Home ព័ត៌មានជាតិ សន្តិសុខ ប្រកាស​សាលក្រ...

ប្រកាស​សាលក្រម សំណុំរឿង​ប្លន់​ប្រា​ក់ជាង ២ លាន​ដុល្លារ នៅ​ថ្ងៃទី ១៧ ធ្នូ ខាងមុខនេះ​

ដោយៈ ស​រិ​ទ្ធ / ភ្នំពេញៈ សំណុំរឿង​ប្លន់​ប្រាក់ ២​លាន ៤​សែន​ដុល្លារ ក្នុងចំណោម​ប្រាក់​ចំនួន ៥ លាន​ដុល្លារ ដែល​បើក​ចេញពី​ធនាគារ CIMB កាលពី​ឆ្នាំ​២០១៩ កន្លងទៅ បាន​ត្រូវ​លើក​យកមក បើកសវនាការ ជំនុំជម្រះ នៅ​ព្រឹក​ថ្ងៃទី ២៣ ខែវិច្ឆិកា ឆ្នាំ​២០២០ នេះ​។​

​ជនជាប់ចោទ ក្នុង​សំណុំ​រឿងនេះ មាន ៧ នាក់​គឺៈ ទី​១. ឈ្មោះ វ៉ា សុខ អាយុ​៣៧​ឆ្នាំ ជា​អ្នកបើកបរ រថយន្ត​ដឹក​ប្រាក់ ចេញពី​ធនាគារ និង​ជា​អតីត​ចោរប្លន់ ដែល​ទើប​ចេញពី​ពន្ធនាគារ , ទី​២. ឈ្មោះ មាស សំណាង អាយុ​៣៨​ឆ្នាំ ជា​អតីត​ចោរប្លន់ ដែល​ជាប់ពន្ធនាគារ ៨ ឆ្នាំ ទើប​ចេញពី​គុក ទី​៣.​ឈ្មោះ អៀម សំអន អាយុ​៣៧​ឆ្នាំ ជា​អតីត​ចោរប្លន់ ទើប​ចេញពី​ពន្ធនាគារ និង​ជា​អង្គរក្ស , ទី​៤.​ឈ្មោះ វ៉ា ស្រ៊ី​ម ភេទ​ស្រី អាយុ​៣១​ឆ្នាំ , ទី​៥.​ឈ្មោះ លី អ៊ិន ជា​នគរបាល ចរាចរណ៍​ផ្លូវគោក រាជធានី​ភ្នំពេញ , ទី​៦.​ឈ្មោះ លឹម រតនៈ ភេទ​ប្រុស និង​ទី​៧.​ឈ្មោះ លឹម រតនា ភេទ​ប្រុស​។​

​តុលាការ បាន​ចោទប្រកាន់ ក្រុម​ជនជាប់ចោទ ទាំងអស់នេះ ពីបទ លួច​មាន​ស្ថាន​ទម្ងន់ទោស បទ​សមគំនិត​លួច និង​បទ​ទទួលផល​ចោរកម្ម ប្រព្រឹត្ត​កាលពី​ថ្ងៃទី ១៦ ខែ​កក្ដ​ដា ឆ្នាំ​២០១៩ នៅក្នុង​ខណ្ឌចំការមន រាជធានី​ភ្នំពេញ ។​

​ក្នុង​សវនាការ ជនជាប់ចោទ លី អ៊ិន មន្ត្រីនគរបាល​ចរាច​រណ៍ ដែល​ត្រូវបាន​លប់ឈ្មោះ​ចេញ ពី​ក្របខណ្ឌ​នគរបាល បាន​សារភាពថាៈ នៅ​ព្រលប់ ថ្ងៃទី ១៦ ខែកក្កដា ឆ្នាំ​២០១៩ ប្អូនធម៌​ស្រី ឈ្មោះ វ៉ា ស្រ៊ី​ម បាន​ជិះ​រថយន្ត យកប្រាក់​ចំនួន ៩០ ម៉ឺន​ដុល្លារ មក​ផ្ញើ ដោយ​ប្រាប់ថា ជា​ប្រាក់ របស់​ឈ្មោះ វ៉ា សុខ យកមក​ផ្ញើទុក​។ បន្ទាប់មក ខ្លួន​បាន​យកប្រាក់ ទៅ​ទុក​នៅក្នុង​បន្ទប់ដេក ហើយក៏​បានធ្វើ​ដំណើរ ទៅ​ប្រទេស​ថៃ ដើម្បី​ព្យាបាល​ជំងឺ​។ លុះដល់​ថ្ងៃទី ២២ ខែកក្កដា ទើប​មេបញ្ជាការ ទូរស័ព្ទ​អោយ​ត្រឡប់មកវិញ ដើម្បី​ដោះស្រាយ បញ្ហា​លុយ​បញ្ញើ​នោះ​។ នៅ​ថ្ងៃទី ២៣ ខែកក្កដា ទើប​ខ្លួន​ត្រឡប់មកវិញ ក៏ត្រូវ​សមត្ថកិច្ច​ចាប់ខ្លួន និង​បាន​ដកហូត​លុយ ទៅវិញ ចំនួន ៨២៩.០០០ ដុល្លារ​អាមេរិក​។​

​ក្រោយ​ការសួរដេញដោល ក្នុង​សវនាការ​រួចហើយ តុលាការ បានកំណត់​យក​ថ្ងៃទី ១៧ ខែធ្នូ ឆ្នាំ​២០២០ ខាងមុខ ដើម្បី​ប្រកាស​សាលក្រម សំណុំ​រឿងនេះ ៕​PC

ទីតាំងផ្សាយពាណិជ្ជកម្ម

- Advertisment -

Most Popular