Home ព័ត៌មានជាតិ សន្តិសុខ រថយន្ត​ដឹកទំន...

រថយន្ត​ដឹកទំនិញ​បុក​ឡាន​ដឹក​កម្មករ ជ្រុល​បុក​ម៉ូតូ​ថែមទៀត​, ស្លាប់​ម្នាក់ និង របួស​៧​នាក់​

ដោយ​: ស​រិ​ទ្ធ / កណ្តាល​: រថយន្ត​ដឹកទំនិញ​មួយគ្រឿង បាន​បុក​ពីក្រោយ​រថយន្ត​ដឹក​កម្មករ​ដែល​កំពុង​ចត ហើយ​ជ្រុល​បុក​ម៉ូតូ​មួយគ្រឿង​ទៀត បណ្តាលអោយ​មនុស្ស​ម្នាក់​ស្លាប់​ភ្លាមៗ​នៅ​កន្លែងកើតហេតុ និង ៧​នាក់​ទៀត​រងរបួស ។ ករណីនេះ សមត្ថកិច្ច បាន​ឃាត់ខ្លួន​ជនបង្ក ភ្លាមៗ ។​

​គ្រោះថ្នាក់​ចរាចរណ៍​នេះ កើតឡើង​កាលពី​ព្រឹក​ថ្ងៃទី​២៣ ខែវិច្ឆិកា ឆ្នាំ​២០២០ នៅ​ចំណុច​ភូមិ​កំពង់​ដំរី ឃុំ​ព្រែ​កតា​មាក់ ស្រុក​ខ្សាច់កណ្ដាល ខេត្តកណ្ដាល ។​

​សមត្ថកិច្ច បញ្ជាក់​ប្រាប់ថា រថយន្ត​ម៉ាក Hyundai ធុន​ដឹកទំនិញ​ធំ ពណ៌​ស ផ្លាកលេខ​ភ្នំពេញ 3B-0748 បើកបរ​ដោយ​ឈ្មោះ ឈឿន វ៉ាន់ឌី ភេទ​ប្រុស អាយុ​២៥​ឆ្នាំ រស់នៅ​ភូមិ​វាល​កណ្តៀង ឃុំ​ជប់ ខេត្ត​ត្បូងឃ្មុំ រួម​ដំណើរ​២​នាក់ បើកបរ​ក្នុងទិសដៅ​ពី​ជើង​មក​ត្បូង បាន​បុក​ពីក្រោយ​រថយន្ត​ឈប់​នៅ​ចិញ្ចើមផ្លូវ​រង់ចាំ​ដាក់​កម្មករ​រោងចក្រ​ទៅធ្វើ​ការ រួម​ដំណើរ​មាន​២៨​នាក់ ។​

​ក្រោយមក រថយន្ត​បាន​រេ​ចង្កូត​មក​បុក​ម៉ូតូ​មួយគ្រឿង​ទៀត​ដែល​បើក​បញ្ច្រាសទិស​គ្នា​ជាមួយ ម៉ូតូ​ម៉ាក Honda Cub 50 ពណ៌ ខ្មៅ ផ្លាកលេខ ភ្នំពេញ 1M-5937 បើកបរ​ដោយ​ឈ្មោះ ជាន ស៊ី​ដែន ភេទ​ប្រុស អាយុ​២០​ឆ្នាំ ។​

​សមត្ថកិច្ច បន្ថែមថា ករណីនេះ​បណ្ដាលឱ្យ​ស្លាប់​ម្នាក់ នៅ​កន្លែងកើតហេតុ​និង​របួសធ្ងន់​៧​នាក់ ត្រូវ​បញ្ជូនទៅ​មន្ទីរពេទ្យ​ស្រុក​ខ្សាច់កណ្ដាល ។​

​មូលហេតុ​នៃ​គ្រោះថ្នាក់​ចរាចរណ៍ នេះ គឺ ដោយសារ​អ្នកបើកបរ​រថយន្ត​បង្ក​បើក​ល្បឿន​វ៉ា​ជែង​មិន​ប្រកាន់​ស្ដាំ​ខ្វះ​ការប្រុងប្រយ័ត្ន ៕

ទីតាំងផ្សាយពាណិជ្ជកម្ម

- Advertisment -

Most Popular