ដោយៈ ប.ខុន / ភ្នំពេញៈ ត្រីសម្រាប់ធ្វើប្រហុក ផ្អក ចាប់ផ្តើមត្រូវ នៅតាមគន្លងដាយ ក្នុងភូមិសាស្ត្រ រាជធានីភ្នំពេញ ដោយលើកម្តង បានត្រីពី ២០ ទៅ ៣០ គីឡូក្រាម។ នេះបើតាម លោក ងិន ឌី នាយខណ្ឌរដ្ឋបាលជលផល រាជធានីភ្នំពេញ បាននិយាយឱ្យដឹង នៅរសៀល ថ្ងៃទី២៥ ខែវិច្ឆិកា ឆ្នាំ២០២០។
លោក ម៉ូត ហូសាន់ អ្នកធ្វើអាជីវកម្មនេសាទ ជួលគន្លងដាយត្រីពីរដ្ឋ បាននិយាយឱ្យដឹង នៅថ្ងៃទី២៥ ខែវិច្ឆិកា នេះថាៈ ចាប់តាំងពីព្រឹក មកដល់រសៀលនេះ ចាប់បានត្រី សម្រាប់ធ្វើប្រហុកជាង ២០០ គីឡូក្រាម ដោយក្នុងរយៈពេលប្រហែល ១ ម៉ោង លើកម្តង បានត្រីប្រហែល ៣០ គីឡូក្រាម នៅគន្លងដាយណា ក៍ចាប់ត្រីបានដែរ។ នៅក្នុងខេត្តកណ្តាល គេចាប់បានត្រី មានចំនួនកើនឡើង ជាលំដាប់។
អ្នកនេសាទខាងលើ បាននិយាយឱ្យដឹងទៀតថាៈ មកដល់ពេលនេះ លោកមិនទាន់ហ៊ានអូសបែរ ទៅកាន់កណ្តាលទន្លេ នៅឡើយទេ ដោយសារទឹក នៅហូរខ្លាំង និងមិនទាន់ហ៊ាន ដាក់សាច់ដាយ ក្រឡាល្អិតដែរ។ ត្រីដែលចាប់បាន នៅថ្ងៃនេះ លក់បានក្នុងតម្លៃ មួយគីឡូក្រាម ជាង ២.០០០ រៀល៕/V
