Home ព័ត៌មានអន្តរជាតិ លោកបៃ​ដិន​បង្...

លោកបៃ​ដិន​បង្ហាញ​ក្រុម​សន្តិសុខ​និង​គោលនយោបាយ​បរទេស​និងថាត្រៀមដឹកនាំពិភពលោកជាថ្មី

​ប្រែ​សម្រួល : កញ្ញា​ដា​លី​ស​/​សហរដ្ឋ​អាម៉េរិក ៖ ប្រធានាធិបតី​ជាប់ឆ្នោត​លោក ចូ បៃ​ដិន កាលពី​ថ្ងៃ​អង្គារ​ទី​២៤​វិច្ឆិកា​បាន​បង្ហាញ​ឈ្មោះ​អ្នកការទូត​ជើង​ចាស់​និង​អ្នក​ធ្វើ​គោលនយោបាយ​ជាច្រើនរូប ដែល​នឹង​បង្កើត​ក្រុម​សន្តិសុខ​ជាតិ​និង​ក្រុម​គោលនយោបាយ​ការបរទេស​របស់​លោក ដោយ​និយាយថា “​អាម៉េរិក​ត្រឡប់មកវិញ ត្រៀម​ខ្លួន​ដើម្បី​ដឹកនាំ​ពិភពលោក​”​។​

​នៅក្នុង​ព្រឹត្តិការណ៍​មួយ​នៅ​ស្រុកកំណើត​របស់​គាត់​គឺ​ទីក្រុង​វី​ល​មីង​តុ​ន រដ្ឋ​ដេ​ឡាវែ លោកបៃ​ដិន​អាយុ ៧៨ ឆ្នាំ​បាន​បង្ហាញ​មនុស្ស​សម្រិត​សម្រាំង​របស់​គាត់​សម្រាប់​តំណែង​រដ្ឋមន្ត្រី​ការបរទេស ទីប្រឹក្សា​​សន្តិសុខ​ជាតិ រដ្ឋមន្ត្រី​ក្រសួង​សន្តិសុខ​មាតុភូមិ មេ​ចារកម្ម ឯកអគ្គរដ្ឋទូត​ប្រចាំ​នៅ​អង្គការ​សហប្រជាជាតិ និង ប្រេសិត​ផ្នែក​បម្រែបម្រួល​អាកាសធាតុ​។​

​លោកបៃ​ដិនបាន​ថ្លែង​ខណៈ​បុរស​និង​ស្ត្រី​ទាំង​៦​នាក់​ឈរ​នៅ​ពីក្រោយ​គាត់​ដោយ​ពាក់​ម៉ាស់​នៅលើ​ឆាក​មហោស្រព​ឃ្វីន យ៉ាង​ដូច្នេះ​ថា​”​មន្ត្រី​សាធារណៈ​ទាំងនេះ​នឹង​ស្តារ​ភាពជា​អ្នកដឹកនាំ​ពិភពលោក​និង​​ភាពជា​អ្នកដឹកនាំ​ផ្នែក​ស្មារតី​របស់​អាម៉េរិក​”​។​

​លោកបៃ​ដិ​ននិយាយថា បន្ទាប់ពី​លោក​ស្បថ​កាន់​តំណែង​នៅ​ថ្ងៃទី ២០ ខែ​មករា​ឆ្នាំ ២០២១ ហើយ​លោក​ដូណាល់​ត្រាំ​ចាកចេញ​ពី​សេត​វិមាន សហរដ្ឋ​អាម៉េរិក​នឹង​”​អង្គុយ​នៅ​ក្បាល​តុ​ជាថ្មី​ម្តងទៀត​ដោយ​​ត្រៀម​ខ្លួន​ប្រឈមមុខ​នឹង​សត្រូវ​របស់​យើង និង មិន​ច្រាន​ចោល​សម្ព័ន្ធមិត្ត​របស់​យើង​នោះ​ឡើយ​”​។​

​អតីត​អនុ​ប្រធានាធិបតី​រូបនេះ​បាន​និយាយ​ឌឺដង​ដាក់​គោលនយោបាយ​ឯកោ “​អាម៉េរិក​ជា​អាទិភាព​” របស់​ប្រធានាធិបតី​ត្រាំ យ៉ាង​ដូច្នេះ​ថា “​វា​ជា​ក្រុម​មួយ​ដែល​ឆ្លុះបញ្ចាំង​ពី​ការពិត​ដែល​ថា​អាម៉េរិក​​វិលត្រឡប់​មក​វិញ ត្រៀម​ខ្លួន​ដឹកនាំ​ពិភពលោក មិន​រាថយ​”​។​

​មន្ត្រី​កាន់តំណែង​សំខាន់ៗ​ទាំងនោះ​រួមមាន លោក អ៊ែន​ថូ​នី ប៊ីន​ខិន ជា​រដ្ឋមន្ត្រី​ការបរទេស លោក អាឡិ​ចាន់​ដ្រូ ម៉ា​យ៉ូ​កាស ជា​រដ្ឋមន្ត្រី​ក្រសួង​សន្តិសុខ​មាតុភូមិ លោក រ៉ូន ក្លេន ជា​អគ្គសេនាធិការ​ចម្រុះ លោកស្រី អាវ​រី​ល ហេន ជា​មេ​ចារកម្ម​ជាតិ លោក ជេ​ក ស៊ូ​ល​វី​ល​វ៉ាន់ ជា​ទីប្រឹក្សា​សន្តិសុខ​ជាតិ លោកស្រី លីន​ដា ថូ​ម៉ាស គ្រីន​ហ្វៀល ជា​ឯកអគ្គរដ្ឋទូត​ប្រចាំ​នៅ​អ​.​ស​.​ប និង​លោក​ច​ន ឃឺ​រី​ប្រេសិត​ផ្នែក​​បម្រែបម្រួល​អាកាសធាតុ​។​

​ការកត់សម្គាល់​របស់​លោក​ដៃ​ដិនបាន​កើតឡើង​ភ្លាមៗ​បន្ទាប់ពី​លោក​ត្រាំ​ជួប​នូវ​ឧបសគ្គ​បន្ថែមទៀត​នៅក្នុង​កិច្ចប្រឹងប្រែង​មិន​ធ្លាប់​មាន​ពី​មុន​ដើម្បី​បញ្ច្រាស់​លទ្ធផល​នៃ​ការបោះឆ្នោត​ប្រធានាធិបតី​អាម៉េរិក ជាមួយ​នឹង​ការអះអាង​ដោយ​គ្មាន​ភស្តុតាង​អំពី​ការ​ក្លែងបន្លំ​សន្លឹកឆ្នោត​។​

​កាលពី​ថ្ងៃ​អង្គារ រដ្ឋ​ផេន​ស៊ីល​វ៉ានៀ​និងរ​ដ្ឋ​ណេវ៉ា​ដា​បាន​បញ្ជាក់ពី​ភាពត្រឹមត្រូវ​នៃ​លទ្ធផល​បោះឆ្នោត​កាលពី​ថ្ងៃទី ០៣ ខែវិច្ឆិកា ពោលគឺ​មួយថ្ងៃ​បន្ទាប់​ពី​រដ្ឋ​មី​ស៊ី​ហ្គែ​ន​បាន​ធ្វើ​ដូច្នេះ​ដែរ នៅក្នុង​ចំណាត់ការ​មួយ ដែល​ជំរុញ​ឱ្យ​រដ្ឋបាល​សេវាកម្ម​ទូទៅ (GSA) ចាប់ផ្តើម​ដំណើរការ​ផ្ទេរ​តំណែង​ប្រធានាធិបតី​៕

​លោកបៃ​ដិន​បង្ហាញ​មនុស្ស​សំខាន់ៗ​សម្រាប់​មុខតំណែង​ធំៗ​របស់​រដ្ឋបាល​លោក​

ទីតាំងផ្សាយពាណិជ្ជកម្ម

- Advertisment -

Most Popular