សូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

ដោយៈ ម៉េង​ឆៃ​/ ភ្នំពេញៈ ទិវា​អនាម័យ​បរិស្ថាន​ជាតិ ថ្ងៃ​២៣​វិច្ឆិកា និង​ពិធីបុណ្យ​ទន្លេសាប រដូវ​ទឹកសម្រក ត្រូវបាន​ប្រារព្ធ​ឡើង ក្រោម​ប្រធានបទ “​អនាម័យ​បរិស្ថាន​ល្អ សុខភាព​សហគមន៍​ល្អ​”​។ ពិធី​ជួបជុំ​នេះ បាន​ប្រារព្ធ​ធ្វើឡើង កាលពី​ថ្ងៃទី​២២ ខែវិច្ឆិកា ឆ្នាំ​២០២០​នៅ​ឃុំ​កំពង់​ឃ្លាំង​ស្រុក​សូទ្រនិគម​ខេត្តសៀមរាប​ដោយមាន​ប្រជាពលរដ្ឋ​ចូលរួម​កម្មវិធី​និង​ធ្វើ​សកម្មភាព​សម្អាត​តាម​មុខផ្ទះ​រៀងៗ​ខ្លួន​។​

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

​ការ​ប្រារព្ធ​ទិវា​អនាម័យ​បរិស្ថាន​ជាតិ និង​ពិធីបុណ្យ​ទន្លេសាប​រដូវ​ទឹកសម្រក ត្រូវ​ក្រសួងបរិស្ថាន រួមទាំង​ស្ថាប័ន​ពាក់ព័ន្ធ ពិសេស​អាជ្ញាធរខេត្ត​ជាប់​បឹង​ទន្លេសាប ប្រារព្ធ​ឡើងជា​រៀងរាល់ឆ្នាំ​ដើម្បី​បំផុស​ចលនា​ឲ្យ​ពលរដ្ឋ​បញ្ឈប់​ចោល​សំរាម​ក្នុង​ទន្លេសាប និង​ឈប់​ឲ្យ​បឹង​ទន្លេសាប​ទទួលរង​នូវ​ការបំពុល​ដោយ​សំរាម ជាពិសេស​សំណល់​ប្លា​ស្ទិ​ក​តទៅទៀត​។

ការ​ប្រារព្ធ​កម្មវិធី​នេះ ក៏​ជាការ​ចាប់ផ្តើម​បើក​យុទ្ធនាការ​ប្រមូលយក​សំរាម​ប្លា​ស្ទិ​កនា​រដូវ​ទឹកសម្រក​បឹង​ទន្លេសាប ឆ្នាំ​២០២០ ដែល​នឹងមាន​ប្រជា​សហគមន៍ ចូលរួម​ជិត ៥​ពាន់​នាក់ នៅតាម​សហគមន៍​ចំនួន​ប្រាំ ជាប់​បឹង​ទន្លេសាប និង​ដងស្ទឹង​សៀមរាប ផ្នែក​ខាងក្រោម​។ សកម្មភាព​ប្រមូលយក​សំរាម​ប្លា​ស្ទិ​ក​ចេញពី​បឹង​ទន្លេសាប​នេះ មាន​រយៈពេល ៤​ថ្ងៃ ដោយ​នឹង​បញ្ចប់​នៅ​ថ្ងៃទី​២៨ ខែវិច្ឆិកា​ខាងមុខ​។​

​ក្រសួងបរិស្ថាន បានប្រកាសថា សំណល់​ប្លា​ស្ទិ​កជាង ៤.០០០​កា​រ៉ុង ទម្ងន់​ប្រមាណ​ជិត ២០០​តោន ត្រូវបាន​ប្រមូល​ចេញពី​ទន្លេសាប ក្នុងភូមិ​សាស្ត្រ​ខេត្តសៀមរាប កាលពី​ឆ្នាំ​២០១៩ កន្លងទៅ ហើយ​នៅ​ឆ្នាំ​២០២០​នេះ សំណល់​ប្លា​ស្ទិ​ក ប្រមាណ​ជាង ៥.០០០​ថង់ ស្មើ​ប្រមាណ​ជិត ២៥០ តោន ត្រូវបាន​ប្រមូល​យកទៅ​កែច្នៃ ធ្វើជា​ឥដ្ឋ​បរិស្ថាន​។

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

​ក្រសួងបរិស្ថាន ក៏បាន​បង្ហាញថា ក្នុង​មួយឆ្នាំៗ កម្ពុជា បាន​បង្កើត​សំរាម​ប្រមាណ ៤​លាន​តោន ក្នុងនោះ ៦៥​ភាគរយ ជា​សំណល់​សិរ​រី​រា​ង្គ ប្រមាណ ២០​ភាគរយ ជា​សំណល់​ប្លា​ស្ទិ​ក ហើយ​នៅ​សេសសល់​ជា​សំណល់​រឹង និង​សំណល់​ផ្សេងៗ​ទៀត​។ ក្នុងចំណោម​សំរាម​ទាំងអស់នោះ មាន​ត្រឹមតែ​ប្រមាណ ៥១​ភាគ​គរ​យ ប៉ុ​ណ្ណោ​ដែល​ត្រូវបាន​យកទៅ​ចាក់​នៅ​ទីលាន​ចាក់សំរាម ក្រៅ​នោះ ត្រូវគេ​បោះចោល​យ៉ាង​អនាធិបតេយ្យ​តាម​ដងផ្លូវ ក្នុង​ប្រភពទឹក និង​ខ្លះទៀត ត្រូវបាន​ដុតចោល ជាដើម​។

​ក្រសួងបរិស្ថាន បាន​អំពាវនាវ​ដល់​ប្រជា​សហគមន៍ ពិសេស​អ្នករស់នៅ​លើ​បឹង​ទន្លេសាប ទាំង​នៅក្នុង​ភូមិសាស្ត្រ​ខេត្តសៀមរាប និង​ខេត្ត​ដទៃទៀត រួមមាន កំពង់ធំ កំពង់ឆ្នាំង ពោធិ៍សាត់ និង​បាត់ដំបង សូម​ចូលរួម​សម្អាត​បរិស្ថាន ដោយ​កាត់បន្ថយ​ការប្រើប្រាស់​ប្លា​ស្ទិ​ក សំដៅ​ទប់ស្កាត់​ការបំពុល​ប្រព័ន្ធ​អេកូឡូស៊ី និង​ជីវៈចម្រុះ នៅ​បឹង​ទន្លេសាប​។

​បឹង​ទន្លេសាប ដែល​ពិភពលោក ទទួលស្គាល់ថា សម្បូរ​ត្រី​ច្រើនជាងគេ និង​មាន​ប្រព័ន្ធ​អេកូឡូស៊ី ដែល​ចាំបាច់ ត្រូវតែ​ទប់ស្កាត់ កុំ​ឲ្យ​មានការ​បំពុល​ដោយ​ប្លា​ស្ទិ​ក រក្សា​គុណភាព​ទឹក​ឲ្យ​បានល្អ សោភ័ណភាព​ស្រស់ស្អាត និង​អាច​ទាក់ទាញ​ភ្ញៀវទេសចរ កាន់តែច្រើន​ផងដែរ​។​

​ដំបូង គេ​គួរតែ​លុបបំបាត់​សហគមន៍ អ្នករស់នៅ​លើទឹក ក្នុង​ទន្លេ មិន​ថា នៅ​បឹង​ទន្លេសាប​ទេ នៅតាម​ដង​ទន្លេមេគង្គ ក៏ត្រូវ​លែង​ឲ្យ​មាន​អ្នករស់នៅ​លើ​បែ​ត្រី ផ្ទះទឹក​បណ្តែត​ក្បូន​។ នោះ​ជា​កត្តា​ចម្បង ក្នុងការ​កាត់បន្ថយ​កាកសំណល់ សំរាម និង​ថង់​ប្លា​ស្ទិ​ក ក្នុង​ទឹក​។​

​ចំណុច​មួយទៀត អ្នករស់នៅ​ជាប់​ដង​ទន្លេ ក៏ត្រូវ​ចូលរួម តាមរយៈ​ការមិន​បោះចោល​សំរាម កាកសំណល់ ទាំង​រឹង និង​ទាំង​រាវ ចូលក្នុង​ទឹកទន្លេ​ឡើយ​។ គេ​ត្រូវមាន​ធុងសំរាម និង​កន្លែង​ទុកដាក់​សំរាម កាកសំណល់ ពិសេស​ថង់​ប្លា​ស្ទិ​ក​ឲ្យ​បាន​ត្រឹមត្រូវ នៅលើ​គោក កន្លែង​សមគួរ​ណាមួយ ដែល​អាច​ឲ្យ​អ្នកប្រមូល​សំរាម ដឹកជញ្ជូន​កាកសំណល់​ទាំងនោះ យកទៅ​បោះចោល​នៅ​ទីលាន​ចាក់សំរាម​។​

​កន្លងមក មាន​អ្នកយក​សំរាម កាកសំណល់ បោះចោល​ចូលក្នុង​ទន្លេ ក៏ត្រូវ​តែ​បញ្ឈប់​សកម្មភាព​ខុសឆ្គង​នេះ ហើយ​ចូលរួម​ថែរក្សា​ទន្លេ​របស់​យើង​ឡើងវិញ​។​

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

​ប្រជា​សហគមន៍ ពិសេស​អាជ្ញាធរ​ភូមិ​ឃុំ ដើរតួនាទី​សំខាន់ ក្នុងការ​ទប់ស្កាត់ និង​កាត់បន្ថយ​កាកសំណល់ សំរាម ពិសេស​ប្លា​ស្ទិ​ក ដែលមាន​ប្រអប់​ជ័រ កែវ​ជ័រ ដប​ទឹក​សុទ្ធ និង​ថង់​ប្លា​ស្ទិ​ក មិន​ឲ្យ​ចូលក្នុង​ទន្លេ​។ នោះ​គឺ​ប្រជា​សហគមន៍ ត្រូវ​ចូលរួម ដោយ​ត្រឹមតែ​កុំ​បោះចោល​កាកសំណល់ សំរាម ចូលក្នុង​ទន្លេ បើ​ថា មិនបាន​ចូលរួម​ជួយ​ស្រង់​យក​សំរាម កាកសំណល់​ទាំងនោះ ចេញពី​ទន្លេ​ទេ​។ រីឯ​អាជ្ញាធរ​ភូមិ​ឃុំ​សង្កាត់ នៅ​មូលដ្ឋាន សូម​ចូលរួម​អប់រំ ផ្សព្វផ្សាយ ត្រួតពិនិត្យ ហើយ​ទប់ស្កាត់ ដោយ​ណែនាំ​ម្តង​ជា​ពីរដង​ដល់​អ្នក​ដែល​បោះចោល​សំរាម កាកសំណល់ ទៅក្នុង​ទន្លេ​។ បើ​នៅតែ​មិន​ស្តាប់ អាជ្ញាធរ​ភូមិ​ឃុំ​សង្កាត់ ចងក្រង​របាយការណ៍ បញ្ជូនទៅ​ថ្នាក់លើ ដែលមាន​សមត្ថកិច្ច ដើម្បី​ចាត់វិធានការ​ជនល្មើស​នោះ តាមច្បាប់​។​

​ម្យ៉ាងទៀត ទាំង​ក្រសួងបរិស្ថាន ក្រសួង​ស្ថាប័ន​ពាក់ព័ន្ធ ពិសេស​អាជ្ញាធរ​ភូមិ​ឃុំ​សង្កាត់ នៅ​មូលដ្ឋាន ត្រូវតែ​បង្កើត​ទីលាន​ចាក់សំរាម ឬក៏​មាន​ម៉ាស៊ីន​ដុត​សំរាម​តាម​ក្បួន​បច្ចេកទេស ដូចដែល​ក្រសួងបរិស្ថាន បាន​អនុវត្ត​កន្លងមក ឲ្យ​បាន​នៅតាម​មូលដ្ឋាន​ទូទាំងប្រទេស យ៉ាង​ណាស់ ១​កន្លែង ឬក៏​មាន​ម៉ាស៊ីន​នោះ ១ ក្នុង ១​ភូមិ ព្រោះថា សព្វថ្ងៃ វិបត្តិ​សំរាម បានកើត​ឡើងដល់​ភូមិ​ឃុំ មិន​ថា នៅ​ទីក្រុង ទីប្រជុំជន និង​នៅតាម​ទីជនបទ​នោះឡើយ​។​

​នៅតាម​មូលដ្ឋាន ក៏​គួរតែ​អាជ្ញាធរ រៀបចំ​ឲ្យ​មាន​សេវា​ប្រមូល និង​ដឹកជញ្ជូន​សំរាម ហើយ​តម្រូវ​ឲ្យ​ប្រជាពលរដ្ឋ បង់ថ្លៃ​សំរាម ដើម្បី​ឲ្យ​ស្រុកភូមិ​យើង មិនមាន​សំរាម កាកសំណល់ ប្លា​ស្ទិ​ក នៅ​ពាសវាល​ពាសកាល​តទៅទៀត​៕​

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

រូបថតៈសូម​ថែ​ទន្លេ ឲ្យ​ដូចជា​ថែ​ជីវិត និង​ឆ្នាំងបាយ​យើង​ដែរ​!

ទីតាំងផ្សាយពាណិជ្ជកម្ម

- Advertisment -

Most Popular