Home ព័ត៌មានជាតិ វប្បធម៌ អបអរសាទរ ខួប​...

អបអរសាទរ ខួប​ទី​១៥​ឆ្នាំ ដែល​ល្ខោន​ស្រមោល​ស្បែក​ធំ​របស់​កម្ពុជា ត្រូវបាន​ចុះ​ក្នុង​បញ្ជី បេតិកភណ្ឌ​ពិភពលោក​

​ដោយៈ ទេព មង្គល / ភ្នំពេញៈ នៅ​ថ្ងៃទី​២៥ ខែវិច្ឆិកា ឆ្នាំ​២០២០ នេះ គឺជា​ខួប​ទី​១៥​ឆ្នាំ ដែល​ល្ខោន​ស្រមោល​ស្បែក​ធំ របស់​កម្ពុជា ត្រូវបាន​ចុះ​ក្នុង​បញ្ជី បេតិកភណ្ឌ​វប្បធម៌​អរូបី នៃ​មនុស្ស​ជាតិ កាលពី​ថ្ងៃទី​២៥ ខែវិច្ឆិកា ឆ្នាំ​២០០៥ របស់​អង្គការ​យូណេស្កូ​។ នេះ​បើតាម​ការ​រំលឹក​ឡើងវិញ ដោយ​សម្ដេច​អគ្គ​មហា សេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា នៅ​ថ្ងៃទី​២៥ វិច្ឆិកា នេះ តាមរយៈ​ទំព័រ​ហ្វេ​ស​ប៊ុ​ក​ផ្លូវការ របស់​សម្តេច​។

​សម្ដេច​តេ​ជោ នាយករដ្ឋមន្ត្រី នៃ​ព្រះរាជាណាចក្រ​កម្ពុជា បានលើកឡើង​ថាៈ ” សិល្បៈ​ល្ខោន​ស្បែក​ធំ មាន​ប្រវត្តិ និង​អាយុកាល ជា​យូរលង់​ណាស់ មកហើយ លើទឹក​ដី នៃ​ព្រះរាជា​ណាចក្រ​កម្ពុជា ត្រូវបាន​សកលលោក ទទួលស្គាល់ និង​ឲ្យ​តម្លៃ​ថា ជា​សម្បត្តិ​មនុស្សជាតិ ដ៏​អស្ចារ្យ និង​បានដាក់​បញ្ចូល ជា​បេតិកភណ្ឌ​ពិភពលោក ខាង​បេតិកភណ្ឌ បញ្ចេញ​សំឡេង និង​អរូបី​យ៍ របស់​មនុស្សជាតិ ក្នុង​ឆ្នាំ​២០០៥ របស់​អង្គការ​យូណេស្កូ ទៀតផង ដែល​នេះ​ជា​មោទនភាព​ជាតិ​មួយ ដ៏​ត្រចះត្រចង់ មិនអាច​កាត់ថ្លៃ​បាន ” ។​

ល្ខោន​ស្រមោល​ស្បែក​ធំ​របស់​កម្ពុជា

​សម្តេច​តេ​ជោ បាន​បន្តថាៈ ” ល្ខោនស្បែក​ធំ អាច​ត្រូវបាន​គេ​ហៅ ឈ្មោះ​ម្យ៉ាង​ទៀតថា «​ណាំងស្បែក​ធំ​» ហើយ​វា​ជា​សិល្បៈ​ស្រមោល មួយបែប ដែល​ប្រើប្រាស់ ផ្ទាំង​រូប​ឆ្លាក់​ពី​ស្បែក មក​សម្តែង​ជា​ឈុត​ឆាក​សាច់រឿង ហើយ​រូប​ឆ្លាក់​ពី​ស្បែក​ទាំងនោះ ត្រូវគេ​ដាប់ និង​ឆ្លាក់​ជា​រូប​អាទិទេព ដែល​ភាគច្រើន ជា​រឿង​បែប​ព្រហ្ម​ណ៍​សាសនា ” ។​

​សម្តេច​តេ​ជោ បាន​បន្តទៀតថាៈ ” ល្ខោនស្បែក​ធំ គឺជា​សិល្បៈ​មួយ មាន​ប្រវត្តិ នៅពេល​ព្រហ្ម​សាសនា ចូលមក​ទឹកដី​ខ្មែរ​។ កាលពី​ដើមឡើយ សិល្បៈ​ប្រភេទ​នេះ ត្រូវបាន​គេ​ឃើញ​សម្តែង ក្នុង​ពិធី​តែ​ពីរ ឬ បី​ប៉ុណ្ណោះ ក្នុង​មួយឆ្នាំ ហើយ​កម្រ​សម្តែង ជា​សាធារណៈ​ណាស់​។ ពិធី​ទាំងនោះ មានដូចជា ពិធីបុណ្យ​ចូលឆ្នាំ​ខ្មែរ ពិធី​បុណ្យចម្រើនព្រះជន្ម ព្រះមហាក្សត្រ និង​ពិធី​គ្រងរាជ្យ ឬ ក្នុង​ពិធី​សក្ការៈ របស់​ឥស្សរជន​ល្បីៗ ” ។​

​សម្ដេច​តេ​ជោ នាយករដ្ឋមន្ត្រី បាន​ក្រើន​រំលឹកថាៈ ” កិច្ចការពារ​បេតិកភណ្ឌ​វប្បធម៌ ជា​ភារកិច្ច​របស់​កូន​ខ្មែរ គ្រប់ៗ​រូប ” ៕/V​

ល្ខោន​ស្រមោល​ស្បែក​ធំ​របស់​កម្ពុជា

ទីតាំងផ្សាយពាណិជ្ជកម្ម

- Advertisment -

Most Popular