Home ព័ត៌មានជាតិ សង្គម ​រដ្ឋមន្ត្រី​...

​រដ្ឋមន្ត្រី​ក្រសួងបរិស្ថានៈ កម្ពុជា ខិតខំ​ប្រឹងប្រែង ក្នុងការ​គ្រប់គ្រង​សំណល់​ទូទៅ ក៏ដូចជា​សំណល់​ក្នុង​សមុទ្រ​

​ដោយៈ ដេប៉ូ / ភ្នំពេញៈ កម្ពុជា​ខិតខំ​ប្រឹងប្រែង ក្នុងការ​គ្រប់គ្រង​សំណល់​ទូទៅ ក៏ដូចជា សំណល់​ក្នុង​សមុទ្រ ដោយ​បានធ្វើ​កាត់បន្ថយ ការប្រើប្រាស់ សម្ភារ​មួយ​ទឹក និង​សំណល់​ប្លា​ស្ទិ​ក​។ ជាមួយគ្នានេះ ក្រសួង បានផ្តល់​ជា​រ៉ឺម៉ក រថយន្ត​តូច ដើម្បី​ប្រមូល​សំរាម នៅតាម​ទីក្រុង​នានា បានធ្វើ​ផ្ទេរ​តួនាទី និង​ថវិកា ដល់​ថ្នាក់ក្រោម​ជាតិ ក្នុងការ​គ្រប់គ្រង​សំរាម​។ នេះ​ជាការ​ថ្លែង​របស់ លោក សាយ សំ​អាល់ រដ្ឋមន្ត្រី​ក្រសួងបរិស្ថាន​។​

​គូសបញ្ជាក់ថា នៅក្នុង​ពិធី​ចុះ​អនុស្សរណៈ យោគយល់​គ្នា លើ​ឯកសារ​គម្រោង ស្តីពី​ការទប់ស្កាត់ សំណល់​ប្លា​ស្ទិ​ក​សមុទ្រ រវាង​ស្ថានទូត​ជប៉ុន និង​កម្មវិធី​អភិវឌ្ឍន៍ សហប្រជាជាតិ (UNDP) នា​ថ្ងៃទី​២៥ ខែវិច្ឆិកា ឆ្នាំ​២០២០ នេះ លោក សាយ សំ​អាល់ រដ្ឋមន្ត្រី​ក្រសួងបរិស្ថាន បាន​ថ្លែង​អបអរ ចំពោះ​ក្រុមការងារ ដែល​បាន​ខិតខំ​ប្រឹងប្រែង ដើម្បី​សម្រេចបាន គម្រោង​នេះ​ឡើង ដែល​បញ្ជាក់​ពី​កិច្ចខិតខំ​ប្រឹងប្រែង ក្នុងការ​ការពារ​បរិ​ស្ថាន ហើយ​លោក​រដ្ឋមន្ត្រី ក៏បាន​ថ្លែងអំណរគុណ ដល់​ប្រទេស​ជប៉ុន និង​អង្គការសហប្រជាជាតិ ដែល​បាន​ជួយ​កម្ពុជា លើ​វិស័យ​នានា ក្រោយពី​កិច្ចព្រមព្រៀង​ប៉ារីស​។​

​លោក រដ្ឋមន្ត្រី បានលើកឡើង ពី​កិច្ចខិតខំ​ប្រឹងប្រែង​រប​ស់​កម្ពុជា ក្នុងការ​គ្រប់គ្រង​សំណល់​ទូទៅ ក៏ដូចជា សំណល់​ក្នុង​សមុទ្រ ដោយ​បានធ្វើ​កាត់បន្ថយ ការប្រើប្រាស់​សម្ភារ​មួយ​ទឹក និង​សំណល់​ប្លា​ស្ទិ​ក ផ្តល់​ជា​រ៉ឺម៉ក រថយន្ត​តូច ដើម្បី​ប្រមូល​សំរាម នៅតាម​ទីក្រុង​នានា បានធ្វើ​ផ្ទេរ​តួនាទី និង​ថវិកា​ដល់ ថ្នាក់ក្រោម​ជាតិ ក្នុងការ​គ្រប់គ្រង​សំរាម ក៏ដូចជា​ជំរុញ​ការបង្កើត និង​លើកទឹកចិត្ត​ដល់​សាលា​មេត្រីភាព​បរិស្ថាន និង​អារាម​មេត្រីភាព​បរិស្ថាន​។ រាជរដ្ឋាភិបាល ក៏បាន​សហការ និង​ជំរុញ​ដល់​វិស័យ​សាធារណៈ និង​ឯកជន​នានា ដើម្បី​ធ្វើការ​កាត់បន្ថយ និង​ដោះស្រាយ​បញ្ហា​សំណល់​ប្លា​ស្ទិ​ក​។​


​រដ្ឋមន្ត្រី​ក្រសួងបរិស្ថានៈ កម្ពុជា ខិតខំ​ប្រឹងប្រែង ក្នុងការ​គ្រប់គ្រង​សំណល់​ទូទៅ ក៏ដូចជា​សំណល់​ក្នុង​សមុទ្រ​

​ជាមួយគ្នានេះ លោក សាយ សំ​អាល់ បាន​ថ្លែង​ដែរ​ថា កម្ពុជា​នឹង​បន្ត​កិច្ចខិតខំ​ប្រឹងប្រែង បន្ថែមទៀត ក្នុងការ​ថែរក្សា​បរិស្ថាន នៅតាម​តំបន់​ឆ្នេរសមុទ្រ ឱ្យ​ល្អ​ស្អាត​។ ការរៀបចំ​ដាក់​ប្រព័ន្ធ​ចម្រោះ​ទឹកស្អាត សម្រាប់​បរិភោគ ដើម្បី​កាត់បន្ថយ សំណល់​ប្លា​ស្ទិ​ក និង​ការដាក់​អំពូល​ពន្លឺព្រះអាទិត្យ ដើម្បី​សន្សំសំចៃ ចរន្តអគ្គិសនី នៅតាម​សាលារៀន និង​នៅតាម​ទីធ្លា​សាធារណៈ​នានា សម្រាប់​បម្រើ​ផលប្រយោជន៍​សាធារណៈ ដូចជា​បាននិងកំពុង​ធ្វើ នៅលើ​ទឹកដី ខេត្ត​ព្រះសីហនុ​។ ការអប់រំ​ផ្សព្វផ្សាយ នៅតែ​ជា​ចំណុច​សំខាន់​ជាងគេ ពិសេស​ការបញ្ជ្រាប​ចំណេះដឹង វិទ្យាសាស្ត្រ បច្ចេកវិទ្យា និង​បរិស្ថាន ទៅក្នុង​កម្មវិធីសិក្សា ដើម្បី​កែប្រែ​ឥរិយាបថ របស់​ប្រជាជន ពិសេស​កុមារ និង​យុវជន ដើម្បី​ជៀសវាង ក្នុងការ​បង្កើត​សំរាម បើ​មិនចាំបាច់​។​

​ដោយឡែក Mikami Masahiro ឯកអគ្គរាជទូត​វិសាមញ្ញ និង​ពេញ​សមត្ថភាព នៃ​ប្រទេស​ជប៉ុន ប្រចាំ​កម្ពុជា​បានឱ្យដឹងថាៈ «​ការបំពុល​ប្លា​ស្ទិ​ក នៅតាម​សមុទ្រ បាន​ក្លាយជា​វិបត្តិ​បរិស្ថាន ដ៏​ធំ​បំផុត​មួយ នៅក្នុង​ពិភពលោក​។ ក្នុង​កិច្ចប្រជុំ​កំពូល ប្រទេស G20 ដែល​ធ្វើឡើង នៅ​ទីក្រុង​អូ​សា​កា កាលពី​ឆ្នាំ​២០១៩ រដ្ឋាភិបាល​ជប៉ុន បានប្រកាស​អនុវត្ត គំនិត​ផ្ដួចផ្ដើម​ថ្មី​មួយ ដើម្បី​ជំរុញឱ្យមាន ការចាត់វិធានការ ប្រកបដោយ​ប្រសិទ្ធភាព ប្រឆាំង​ទៅនឹង​ការបំពុល​ប្លា​ស្ទិ​ក នៅតាម​សមុទ្រ​។​»


​រដ្ឋមន្ត្រី​ក្រសួងបរិស្ថានៈ កម្ពុជា ខិតខំ​ប្រឹងប្រែង ក្នុងការ​គ្រប់គ្រង​សំណល់​ទូទៅ ក៏ដូចជា​សំណល់​ក្នុង​សមុទ្រ​

​លោក​បាន​មានប្រសាសន៍ថាៈ ការកើនឡើង នូវ​សំណល់​ប្លា​ស្ទិ​ក បាន​ក្លាយជា​បញ្ហា​ប្រឈម​មួយ ក្នុងចំណោម​បញ្ហា​ប្រឈម​ធំៗ ជាងគេ ក្នុង​ពិភពលោក នាពេល​បច្ចុប្បន្ននេះ​។ សម្ភារ​ប្រើប្រាស់ ដែល​ធ្វើ​ពី​ប្លា​ស្ទិ​ក ដូចជា​ថង់ ដប និង​ប្រដាប់​ដាក់​វត្ថុ​នានា បច្ចុប្បន្ននេះ មាន​វត្ត​មាននៅ​គ្រប់ទិសទី ក្នុងផ្ទះ ក្នុង​សាលារៀន និង​ក្នុង​កន្លែងធ្វើការ​របស់​យើង​។ ប៉ុន្តែ​ការប្រើប្រាស់ ឥត​សំចៃ​បែបនេះ បាន​បង្ក​នូវ​ផលប៉ះពាល់ ដ៏​ធ្ងន់ធ្ងរ​។ បរិមាណ​ប្លា​ស្ទិ​ក​សរុប ក្នុង​សកលលោក​ទាំងមូល បាន​កើន​ឡើងដល់ ៨,៣ ពាន់​លាន​តោន​។ ជា​រៀងរាល់ឆ្នាំ មាន​ប្លា​ស្ទិ​ក ១៣ លាន​តោន ហូរ​ចូលទៅក្នុង​សមុទ្រ ដែល​ស្មើនឹង​ការចាក់សំរាម មួយ​ឡាន ដឹក​សំរាម​ពេញ រៀងរាល់​មួយ​នាទី​ម្ដង​។ សំណល់​ប្លា​ស្ទិ​ក ប្រមាណ ៩០ ភាគរយ ដែល​ហូរ​ចូលទៅក្នុង​សមុទ្រ មាន​ប្រភពពី​ទន្លេធំៗ ចំនួន ១០ ដែល​ក្នុងនោះ មាន​ទន្លេមេគង្គ មួយ​ផងដែរ​។​

​គួរ​បញ្ជាក់ថា គម្រោង​ខាងលើនេះ ត្រូវបាន​អនុវត្ត​ដោយ ក្រសួងបរិស្ថាន ក្រុមប្រឹក្សា​ជាតិ​អភិវឌ្ឍន៍ ដោយ​ចីរភាព និង UNDP ដោយមាន​គោលបំណង​ទប់ស្កាត់ និង​កាត់បន្ថយ​ឱ្យបាន ជា​អតិបរមា​នូវ ការបំពុល​ដោយ​សំណល់ ប្លា​ស្ទិ​ក​លើដី និង​ក្នុង​សមុទ្រ តាមរយៈ​ការជំរុញ​ឱ្យមាន ការអនុវត្ត​តាម​គោលការណ៍ 4Rs (​កុំ​ប្រើ​-Refuse កាត់បន្ថយ​-Reduce ប្រើ​ឡើងវិញ​-Reuse និង​កែច្នៃ​យកមកប្រើ​ប្រាស់​-Recycle)៕/V


​រដ្ឋមន្ត្រី​ក្រសួងបរិស្ថានៈ កម្ពុជា ខិតខំ​ប្រឹងប្រែង ក្នុងការ​គ្រប់គ្រង​សំណល់​ទូទៅ ក៏ដូចជា​សំណល់​ក្នុង​សមុទ្រ​

ទីតាំងផ្សាយពាណិជ្ជកម្ម

- Advertisment -

Most Popular