Home ព័ត៌មានជាតិ សន្តិសុខ ​ស្លាប់​១​នាក...

​ស្លាប់​១​នាក់ របួសធ្ងន់​១​នាក់ នៅក្នុង​គ្រោះថ្នាក់​ចរាចរណ៍ ២ កន្លែង​ផ្សេងគ្នា នៅ​ថ្ងៃ​តែមួយ

ដោយៈ ប​,​ជ័យ​/ បន្ទាយ​មាន​ជ័​យៈ បុរស​ម្នាក់ បាន​ស្លាប់​នៅ​កន្លែងកើតហេតុ ដោយសារ​រថយន្ត និង​ម៉ូតូ បុក​គ្នា និង​បុរស​ម្នាក់ទៀត បាន​រងរបួស​ធ្ងន់ ដោយសារតែ​គាត់ បើករថយន្ត ជែង​ក្នុងស្ថានភាព​គ្រោះថ្នាក់ ហើយ​រេ​ចង្កូត​ទៅបុក​ប៉ះ រថយន្ត​ធំ កាលពី​រសៀល ថ្ងៃទី​២៣ ខែវិច្ឆិកា ឆ្នាំ​២០២០ នៅ​កន្លែង​ទីតាំង ពីរ​ផ្សេង​ពីគ្នា​។​

​លោក​វរសេនីយ៍ទោ សួន នី​ប៉ូ នាយរង​ការិយាល័យ នគរបាល​ចរាចរណ៍ នៃ​ស្នងការដ្ឋាន ខេត្តបន្ទាយមានជ័យ បាន​ឲ្យ​ដឹងថា ករណី​ទី​១ នៃ​គ្រោះថ្នាក់ ចរាចរណ៍​នេះ បានកើត​ឡើង នៅវេលា​ម៉ោង ៣ រសៀល ថ្ងៃទី​២៣ វិច្ឆិកា នៅលើ​កំណាត់​ផ្លូវជាតិ​លេខ​៥៩ ស្ថិតនៅ​ភូមិ​រស្មី​សាមគ្គី សង្កាត់​និមិត្ត ក្រុង​ប៉ោយប៉ែត រវាង​ម៉ូតូ​ម៉ាក​ហុងដា ឌ្រី​ម សេ​១២៥ ពាក់​ផ្លាកលេខ ប៉ៃលិន 1C-7618 បើក​ពី​ទិស​ខាងលិច ទៅខាង​កើត​។ លុះ​មកដល់​ចំណុចកើតហេតុ ភាគី​ម៉ូតូ បាន​ប្តូរ​គន្លង បត់​ឆ្វេង​។ ស្របពេលនោះ មាន​រថយន្ត​លុច​ស៊ី​ស RX300 ពណ៌​ស ពាក់​ផ្លាកលេខ ប​.​មានជ័យ .2A-6828 បើក​ពី​ទិសខាងកើត ទៅខាង​លិច គឺ​ក្នុងទិសដៅ​ផ្ទុយគ្នា ក្នុង​ល្បឿន​លឿន បាន​បុក​ម៉ូតូ ពេញទំហឹង បណ្តាល​អ្នកបើក​ម៉ូតូ ឈ្មោះ ផង់ លាង ភេទ​ប្រុស អាយុ​៦៩​ឆ្នាំ រស់នៅ​ភូមិ​រស្មី​សាមគ្គី សង្កាត់​និមិត្ត ក្រុង​ប៉ោយប៉ែត បណ្តាលឱ្យ​របួស​ក្បាល ដោយសារ​ដួល​បោក​ទៅនឹង​ថ្នល់ និង​របួស​ជើង​ខាងស្តាំ ហើយ​ក្រោយមក ជនរងគ្រោះ បាន​ស្លាប់​នៅ​មន្ទីរពេទ្យ​។​

​លោក​បាន​បញ្ជាក់ថាៈ មូលហេតុ អ្នកបើក​ម៉ូតូ ប្តូរ​គន្លង​បត់​ឆ្វេង ខ្វះ​ការប្រុងប្រយ័ត្ន មិន​ពាក់មួក​សុវត្ថិភាព រីឯ​រថយន្ត បើក​ក្នុង​ល្បឿន​លឿន ។ អ្នកបើករថយន្ត បាន​ត្រូវ​ឃាត់ខ្លួន នៅ​អធិការដ្ឋាន​នគរបាល ក្រុង​ប៉ោយប៉ែត ។​

​លោក​បាន​បន្តទៀតថា ករណី​ទី​២ នៅ​ថ្ងៃទី​២៣ វិច្ឆិកា វេលា​ម៉ោង ៥ ល្ងាច លើផ្លូវ​ជាតិ​លេខ​៥ ត្រង់ចំណុច​ខាងលិច​ស្ពាន​ទឹកថ្លា ស្ថិតនៅ​ភូមិ​ទឹកថ្លា សង្កាត់​ទឹកថ្លា ក្រុង​សិរីសោភ័ណ ក៏មាន​គ្រោះថ្នាក់​ចរាចរណ៍ កើតឡើង​ដែរ រវាង​រថយន្ត​លុច​ស៊ី​ស GS300 ពាក់​ស្លាក់​លេខ ភ្នំពេញ .2AW-6070 បើក​ពី​ទិសខាងកើត ទៅខាង​លិច ក្នុង​ល្បឿន​លឿន ហើយ​បាន​ជែង​ក្នុងស្ថានភាព​គ្រោះថ្នាក់ បណ្ដាលឱ្យ​រេ​ចង្កូត ទៅបុក​ប៉ះ រថយន្ត​ធំ ពាក់​ផ្លាកលេខ ក្រចេះ​.3A-0301 ដឹកស្រូវ​ចំ​ពី​ចំហៀង ត្រង់​កង់​ខាងឆ្វេង ផ្នែក​ខាងក្រោយ ក្នុងទិសដៅ​ផ្ទុយគ្នា បណ្ដាល​ឲ្យ​បុរស ជា​អ្នកបើករថយន្ត លុច​ស៊ី​ស GS300 រងរបួស​ធ្ងន់ (​មិនទាន់​ស្គាល់ឈ្មោះ​) បាន​ត្រូវ​បញ្ជូនទៅ​មន្ទីរពេទ្យ​។​

​លោក​វរសេនីយ៍ទោ សួន នី​ប៉ូ បាន​ប្រាប់​បន្តទៀតថាៈ វត្ថុតាង​ទាំងអស់ សមត្ថកិច្ច យកមក​រក្សាទុក នៅ​អធិការដ្ឋាន និង​ការិយាល័យ នគរបាល​ចរាចរណ៍ រង់ចាំ​ដោះស្រាយ នៅពេល​ក្រោយ​៕/V​

ទីតាំងផ្សាយពាណិជ្ជកម្ម

- Advertisment -

Most Popular