Home ព័ត៌មានជាតិ សង្គម ប្រកាស​បិទ​ផ្...

ប្រកាស​បិទ​ផ្សាយ ឯកសារ​ការវិនិច្ឆ័យ លើ​ការចុះបញ្ជី​ដីធ្លី មាន​លក្ខណៈ​ប្រព័ន្ធ ចំនួន ១៤០៩ ក្បាលដី នៅ​ឃុំ​តាំងក្រសាំង

​ដោយៈ ទេ​ពក​ង្រី / កំពង់ឆ្នាំងៈ នៅ​ព្រឹក​ថ្ងៃទី​២៥ ខែវិច្ឆិកា ឆ្នាំ​២០២០ នេះ រដ្ឋបាល​ដីធ្លី ខេត្តកំពង់ឆ្នាំង បានធ្វើ​ពិធី​ប្រកាស​បិទ​ផ្សាយ ជា​សាធារណៈ នូវ​ឯកសារ​ការវិនិច្ឆ័យ លើ​ការចុះបញ្ជី​ដីធ្លី មាន​លក្ខណៈ​ប្រព័ន្ធ ស្ថិតនៅ​ក្នុងភូមិ​គោក​ពួច ឃុំ​តាំងក្រសាំង ស្រុក​ទឹកផុស ខេត្តកំពង់ឆ្នាំង ដោយបាន​ប្រព្រឹត្តទៅ ក្រោម​វត្តមាន​លោក សាន់ យូ អភិបាលរង​ខេត្ត និង​ជា​ប្រធាន​គណៈកម្មាធិការ រដ្ឋបាលខេត្ត​កំពង់ឆ្នាំង ព្រមទាំង​មានការ​អញ្ជើញ​ចូលរួម លោក​សុខ សុ​ន្ធី អភិបាលរង​ស្រុក​ទឹកផុស​។​

​លោក ឈុន សុខ​កុ​ម្ភះ អនុប្រធាន​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី​ខេត្ត បានអោយដឹងថាៈ ក្រោយពី​បញ្ចប់​ការ​វាស់ របស់​ក្រុមការងារ គ្រប់គ្រង​តំបន់​វិនិច្ឆ័យ បានសម្រេច​បិទ​ផ្សាយ ជា​សាធារណៈ នូវ​ឯកសារ នៃ​ការវិនិច្ឆ័យ លើ​ការចុះបញ្ជី​ដីធ្លី មាន​លក្ខណៈ​ប្រព័ន្ធ មាន​ចំនួន ១៥០ គ្រួសារ ឋិត​នៅក្នុង​ភូមិ​គោក​ពួច ឃុំ​តាំងក្រសាំង ស្រុក​ទឹកផុស ខេត្តកំពង់ឆ្នាំង ដោយ​ប្រមូល​ទិន្នន័យ បាន​ចំនួន ១៤០៩ ក្បាលដី ក្នុងនោះ​មាន​ដី​កសិកម្ម ដី​លំនៅដ្ឋាន និង​ដី​ផ្សេងៗ ការបិទ​ផ្សាយ ពេលនេះ មាន​រយៈពេល តែ ១៥ ថ្ងៃ​ប៉ុណ្ណោះ ដោយ​រាប់ទាំង​ថ្ងៃ ឈប់សម្រាក​ផង​។​

​នៅក្នុង​ឱកាស​នោះ លោក សាន់ យូ បាន​សម្តែង​នូវ​ការ​កោត​ស​សើរ ដល់​ផ្នែក​គ្រប់គ្រង​តំបន់​វិនិច្ឆ័យ របស់​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី​ខេត្ត ដែល​បាន​ខិតខំ​យកចិត្តទុកដាក់ ក្នុងការ​បំរើសេវា​សាធារណៈ បាន​យ៉ាង​ល្អប្រសើរ ព្រោះ​បច្ចុប្បន្ន ប្រមុខ​រាជរដ្ឋាភិបាល កំពុង​យកចិត្តទុកដាក់ ទៅលើ​ការរៀបចំ​ផ្តល់​សិទ្ធិ​ស្របច្បាប់ ដល់​ប្រជាពលរដ្ឋ ក្នុងការ​កាន់កាប់​ដីធ្លី ដោយ​ស្របច្បាប់ ដោយមាន​ក្រសួង មន្ទីរ​ជា​សេនាធិការ​ស្រាប់ ។

​អភិបាលរង​ខេត្ត បានស្នើ​សុំអោយ​ប្រជាពលរដ្ឋ ដែលជា​ម្ចាស់​ក្បាលដី​ទាំងអស់ ចូលរួម​សហការ​ជាមួយ មន្ត្រី​គ្រប់គ្រង ក្នុង​តំបន់​នោះ ក្នុងពេល​បិទ​ផ្សាយ ដែលមាន​រយៈពេល ១៥ ថ្ងៃ ដោយ​ភ្ជាប់​មក​នូវ ឯកសារ ដូចជា ចុងសន្លឹក​សម្គាល់ ក្បាលដី ចេញ​ដោយ​ក្រុម​គ្រប់គ្រង​តំបន់​វិនិច្ឆ័យ សៀវភៅ​គ្រួសារ និង​សំបុត្រកំណើត ដើម្បី​ងាយស្រួល ក្នុងការ​ពិនិត្យ និង​ផ្ទៀងផ្ទាត់ បាន​ឆាប់រហ័ស ។ លោក​ក៍បាន​សំណូមពរ ដល់​ប្រជាពលរដ្ឋ​ទាំងអស់ រួមគ្នា​ការពារ និង​ទប់ស្កាត់​ជំងឺ​កូ​វីដ ១៩ ដោយ​អនុវត្តតាម​ការណែនាំ របស់​ក្រសួងសុខាភិបាល និង​ចូលរួម​គោរព​ច្បាប់​ចរាចរណ៍ អោយបាន​គ្រប់ៗ​គ្នា​៕/V​

ទីតាំងផ្សាយពាណិជ្ជកម្ម

- Advertisment -

Most Popular