Home ព័ត៌មានជាតិ សង្គម ក្នុង​មួយឆ្នា...

ក្នុង​មួយឆ្នាំៗ សំណល់​ប្លា​ស្ទិ​ក រាប់សិប​តោន ត្រូវបាន​ទប់ស្កាត់ មិនឱ្យ​ហូរ​ចូល បឹង​ទន្លេសាប ក្នុង​តំបន់​ខេត្តសៀមរាប​

ដោយៈ ដេប៉ូ / ភ្នំពេញៈ កាកសំណល់ ដែលជា​សារជាតិ​ប្លា​ស្ទិ​ក គ្រប់​ប្រភេទ ក្នុង​មួយឆ្នាំៗ ប្រមាណ​ជិត ២០០ តោន ត្រូវបាន​ទប់ស្កាត់ និង​ប្រមូល​ចេញ មិនឱ្យ​ហូរ​ចូល បឹង​ទន្លេសាប នៅ​ភូមិសាស្ត្រ ខេត្តសៀមរាប​។​

​ថ្លែង​បញ្ជាក់ នៅក្នុង​ពិធី​ប្រារព្ធ ទិវា​អនាម័យ​បរិស្ថាន​ជាតិ និង​ពិធីបុណ្យ​ទន្លេសាប រដូវ​ទឹកសម្រក ប្រចាំឆ្នាំ​២០២០ លោក នេត្រ ភក្ត្រា មន្ត្រី​នាំពាក្យ និង​ជា​រដ្ឋលេខាធិការ ក្រសួងបរិស្ថាន បានឱ្យដឹង​នៅ​ថ្ងៃទី​២២ ខែវិច្ឆិកា ឆ្នាំ​២០២០​ថាៈ បឹង​ទន្លេសាប ត្រូវបាន​បំពុល ដោយ​ថង់​ប្លា​ស្ទិ​ក ទាំង​សហគមន៍ ដែល​រស់​នៅលើ បឹង​ទន្លេសាប​នេះ​ផង និង​ការហូរ​នាំយក​ប្លា​ស្ទិ​ក ដែល​បងប្អូន​ប្រជាពលរដ្ឋ បោះចោល​គ្មាន​សណ្តាប់ធ្នាប់ តាម​ព្រែក តាម​ស្ទឹង​នានា ចាក់​ចូលមក ក្នុង​បឹង​ទន្លេសាប​ផង​។​

​ទោះបីយ៉ាងណា លោក​រដ្ឋលេខាធិការ បានបញ្ជាក់​ថាៈ សារជាតិ​ប្លា​ស្ទិ​ក គ្រប់​ប្រភេទ ក្នុង​មួយឆ្នាំៗ ប្រមាណ​ជិត ២០០ តោន ត្រូវបាន​ទប់ស្កាត់ និង​ប្រមូល​ចេញ មិនឱ្យ​ហូរ​ចូល បឹង​ទន្លេសាប នៅ​ភូមិសាស្ត្រ ខេត្តសៀមរាប ដែលជា​ផ្នែក​មួយ ចូលរួម​ថែរក្សា​បរិស្ថាន ដើម្បី​និរន្តរភាព​ទី​ស្អាត មាន​មេត្រីភាព​បរិស្ថាន ដើម្បី​ភាព​សុ​ខុ​ដុមរ​មនា​បរិស្ថាន និង​កា​រស់នៅ ដោយ​ចីរភាព​។​

​ជាមួយគ្នានេះ លោក នេត្រ ភក្ត្រា បានលើកឡើង​ថាៈ ចំពោះ​ការអប់រំ និង​ផ្សព្វផ្សាយ លើ​ផលប៉ះពាល់ ពី​សំណល់​ប្លា​ស្ទិ​ក ពិត​ជាមាន​សារៈសំខាន់ និង​ត្រូវធ្វើ​ជាប្រចាំ ហើយ​ជាមួយគ្នានេះ ត្រូវមាន​ការចូលរួម អនុវត្ត​ជាប្រចាំ រួម​នឹង​បង្កើត​គំនិត​ផ្តួចផ្តើម ផ្សេងៗ ដើម្បី​ប្រសិទ្ធភាព នៃ​ការកាត់បន្ថយ ការបំពុល​ដោយ​ប្លា​ស្ទិ​ក ក្នុង​បឹង​ទន្លេសាប​។​

​បើតាម​ការឱ្យ​ដឹង​រប​ស់ រដ្ឋលេខាធិការ ក្រសួងបរិស្ថាន ស្ថានភាព​គ្រប់គ្រង​សំរាម សំណល់​រឹង ទីប្រជុំជន របស់​ខេត្តសៀមរាប សម្រាប់​ឆ្នាំ​២០២០​នេះ គឺ​បរិមាណ​បង្កើត​សំណល់ ប្រមាណ ៥០៦ តោន ក្នុង​មួយថ្ងៃ ហើយ​បរិមាណ​កែច្នៃ​ឡើងវិញ មាន​ប្រមាណ ១០៣ តោន ក្នុង​មួយថ្ងៃ (​អាជីវករ​ប្រមូល​ទិញ​អេតចាយ មាន​ចំនួន ៤៩ ទីតាំង​) បរិមាណ​សំណល់ ប្រមូល​យកទៅដាក់ ទីលាន​ចាក់សំរាម ប្រមាណ ២៤១ តោន ក្នុង​មួយថ្ងៃ ហើយ​បរិមាណ​សំណល់ ដែល​បោះចោល ដោយ​ខុសច្បាប់ ប្រមាណ ១៦២ តោន ក្នុង​មួយថ្ងៃ ដែល​បាន​ដុតចោល បោះចោល​តាម​ដងផ្លូវ និង​ប្រឡាយ​សាធារណៈ​៕/V

ទីតាំងផ្សាយពាណិជ្ជកម្ម

- Advertisment -

Most Popular