Home ព័ត៌មានអន្តរជាតិ ប៉ូលិស​ថៃ​ដាក...

ប៉ូលិស​ថៃ​ដាក់ពង្រាយ​កម្លាំង​រាប់ពាន់​នាក់​ត្រៀម​ទប់ទល់​នឹង​បាតុករ​ប្រឆាំង​អំណាច​ស្តេច​

ប្រែ​សម្រួលៈ​វាសនា​/​បាងកក​៖​ប៉ូលិស​ថៃ​នឹង​ដាក់​ពង្រាយ​កម្លាំង​៦.០០០​នាក់​នៅ​ថ្ងៃ​ពុធ​ទី​២៥​វិច្ឆិកា​ស្អែក​នេះ​នៅ​ការិយាល័យ​គ្រប់គ្រង​រាជ​ទ្រព្យ នៅពេល​ព្រះរាជាណាចក្រ​នេះ​ប្រឈម​នឹង​បាតុកម្ម​របស់​​ពួក​អ្នក​ប្រឆាំង​ទាមទារ​អោយ​ស្តេច មហា វិជ្ជ​រ៉ា​ឡុងកន បោះបង់​ការគ្រប់គ្រង​ព្រះរាជ​ទ្រព្យ​ដោយ​ព្រះអង្គឯង​ផ្ទាល់​។​

​ប៉ូលិស​បាន​និយាយ​កាលពី​ថ្ងៃ​អង្គារ​ថា នឹង​មិន​អនុញ្ញាត​អោយ​បាតុករ​ណា​ចូល​ជិត​ការិយាល័យ​ព្រះរាជ​ទ្រព្យ​ចម្ងាយ​១៥០​ម៉ែត្រ​ចុះ​ឡើយ ។​នៅទីនេះ ពួក​រាជា​និយម​ក៏​មាន​ផែនការ​ជួបជុំ​បង្ហាញ​ការគាំទ្រ​​របប​រាជានិយម​ដែល​ជួប​ការ​ប្រឈម​ខ្លាំង​បំផុត​មិន​ធ្លាប់​មាន​នៅ​ប៉ុន្មាន​ទសវត្សរ៍​មក​នេះ​។​

​លោក ភី​យ៉ា តា​វី​ឆៃ នាយរង​ប៉ូលិស​ក្រុង​បាងកក បាន​និយាយថា ក្រុមបាតុករ​ទាំងពីរ​នេះ​នឹង​ត្រូវ​រក្សា​អោយ​នៅ​ដាច់ពីគ្នា​។​លោក​ថា «​អាស្រ័យ​ការប្រព្រឹត្ត​របស់​ពួកគេ យើង​នឹង​ចាត់​វិធានការ​សមស្រប​»​។​

​សូមបញ្ជាក់​ថា កាលពី​សប្តាហ៍​មុន មនុស្ស​ជាង​៥០​នាក់​បាន​រងរបួស​នៅ​ពេល​ប៉ូលិស​បាញ់​ទឹក​និង​ឧស្ម័ន​ដាក់​អ្នក​តវ៉ា​ប្រឆាំង​រាប់ពាន់​នាក់​នៅ​ក្រៅ​អាគារ​សភា ក្នុង​ការប្រឈមមុខ​ដ៏​ហិង្សា​បំផុត​ក្នុងចំណោម​​ការប្រឈមមុខ​នានា​នៃ​បាតុកម្ម​អស់​ពេល​ជាង​៤​ខែ​មកនេះ​។​

​ពួក​អ្នក​ប្រឆាំង​តវ៉ា ទាមទារ​ដក​នាយករដ្ឋមន្ត្រី ប្រា​យុទ្ធ ចាន់​អូ​ចា ចេញពី​តំណែង សរសេរ​រដ្ឋធម្មនុញ្ញ​ថ្មី​មួ​យ​និង​កែ​ទំរង់​របបរាជានិយម​ដើម្បី​កុំអោយ​ស្តេច​មាន​អំណាច​ហូរហៀរ​ហួស​ពី​ព្រះមហាក្សត្រ​​អាស្រ័យ​ធម្មនុញ្ញ​ដូច​មានចែង​ក្នុង​ច្បាប់កំពូល​។​

​ក្នុងចំណោម​ការទាមទា​រ​របស់​ពួក​បាតុករ​គាំទ្រ​លទ្ធិប្រជាធិបតេយ្យ គឺ​លុបចោល​ការផ្លាស់ប្តូរ ដែល​អនុញ្ញាត​អោយ​ស្តេច​បច្ចុប្បន្ន​គ្រប់គ្រង​ព្រះ​រាជ្យទ្រព្យ​តំលៃ​រាប់​ពាន់​លាន​ដុល្លារ​ដោយ​ព្រះអង្គឯង​ផ្ទាល់​។​

​ក្រុម​ប្រឆាំង​តវ៉ា​មួយ​ដែល​មានឈ្មោះ​ថា «​យុវជន​សេរី​» បាន​និយាយថា ខ្លួន​នឹង​ដឹកនាំ​បាតុកម្ម​នៅ​ថ្ងៃ​ពុធ «​ដើម្បី​ដណ្តើម​ទ្រព្យសម្បត្តិ​ដែល​ជា​របស់​ប្រជាជន​»​មកវិញ​។​

​ទោះ​ជា​ពួក​បាតុករ​ទាមទារ​ដូច្នេះ ព្រះបរមរាជវាំង​ថៃ​មិន​បាន​ប្រតិកម្ម​យ៉ាងណាទេ ទោះជា​យ៉ាងណា​ស្តេច​ថៃ​បាន​មានបន្ទូល​កាលពី​ពេល​ថ្មីៗ​ថា ព្រះ​អង្គ​នៅ​តែ​ស្រឡាញ់​ពួក​អ្នក​ប្រឆាំង​តវ៉ា​ដូចៗ​គ្នា​ទាំងអស់​។​

​ចំណែក​លោក​ប្រា​យុទ្ធ បាន​ច្រាន​ចោល​ការទាមទារ​អោយ​លោក​ចុះចេញ​ពី​តំណែង និង​កាលពី​សប្តាហ៍​មុន​បាន​និយាយថា គ្រប់​ច្បាប់​នឹង​យកមក​ប្រើ​ប្រឆាំង​ពួក​បាតុករ​ណា​ដែល​រំលោភច្បាប់ រួម​ទាំង​ច្បាប់​​ហាម​ប្រមាថ​ស្តេច​ផងដែរ​៕

​ប៉ូលិស​បង្ក្រាប​បាតុកម្ម​ឈរ​យាម​នៅមុខ​វាំង​ក្នុង​ក្រុង​បាងកក នៅ​ពេល​ពួក​បាតុករ​ប្រឆាំង​រដ្ឋាភិបាល​ដើរ​ដង្ហែ​ញត្តិ​មកកាន់​វាំង​កាលពីពេល​កន្លង​ទៅ​

ទីតាំងផ្សាយពាណិជ្ជកម្ម

- Advertisment -

Most Popular