ដោយៈ ពៅនិមល / ភ្នំពេញៈ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងថាៈ សម្រាប់យុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក នឹងជួយកាត់បន្ថយច្រើន ទៅដល់ការធ្វើអាជីវកម្ម បែបអនាធិបតេយ្យ ពិសេសលើទីផ្សារអនឡាញ ដែលបង្ករភាពស្មុគស្មាញ យ៉ាងច្រើន ដល់អ្នកប្រើប្រាស់។
លោករដ្ឋមន្ត្រី ប៉ាន សូរស័ក្តិ បានមានប្រសាសន៍ដូច្នេះ ទៅកាន់ក្រុមអ្នកសារព័តមាន នៅក្រោយពិធីសម្ពោធ យុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក កាលពីព្រឹកថ្ងៃទី២៥ ខែវិច្ឆិកា ឆ្នាំ២០២០ នេះ ។
លោករដ្ឋមន្ត្រី ប៉ាន សូរស័ក្តិ បានលើកឡើងថាៈ ការលូតលាស់ របស់វិស័យឯកជន សព្វថ្ងៃនេះ មានភាពអនាធិបតេយ្យបន្តិច ក្នុងការប្រើប្រាស់ ពាណិជ្ជកម្មអេឡិចត្រូនិក ដូច្នេះត្រូវមានការសម្របសម្រួល កុំឱ្យមានភាពអសកម្ម ដោយត្រូវគ្រប់គ្រង ឱ្យបានច្បាស់លាស់ និងគ្រប់ជ្រុងជ្រោយ ដើម្បីជំរុញពាណិជកម្ម ប្រព័ន្ធអេឡិចត្រូនិក ឱ្យសមស្រប និងវិជ្ជមាន ជារៀងរហូត។
តាមការរាយការណ៍ របស់លោកស្រី តឹករ៉េត កំរង រដ្ឋលេខាធិការ ក្រសួងពាណិជ្ជកម្ម បានបញ្ជាក់ថាៈ ការរៀបចំយុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក ត្រូវបានផ្តួចផ្តើមឡើង ដោយយោងតាម គោលនយោបាយរបស់ រដ្ឋាភិបាល ក្នុងការជំរុញការប្រែក្លាយ សេដ្ឋកិច្ចឌីជីថល និងត្រៀមខ្លួន ដើម្បីទាញយកផលប្រយោជន៍ ពីបដិវត្តន៍ឧស្សាហកម្ម ៤.០ ។
លោកស្រី តឹករ៉េត កំរង បានបញ្ជាក់ទៀតថាៈ សម្រាប់យុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក មានមាសធាតុសំខាន់ ចំនួន ១០ រួមមាន៖ យុទ្ធសាស្ត្រគោលនយោបាយ និងផ្នែកសម្របសម្រួលស្ថាប័ន, ក្របខ័ណ្ឌច្បាប់ និងបទប្បញ្ញត្តិ, បទប្បញ្ញត្តិ សម្រាប់សហគ្រាសធុនតូច និងមធ្យម, ហេដ្ឋារចនាសម្ព័ន្ធ បច្ចេកវិទ្យាព័តមាន និងទូរកមនាគមន៍, ហេដ្ឋារចនាសម្ព័ន្ធជំនាញឌីជីថល, ប្រព័ន្ធទូទាត់, ភស្តុភារកម្ម ពាណិជ្ជកម្មក្នុងស្រុក, ពាណិជ្ជកម្ម ឆ្លងកាត់ព្រំដែន, ការទទួលបានហិរញ្ញប្បទាន និងព័តមានពាណិជ្ជកម្ម និងការគាំទ្រទីផ្សារ៕/V
