិឯកជន ប៉ុន្តែ​ត្រូវបាន​អាជ្ញាធរ​ស្រុក សមត្ថកិច្ច​ជំនាញ​ស្រាវជ្រាវ​ចុះបង្ក្រាប ដោយ​ដាក់​កម្លាំង​តាមឃ្លាំមើល​ចាប់​មុខសញ្ញា​។​

​ដីព្រៃ​ក្នុង​តំបន់ការពារធម្មជាតិ​ដែល​នៅ​មិន​ឆ្ងាយ​ពី​ទីរួមស្រុក​ថ្មបាំង​ប្រមាណ​ជា​៦​គីឡូម៉ែត្រ ស្ថិតនៅ​ចំណុច​អូរ​ចម្រូង និង​ច្រោះ​ត្រ​ឡោ​ច ក្នុងភូមិ​ត្រពាំង​ត្រាវ ត្រូវបាន​ក្រុម​ជន​មិន​ស្គាល់មុខ​លួច​កាប់​ជាង​ហូរហែ​ជា​២០០​ហិកតា​។​

​លោក ផល សុផាន់​ណា អភិបាលរង​ស្រុក​ថ្មបាំង បានឱ្យដឹង​នៅ​ថ្ងៃទី​២១ ខែវិច្ឆិកា ២០២០​នេះ​ថា តាម​ការពិនិត្យ​ជាក់ស្តែង និង​ចុះ​ដក​បង្គោល​កំណត់​ដែល​ក្រុម​ជនខិលខូច​លួច​កាប់​មាន​ជា​រូបភាព​កាប់​យក​ឈើ និង​ទន្ទ្រាន​យក​ដី រួច​លួច​ដាំ​ណាំ​បន្លំ​ភ្នែក​អាជ្ញាធរ​។ ហើយ​សកម្មភាព​នេះ ធ្វើឡើង​ក្រោយពី​ព័ត៌មាន​ថា​តំបន់​នោះ​នឹងត្រូវ​កាត់​ឆ្វៀល​ចេញពី​តំបន់​ការពារ ទើប​មាន​ក្រុម​ពលរដ្ឋ​ខិលខូច​មួយចំនួន​នាំគ្នា​ទៅ​ប្រព្រឹត្ត​ទង្វើ​ខុសច្បាប់​យ៉ាង​ដូច្នេះ​។​

​អភិបាលរង​ស្រុក​ថ្មបាំង បន្ថែមថា មែនទែនទៅ តំបន់​ជា​ការពារ​ធម្មជាតិ​ដែល​រង​ការទន្ទ្រាន គឺ​គ្មាន​យន្តការ​កំណត់​ណាមួយ​ដែល​នឹងត្រូវ​ស្នើសុំ​កាត់​ចេញពី​អនុក្រឹត្យ​អភិរក្ស​នោះទេ តំបន់​ស្នើសុំ​គោលការណ៍​គឺ​ស្រុក​ធ្វើ​របាយការណ៍​ជាក់លាក់​ទៅ​រដ្ឋបាលខេត្ត​រួច​អស់ហើយ​។ បន្ទាប់ពី​ចុះ​ដក​បង្គោល ធ្វើ​កំណត់ហេតុ​ពី​ទីតាំង​កើតហេតុ​ខាងលើ លោក​បានដាក់​កម្លាំង​ជំនាញ​តាមដាន​ឃ្លាំមើល​រកមុខ​សញ្ញា​ដើម្បី​ឃាត់ខ្លួន​កសាង​នីតិវិធី​ទៅ​តុលាការ​។​

​ក្រៅពី​ចំណុច​អូរ​ចម្រូង និង​ច្រោះ​ត្រ​ឡោ​ច ក៏មាន​ការកាប់​ព្រៃឈើ​នៅ​តំបន់​អា​រ៉ែ​ង ដោយ​សមត្ថកិច្ច​អាជ្ញាធរ​ស្រុក​កំពុង​ស្រាវជ្រាវ​មុខសញ្ញា និង​មាន​វិធានការ​។ កន្លងទៅ អាជ្ញាធរ​ស្រុក និង​មន្ទីរជំនាញ ធ្លាប់​អប់រំ​ណែនាំ​ដល់​ប្រជាពលរដ្ឋ​ជារឿយៗ​ពី​ការបញ្ឈប់​ទប់ស្កាត់​លួចលាក់​ទន្ទ្រាន​យក​ដីព្រៃ​រដ្ឋ​ធ្វើជា​កម្មសិទ្ធិ​បន្តទៀត ព្រោះ​ជា​ករណី​ខុសច្បាប់​។​

​មូល​ហេតុដែល​បណ្តាលឱ្យ​កើតមាន​សកម្មភាព​កាប់​ព្រៃ​ដី​ធ្វើជា​កម្មសិទ្ធិ ក៏​ព្រោះតែ​ពលរដ្ឋ ឬ​ឈ្នួ​ញ​ខិត​ខូច​បំផុសបំផុល​ពី​តម្លៃ​ដី​ហក់​ឡើងថ្លៃ ទើប​បញ្ហា​កើត​ឡើងជា​បន្តបន្ទាប់ និង​លំបាក​ទប់ស្កាត់​។​

​ទាក់ទិន​បទល្មើស​ព្រៃឈើ​នេះដែរ រដ្ឋបាល​ខេត្តកោះកុង ធ្លាប់​ប្រកា​សមាន​វិធានការ​ក្តៅ​ផងដែរ ចំពោះ​ជន​ដែល​ប្រព្រឹត្ត​បទល្មើស​ធម្មជាតិ ហើយ​ថែមទាំង​បាន​ហាមប្រាម​ដល់​អ្នកពាក់ព័ន្ធ​ប្រញាប់​ដកខ្លួន​ចេញ ប្រសិនបើ​នៅ​ប្រព្រឹត្ត​នឹង​ចាប់​ឃាត់ខ្លួន​បញ្ចូនទៅ​តុលាការ​អនុវត្ត​នីតិវិធី​។​

​សាលាដំបូង និង​អយ្យការ​អម​សាលាដំបូង​ខេត្តកោះកុង កាលពី​ថ្ងៃទី​១៨ ខែវិច្ឆិកា ២០២០ ថ្មីៗ​នេះ បាន​បង្គាប់​ឱ្យ​ជន​ត្រូវ​ចោទ​ចំនួន ៣ នាក់ ដែលជា​តំណាង​សហគមន៍​ចូល​បំភ្លឺ​នៅ​តុលាការ គឺជា​សំណុំរឿង​ព្រហ្មទណ្ឌ មិនមែនជា​សំណុំរឿង​ពាក់ព័ន្ធ​នឹង​វិវាទកម្ម​សិទ្ធិ​ដីធ្លី​នោះឡើយ​។​

​ប្រជាពលរដ្ឋ​ជាង​១៥០​នាក់​មកពី​ស្រុក​ចំនួន ៣ នៃ​ខេត្ត​នេះ​រួមមាន ស្រុកស្រែ​អំបិល ស្រុក​បទុម​សាគរ និង​ស្រុក​គិរីសាគរ​។ ពួកគេ​តវ៉ា​នេះ គឺ​ដើម្បី​ឃ្លាំមើល​ការចូល​បំភ្លឺ​របស់​តំណាង​ពួកគេ និង​បាន​ស្រែក​តវ៉ា​ថា ពួកគេ​គឺជា​ជនរងគ្រោះ​ដីធ្លី​។​

​សាលាដំបូង និង​អយ្យការ​អម​សាលាដំបូង​ខេត្តកោះកុង​ចុះ​ថ្ងៃទី ១៨ វិច្ឆិកា បានឱ្យដឹងថា អ្នកស្រី ផាវ ញើ​ង អ្នកស្រី សេង លីន និង​អ្នកស្រី ខន ផុន ត្រូវបាន​តំណាង​អយ្យការ​អម​សាលាដំបូង​ខេត្តកោះកុង ធ្វើការ​ចោទប្រកាន់​ពីបទ​ញុះញង់​ឱ្យ​ប្រព្រឹត្ត​អំពើ​បង្កឱ្យមាន​ការ​វឹកវរ​ដល់​សន្តិសុខ​សង្គម និង​បទ​បរិហារកេរ្តិ៍​ជា​សាធារណៈ​ដែលមាន ឈ្មោះ ឆាយ វី ជា​អតីត​តំណាង​របស់​ពួកគាត់ ជាដើម​បណ្តឹងរដ្ឋប្បវេណី​។​

​សាលាដំបូង និង​អយ្យការ​អះអាងថា នៅ​ថ្ងៃទី ១៨ វិច្ឆិកា សាលាដំបូង​បាន​បង្គាប់​ឱ្យ​ជន​ត្រូវ​ចោទ​ទាំង ៣ ចូលខ្លួន​នៅ​ចំពោះមុខ​ចៅក្រម​ស៊ើបសួរ ហើយ​បែរ​ជាមាន​ប្រជាពលរដ្ឋ​ជាច្រើន​រយ​នាក់​ខាងលើ​បានមក​ធ្វើការ​ស្រែក​តវ៉ា​នៅមុខ​សាលាដំបូង សុំឱ្យ​តុលា​ការជួយ​ដោះស្រាយ​រឿង​ទំនាស់​ដីធ្លី​ទៅវិញ​។​

​សាលាដំបូង​ខេត្តកោះកុង​បញ្ជាក់ថា​៖ «​ដើម្បី​ចៀសវាង​ការភាន់ច្រឡំ សាលាដំបូង និង​អយ្យការ សូមបញ្ជាក់​ជូន​សាធារណជន​ថា សំណុំរឿង​ខាងលើនេះ​គឺជា​សំណុំរឿង​ព្រហ្មទណ្ឌ មិនមែនជា​សំណុំរឿង​ពាក់ព័ន្ធ​នឹង​វិវាទកម្ម​សិទ្ធិ​ដីធ្លី​នោះឡើយ​»៕srn

ទីតាំងផ្សាយពាណិជ្ជកម្ម

- Advertisment -

Most Popular

មន្ត្រី​អភិរក្ស​សត្វព្រៃ ...

​ដោយៈ ដេប៉ូ / មណ្ឌលគិរីៈ ...

អាជ្ញាធរ​ខណ្ឌចំការមន និង​...

​ដោយៈ រ៉ា​ម៉ន ភ្នំពេញៈ អា...

​សមត្ថកិច្ច ឲ្យ​ម្ចាស់​ហា...

​ដោយៈ ស​រិ​ទ្ធ / កណ្តាលៈ ...

​ក្រុមការងារ​សុខាភិបាល​ខេ...

ដោយៈ ទេ​ពក​ង្រី / កំពង់ឆ្...