Home ព័ត៌មានអន្តរជាតិ ស្ថានទូត​ចិន​...

ស្ថានទូត​ចិន​ប្រចាំ​ក្រុម​ម៉ានីល និយាយថា អាម៉េរិក​ដ៏​គ្រោះថ្នាក់​បង្ក​ចលាចល​នៅ​អាស៊ី​

​ប្រែ​សម្រួលៈ​វាសនា​/​ម៉ានីល​៖​ស្ថានទូត​ចិន​នៅ​ហ្វីលីពីន បានប្រកាស​ថ្កោលទោស​អាម៉េរិក ចំពោះ​«​ការបង្ក​ភាពវឹកវរ​»​នៅ​អាស៊ី ក្រោយ​តំណាង​សេត​វិមាន​ម្នាក់​ដែល​បាន​ទៅ​ទស្សនកិច្ច​ទីនោះ​បាន​ប្រកាស​​គាំទ្រ​ប្រទេស​នានា​ដែល​មាន​ជម្លោះ​ជាមួយ​ចិន និង​បាន​ចោទប្រកាន់​រដ្ឋាភិបាល​ក្រុង​ប៉េកាំង​ថា ប្រើ​វត្តមាន​យោធា​ដើម្បី​ជំរុញ​ផលប្រយោជន៍​របស់​ខ្លួន​។​

​ក្នុង​អំឡុងពេល​ធ្វើ​ទស្សនកិច្ច​ក្រុង​ម៉ានីល កាលពី​ថ្ងៃ​ចន្ទ ទីប្រឹក្សា​សន្តិសុខ​ជាតិ​អាម៉េរិក លោក រ៉ូ​ប៊ឺត អូ​ប្រាយ​អ៊ឹន បាន​បញ្ជាក់​ឡើងវិញ​អំពី​ការប្តេជ្ញា​ចិត្ត​របស់​អាម៉េរិក​ចំពោះ​កោះ​តៃវ៉ាន់ និង​បាន​ប្រាប់​ហ្វីលី​​ពី​ន ព្រមទាំង​វៀតណាម​ថា «​យើង​ត្រៀម​ជួយ​និង​ការពារ​អ្នក​»​។​

​ស្ថានទូត​ចិន​កាលពី​យប់​ថ្ងៃ​ចន្ទ​បាន​និយាយ​ក្នុង​សេចក្តីថ្លែងការណ៍​មួយ​ថា​«​វា​បង្ហាញ​ថា ដំណើរ​ទស្សនកិច្ច​របស់​គាត់​មិន​បាន​ជួយ​ជំរុញ​សន្តិភាព​និង​ស្ថិរភាព​តំបន់​ទេ តែ​បង្ក​ភាពវឹកវរ​នៅក្នុង​តំបន់ ដើម្បី​​ស្វះស្វែង​រក​ផលប្រយោជន៍​របស់​អាម៉េរិក​ខ្លួនឯង​»​។​

​សេចក្តីថ្លែងការណ៍​បាន​បន្ថែមថា «​សហរដ្ឋ​អាម៉េរិក មិនគួរ​ញុះញង់​អោយ​មាន​ការប្រឈមមុខ​គ្នា​នៅក្នុង​សមុទ្រ​ចិន​ខាងត្បូង​និង​ឈប់​និយាយ​បែប​មិន​ទទួលខុសត្រូវ​ពាក់ព័ន្ធ​នឹង​កោះ​តៃវ៉ាន់​និង​បញ្ហា​ហុង​​កុង ដែល​ជា​កិច្ចការ​ផ្ទៃក្នុង​របស់​ចិន​សុទ្ធសាធ​។​ការពិត​បង្ហាញថា អាម៉េរិក​ជា​អ្នកជំរុញ​យោ​ធូប​នីយកម្ម​ធំ​បំផុត​និង​ជា​សមាសភាព​ខាងក្រៅ​គ្រោះថ្នាក់​បំផុត​នៅ​សមុទ្រ​ចិន​ខាងត្បូង​»​។​

​លោក​អូ​ប្រាយ​អ៊ឹន បាន​ព្រមាន​ចិន​ថា​នឹង​ប្រឈម​«​ផលវិបាក​» បើសិនជា​ប៉ុនប៉ង​ប្រើ​កម្លាំងយោធា​ដើម្បី​បង្ខិតបង្ខំ​បំភ័យ​កោះ​តៃវ៉ាន់ ដែល​ចិន​ចាត់ទុក​ជា​ខេត្ត​ផ្តាច់ខ្លួន​មួយ​របស់​ខ្លួន​ហើយ​នៅ​រង់ចាំ​ពេល​​តែ​នឹង​ធ្វើការ​បង្រួម​បង្រួម​ជាមួយ​ចិនដីគោក​វិញ​ប៉ុណ្ណោះ ដោយ​មិន​មាន​សិទ្ធិ​បង្កើត​ទំនាក់ទំនង​រវាង​រដ្ឋ​និង​រដ្ឋ​ឡើយ​។​

​សូមបញ្ជាក់​ថា សហរដ្ឋ​អាម៉េរិក​និង​ចិន មាន​ជម្លោះ​នឹង​គ្នា​លើ​បញ្ហា​ជាច្រើន ចាប់ពី​បច្ចេកវិទ្យា និង​សិទ្ធិមនុស្ស រហូត​ដល់​ការធ្វើ​យោ​ធូប​នីយកម្ម​ក្នុង​សមុទ្រ​ចិន​ខាងត្បូង ដោយ​ម្ខាងៗ​ចោទប្រកាន់​គ្នា​ថា​​មាន​ចេតនា​បង្ករឿង​។​

​ចិន​អះអាង​អធិបតេយ្យភាព​លើ​សមុទ្រ​ចិន​ខាងត្បូង​ប្រមាណ​៩០​ភាគរយ​ដោយ​ជាន់​លើ​ការអះអាង​របស់​វៀតណាម ហ្វីលីពីន ព្រុយ​ណេ ម៉ាឡេស៊ី និង​កោះ​តៃវ៉ាន់ ហើយ​អាម៉េរិក​ទោះ​ជា​ប្រទេស​ក្រៅ​តំបន់​បាន​​បញ្ជូន​នាវាចម្បាំង​មក​បើក​ឆ្លងកាត់​ផ្លូវទឹក​យុទ្ធសាស្ត្រ​នេះ​ជា​ញឹកញាប់​ដើម្បី​រក្សា​សេរីភាព​នាវាចរណ៍​នៅ​ទីនោះ​៕

​ទីប្រឹក្សា​សន្តិសុខ​ជាតិ​អាម៉េរិក លោក រ៉ូ​ប៊ឺត អូ​ប្រាយ​អ៊ឹន បាន​ទស្សនកិច្ច​ក្រុង​ម៉ានីល​កាលពី​ថ្ងៃ​ចន្ទ ដោយ​បាន​ប្រគល់​កាំជ្រួច​និង​សម្ភារ​សឹក រួម​មាន​ឧបករណ៍​កំណត់​និង​ចាប់​គោលដៅ​សត្រូវ​ដើម្បី​​វាយប្រហារ​(​ក្នុង​រូប​)​សំរាប់​ប្រយុទ្ធប្រឆាំង​នឹង​ពួក​សកម្មប្រយុទ្ធ ភាគខាងត្បូង​។​លោក​ក៏​បាន​សន្យា​ជួយ​ការពារ​ហ្វីលីពីន ក្នុងករណី​កងកម្លាំង​ហ្វីលីពីន​រង​ការវាយប្រហារ​នៅ​សមុទ្រ​ចិន​ខាងត្បូង​

ទីតាំងផ្សាយពាណិជ្ជកម្ម

- Advertisment -

Most Popular