Home ព័ត៌មានជាតិ សង្គម ពលរដ្ឋ​ភូមិ​ក...

ពលរដ្ឋ​ភូមិ​កូនដំរី ផ្ទុះ​ការតវ៉ា ខណៈ​មន្ត្រី​អន្តរក្រសួង ចុះ​សិក្សា​សាងសង​ស្ថានីយ​ថ្លឹង​រថយន្ត​ថ្មី​

ដោយៈ ប​.​ជ័យ / បន្ទាយ​មាន​ជ័​យៈ មនុស្ស​មួយក្រុម ដែល​អះអាងថា ជា​ប្រជាពលរដ្ឋ រស់នៅ​សងខាង​ផ្លូវជាតិ​លេខ​៥ ចំណុច​ភូមិ​កូនដំរី សង្កាត់​និមិត្ត ក្រុង​ប៉ោយប៉ែត ខេត្តបន្ទាយមានជ័យ កាលពី ថ្ងៃទី​២៤ ខែវិច្ឆិកា ឆ្នាំ​២០២០ បាន​លើកគ្នា​តវ៉ា​ជំទាស់​នឹង​គម្រោង​រដ្ឋ ដោយ​បដិសេធថា មិន​ឲ្យ​ខាង​ក្រុមហ៊ុន ដែលជា​ដៃគូ​វិនិយោគ​ពីរ​ដ្ឋ មក​ធ្វើ​ស្ថានីយថ្មី​ថ្លឹង​រថយន្ត នៅមុខ​ផ្ទះ​របស់​ពួកគេ ដាច់ខាត ។​

​ប្រតិកម្ម​តវ៉ា​របស់​ប្រជាពលរដ្ឋ ចំនួន ៦៥ គ្រួសារ​នោះ បានកើត​ឡើង បន្ទាប់ពី​មាន​ក្រុមមន្ត្រី​អន្តរក្រសួង និង​ដៃគូ​ឯកជន បាន​ចុះមក​ប្រជុំ​ដោះស្រាយ ជាមួយ​ពួកគាត់ ដោយ​បញ្ជាក់​ពី​គម្រោងការ ដាក់​ទីតាំង​ជញ្ជីង​ថ្លឹង​រថយន្ត​ថ្មី នៅមុខ​ផ្ទះ ឬ​ដី​របស់​ពួកខ្លួន ពោលគឺ​ដោយ​ទិញ​ដី​មុខផ្ទះ ដើម្បី​ធ្វើជា​ផ្លូវ មាន​ទទឹង ៦ ម៉ែត្រ និង​ឲ្យ​ពួកគាត់​ចរាចរណ៍ ពីក្រោយ​ស្ថានីយ៍​ថ្លឹង​រថយន្ត​វិញ​។​

​បាតុករ​អហិង្សា បាន​បញ្ចេញមតិ​ប្រតិកម្ម តវ៉ា​ប្រឆាំង​ពេញមុខ ហើយ​ខឹងសម្បារ ហើយ​មិន​យល់ព្រម​សោះឡើយ ឲ្យ​មន្ត្រី​ជំនាញ នៃ​អន្តរក្រសួង មានការ​វាស់វែង និង​រឹងរឹតតែ​មិន​ព្រម​ឲ្យ​មាន ការធ្វើ​ជញ្ជីង​ថ្មី អី​នៅ​កណ្ដាល​ទីប្រជុំជន ហើយ​ជាងនេះទៅទៀត គឺ​បាំង​ផ្ទះសម្បែង ឬ បិទមុខ បិទ​ខ្ទប់​ដង្ហើម ឬ​របរ​រកស៊ី ការធ្វើការងារ របស់​ពួកគាត់ ដែល​កំពុងបើក​អាជីវកម្ម រកស៊ី​រាល់​ថ្ងៃនោះ ដាច់ខាត ។​

​ប្រជាពលរដ្ឋ​ទាំងនោះ បានស្នើ​សុំ​ដ៏​ទទូច ដោយ​សុំ​អន្តរាគមន៍​ដ៏​ខ្ពង់ខ្ពស់ ពី​រាជរដ្ឋាភិបាល ដែលមាន​សម្តេច​តេ​ជោ ហ៊ុន សែន ជា​នាយករដ្ឋមន្ត្រី និង​ក្រសួង​សាធារណការ និង​ដឹកជញ្ជូន តាមរយៈ​លោក​អភិបាលខេត្ត​ថាៈ មន្ត្រី​ជំនាញ មេត្តា​ពិនិត្យ អាជ្ញាធរ និង​កុំ​ឲ្យ​មានការ​សាងសង់ ស្ថានីយ៍​ថ្មី​ថ្លឹង​រថយន្ត ប៉ះពាល់​ប្រយោជន៍​ពលរដ្ឋ ឬ​ក៍​សូម​ឲ្យ​ប្រើប្រាស់​ទីតាំង​ដដែល មាន​ចម្ងាយ​ប្រមាណ ១ គីឡូម៉ែត្រ ពី​ទីប្រជុំ​ជននេះ ឬ​រក​ទីតាំង​កន្លែង​ផ្សេង ដែល​មិនទាន់មាន​លំនៅដ្ឋាន របស់​ប្រជាព​រដ្ឋ រស់នៅ ។​

​ពាក់ព័ន្ធ​ករណីនេះ លោក ហ៊ុល សំ​អូន ចៅសង្កាត់​និមិត្ត បាន​ឲ្យ​ដឹងថាៈ ដែន​សមត្ថកិច្ច​មូលដ្ឋាន មាន​ប៉ុណ្ណឹង ក្នុង​រឿងនេះ​ទេ ។ វា​គឺជា​ដែន​សមត្ថកិច្ច​របស់ អន្តរក្រសួង ដោយ​អាជ្ញាធរខេត្ត បាន​ចាត់​ឲ្យ​ស្រុក ក្រុង និង សង្កាត់ ចូលរួម​ក្នុង​ការចុះ​សិក្សា លើ​ទីតាំង ដែល​រដ្ឋាភិបាល គ្រោង​បង្កើត​ស្ថានីយ​ថ្លឹង​រថយន្ត តែ​ដោយ​ពលរដ្ឋ មិន​យល់ព្រម លោក​ក៏​សូម​ឲ្យ​រដ្ឋាភិបាល មេត្តា​ពិចារណា តាម​ការស្នើ​របស់​ពល​រដ្ឋ​ផង​។

​លោក សុក ចាន់ថា ប្រធាន​មន្ទីរ​សាធារណការ និង​ដឹកជញ្ជូន ខេត្តបន្ទាយមានជ័យ បាន​ឲ្យ​ដឹងថាៈ ប្រការ​ដែរ​ក្រុម​អន្តរក្រសួង ចុះមក​នេះ គឺ​មិនទាន់​កំណត់ថា ត្រូវធ្វើ​អ្វី​នៅឡើយ​ទេ គឺ​ក្រុម​អន្តរក្រសួង គ្រាន់តែ​ចុះ​សិក្សា ស្វែងយល់​ពី​ទីតាំង និង​ផលប៉ះពាល់​សិន​តែប៉ុណ្ណោះ​។ ជាមួយគ្នានេះ ដែន​សមត្ថកិច្ច​មន្ទីរ ក៏​មិនមាន​ភារកិច្ច សម្រេច​អ្វី​ដែរ ពោលគឺ​នេះ ជាការ​ងារ​របស់​អន្តរក្រសួង ៕/V​

ទីតាំងផ្សាយពាណិជ្ជកម្ម

- Advertisment -

Most Popular