Home ព័ត៌មានជាតិ សង្គម រដ្ឋបាល​រាជធា...

រដ្ឋបាល​រាជធានី បាន​នឹង​កំពុងមាន​វិធានការ ទៅលើ​ការដោះស្រាយ នូវ​បញ្ហា​ការលិចលង់ ដោយ​ទឹកជំនន់ នៅក្នុង​រាជធានី​ភ្នំពេញ​

ដោយៈ រ៉ា​ម៉ន / ភ្នំពេញៈ លោក ឃួ​ង ស្រេង អភិបាល​រាជធានី​ភ្នំពេញ បានលើកឡើង​ថាៈ រដ្ឋបាល​រាជធានី​ភ្នំពេញ បាននិងកំពុង​មាន​វិធានការ ទៅលើ​ការដោះស្រាយ នូវ​បញ្ហា​ការលិចលង់ ដោយ​ទឹកជំនន់ នៅក្នុង​រាជធានី​ភ្នំពេញ ក្នុងនោះ យើង​បាននិងកំពុង​ទប់ ទំនប់​សណ្តរ​ស្ទឹង​ព្រែក​ត្នោត ឲ្យ​បាន​ខ្ពស់ ហើយ​ការងារ​នេះ យើង​បាន​សុំ​គោលការណ៍ ទៅ​រាជរដ្ឋាភិបាល ដើម្បី​ព​ន្លឿ​ន​ការងារ​នេះ ឱ្យបាន​លឿន កាត់បន្ថយ​បាន​នូវ ហានិភ័យ​របស់​ប្រជាពលរដ្ឋ ព្រោះថា ការលិចលង់ ដោយ​ទឹកជំនន់​នេះ មាន​ហានិភ័យ​ខ្ពស់​ណាស់ សម្រាប់​ប្រជាពលរដ្ឋ​។​

​លោក​អភិបាល​រាជធានី​ភ្នំពេញ បានលើកឡើង​បែបនេះ នៅក្នុង​កិច្ចប្រជុំ​វិសាមញ្ញ លើក​ទី​១ របស់​ក្រុមប្រឹក្សា​រាជធានី​ភ្នំពេញ ក្រោម​វត្តមាន​របស់លោក ប៉ា សុជាតិ​វង្ស ប្រធាន​ក្រុមប្រឹក្សា រាជធានី​ភ្នំពេញ នា​ព្រឹក​ថ្ងៃទី​២៥ ខែវិច្ឆិកា នេះ ។ ក្នុង​កិច្ចប្រជុំ​នេះ លោក​អភិបាល​រាជធានី​ភ្នំពេញ បាន​ផ្ដោត​សំខាន់ ទៅលើ​ការដោះស្រាយ បញ្ហា​ទឹក​លិចលង់ នៅក្នុង​រាជធានី​ភ្នំពេញ ដើម្បី​ធ្វើយ៉ាងណា ដោះស្រាយ​បញ្ហា​នេះ ឲ្យ​បានល្អ​ប្រសើរ សម្រាប់​ឆ្នាំក្រោយៗ​ទៀត​។​

​ក្នុងឱកាស​នោះ លោក ប៉ា សុជាតិ​វង្ស ប្រធាន​ក្រុមប្រឹក្សា រាជធានី​ភ្នំពេញ បាន​មានប្រសាសន៍ថាៈ បញ្ហា​លិចលង់​នេះ គឺជា​រឿង​ធំ​មួយ ដែល​យើង​ត្រូវ​រួមគ្នា ធ្វើការ​ដោះស្រាយ ធ្វើយ៉ាងណា​ឱ្យបាន​ប្រសើរ ជៀសវាង​នូវ​ការលិចលង់ ដោយ​ទឹកជំនន់ ។ លោក ប៉ា សុជាតិ​វង្ស ក៏បាន​សំដែង​នូវ ការកោតសរសើរ​ផងដែរ ចំពោះ​គណៈ​អភិបាល​រាជធានី គណៈ​អភិបាលខណ្ឌ កងកម្លាំងប្រដាប់អាវុធ មន្ទីរ​អង្គភាព​ជំនាញ​ពាក់ព័ន្ធ និង​មន្ត្រី​ចំណុះ​ឲ្យ​រដ្ឋបាល​រាជធានី​ភ្នំពេញ​ទាំងអស់ ដែល​បាន​ខិតខំ​ជួយសង្គ្រោះ ប្រជាពលរដ្ឋ ដែល​រងគ្រោះ​ដោយ​ទឹកជំនន់ កន្លងមក បាន​ទាន់ពេលវេលា​។ លោក​បាន​សម្តែង ការកោតសរសើរ ដល់​ការដឹកនាំ និង​ការខិតខំ​ប្រឹងប្រែង ជំនះ​ការលំបាក ក្នុងការ​ប្រមូល ដឹក​សំរាម ចេញពី​ទីក្រុង ក្នុង​រយៈពេល ដែល​កម្មករ​ក្រុមហ៊ុន​ស៊ីន​ទ្រី ធ្វើ​កូដកម្ម ព្រមទាំង​បានធ្វើ​ចលនា ឲ្យ​កម្មករ​ក្រុមហ៊ុន​ស៊ីន​ទ្រី ចូលធ្វើការ​ឡើងវិញ ។​

​លោកប៉ា សុជាតិ​វង្ស ក៏បាន​វាយតម្លៃ​ខ្ពស់ ចំពោះ​រដ្ឋបាល​រាជធានី​ភ្នំពេញ ដែល​បាន​យកចិត្តទុកដាក់ ចុះ​ជំរុញ និង​ប្រជុំ​ដក​បទពិសោធន៍​ការងារ សមាគម​មនុស្ស​ចាស់ តាម​ស្មារតី នៃ​កិច្ចប្រជុំ​សាមញ្ញ ក្រុមប្រឹក្សា​រាជធានី​ភ្នំពេញ ខណ្ឌ អាណត្តិ​ទី​៣ លើក​ទី ១៤ នៅ​ថ្ងៃទី​៩ ខែកក្កដា ឆ្នាំ​២០២០​។​

​ក្នុង​កិច្ចប្រជុំ​នោះ លោក ប៉ា សុជាតិ​វង្ស ក៏បាន​កោតសរសើរ​ផងដែរ លើ​ការគ្រប់គ្រង​ដែនដី នគរូបនីយកម្ម សំណង់ និង​សុរិយាដី ដែល​របាយការណ៍ មាន​វឌ្ឍនភាព និង​បានធ្វើ​ការដោះស្រាយ ទំនាស់​មួយ​ករណី លើ​ទំនាស់​សរុប ២៨ ករណី ដែលមាន ។ លោក​ក៏បាន​សម្តែង ការកោតសរសើរ ចំពោះ​ការយកចិត្តទុកដាក់ លើ​ការងារ​ថែទាំ​ហេដ្ឋារចនាសម្ព័ន្ធ ដូចជា គំនូស​ចរាចរណ៍ អនុវត្តបាន ៨០០ ម៉ែត្រការ៉េ នៅ​ផ្លូវ​មុនី​រ៉េត និង​ផ្លូវ​សាល​ដឺ​ហ្គោល ការលុបបំបាត់​សំបុកមាន់ អនុវត្តបាន ១៤៨២ ម៉ែត្រការ៉េ នៅលើ​ផ្លូវ​តូចធំ​នានា ក្នុង​រាជធានី​ភ្នំពេញ និង​ការ​លុប​ស្នាម​ប្រេះ អនុវត្តបាន ៣៥០ ម៉ែត្រការ៉េ នៅ​ផ្លូវជាតិ​លេខ​៥ និង​ផ្លូវជាតិ​លេខ​៦ ៕/V​

ទីតាំងផ្សាយពាណិជ្ជកម្ម

- Advertisment -

Most Popular