Home ព័ត៌មានជាតិ សន្តិសុខ លួច​ដឹក​ជ​ញ្ជ...

លួច​ដឹក​ជ​ញ្ជួ​ន​ឈើ​ពី ខេត្តក្រចេះ មក​លាក់ទុក​ក្នុង​ទន្លេ នៅ​ស្រុក​ក្រូចឆ្មារ​

​ដោយៈ គង់​ហេង / ត្បូងឃ្មុំៈ ឈ្មួញ​ឈើ​ម្នាក់ ប្រចាំ​ឃុំ​ជំនីក ស្រុក​ក្រូចឆ្មារ បាន​លួច​ដឹក​ជ​ញ្ជួ​ន​ឈើ ពី​ខេត្តក្រចេះ ចំនួន បី ទូក ដែល​មួយ​ទូកៗ មាន​ចំណុះ ចាប់ពី ១៥ ទៅ ២០ ម៉ែត្រត្រីគុណ មក​លាក់​ក្នុង​ទន្លេមេគង្គ ម្តុំ​ផ្សារ​ជំនីក ស្រុក​ក្រូចឆ្មារ ដើម្បី​យកមក​ចែកចាយ លក់​បន្ត​។ ប៉ុន្តែ​នៅពេល​សមត្ថកិច្ច ចុះទៅ​បង្ក្រាប​ជាក់ស្តែង រកឃើញ​ឈើ​តែ​ជាង បី​ម៉ែត្រត្រីគុណ​ប៉ុណ្ណោះ ហើយ​បានប្រគល់​ឈើ ជា​វត្ថុតាង​ល្មើសច្បាប់​នោះ ទៅខាង​ម្ចាស់​ឈើ វិញទៀត​។​

​ប្រភពព័ត៌មាន ពី​កន្លែងកើតហេតុ ផ្សារ​ជំនីក បាន​និយាយថា នៅ​ម៉ោង​ប្រហែល ៧ ទៅ ៨ ព្រឹក​ថ្ងៃទី ២៥ ខែវិច្ឆិកា ឆ្នាំ​២០២០ សាច់ញាតិ​ឈ្មួញ​ឈើ ឈ្មោះ សា រំ​លី បាន​ដឹក​ជ​ញ្ជួ​ន​ឈើ ប្រភេទ​លេខ​១ និង​លេខ​២ ចំនួន បី​ទូក គឺ​ទូក​នីមួយៗ បាន​ចង​ឱប​បាច់​ឈើ សងខាង បណ្តែត​ទឹក ពី​តំបន់​កោះ​ខ្ញែរ ខេត្តក្រចេះ មក​រក្សាទុក នៅ​កំពង់ទឹក ខាងមុខ​ផ្សារ​ជំនីក​។​

​ប្រភពព័ត៌មាន​នោះ បានឱ្យដឹង​ទៀតថាៈ ប៉ុន្តែ​នៅពេល​ចូលដល់ ចំណុច​កំពង់ទឹក ឈ្មួញ​ម្នាក់នេះ បាន​ប្រើល្បិច កាត់​ទម្លាក់​ក្រសោប​ឈើ ចំនួន​ពីរ ទូក ហើយ​ឱ្យ​ទូក ពីរ​គ្រឿង​នោះ បើក​ឡើង​សំដៅទៅ​ទិស​ខេត្តក្រចេះ ដឹកឈើ​បន្ថែមទៀត ដោយ​ទុក​ទូក​ឈើ មួយគ្រឿង ដើម្បី​លើកឡើង​គោក លក់​ចែកចាយ​បន្ត​។​

ឈ្មួញលួច​ដឹក​ជ​ញ្ជួ​ន​ឈើ​ពី ខេត្តក្រចេះ មក​លាក់ទុក​ក្នុង​ទន្លេ នៅ​ស្រុក​ក្រូចឆ្មារ​

​ប្រភព​ដដែល បាន​បន្តថាៈ ទូក​ឈើ​មួយគ្រឿង​នោះ បាន​ទុក​នៅ​កំពង់ទឹក ដដែល​នោះ រហូតដល់​រសៀល ថ្ងៃទី ២៥ វិច្ឆិកា ក៏ត្រូវ​អ្នកសារព័ត៌មាន ថត​បាន​រូបភាព ប្តឹង​ឱ្យ​សមត្ថកិច្ច ចាត់ការ​តាមច្បាប់​។​

​ក្រោយពី​មាន​បណ្តឹង ខាង​មន្ត្រីរដ្ឋបាល​ព្រៃឈើ ខេត្ត​ត្បូងឃ្មុំ បាន​សុំ​ការសហការ បង្ក្រាប​បទល្មើស​ព្រៃឈើ គឺ​ប្រមាណ ពីរ ម៉ោង​ក្រោយ​បណ្តឹង ទើប​ឃើញ​វត្តមាន មន្ត្រីនគរបាល​ប៉ុ​ស្ត៍​ឃុំ​ជំនីក ទៅដល់​ខណៈ​ស្នាក់ការ​ប៉ុស្តិ៍នគរបាល​រដ្ឋបាល​នេះ នៅ​ចម្ងាយ​ពី​កន្លែងកើតហេតុ ប្រហែល ៥០០ ម៉ែត្រ​នោះ​។​

​ប្រភព​បាន​បន្ថែមថាៈ ប៉ុន្តែ​អ្វី​ដែលជា​កំហុស ធ្ងន់ធ្ងរ​បន្ថែមទៀត គឺ​លោក ស្លេះ ម៉ាត់ ជា​មេឃុំ​ជំនីក បាន​យក​សំណើ របស់​ម្ចាស់​ឈើ ឈ្មោះ សា រំ​លី ជា​សាច់ញាតិ​តា​លី តាមរយៈ​មេភូមិ​បន្ទាយ លោក ស្មាន សុខ​ព្រី និង​លោក សា កូប មេឃុំ​ជំនីក​ស្តីទី សុំ​ទៅ​នាយផ្នែក​រដ្ឋបាល ព្រៃឈើ​ឆ្លូង ខេត្តក្រចេះ មក​បង្ហាញ​ប្រាប់ សមត្ថកិច្ច គឺ​ក្នុង​សំណើ​នោះ ឈើ​មាន​ចំនួន ៣០ ម៉ែត្រត្រីគុណ ដើម្បី​ធ្វើ​ផ្ទះ គឺ​លោក ស្លេះ ម៉ាត់ ជា​មេឃុំ​ថា អ្នកសរសេរ​សំណើ​ច្រឡំ តាមពិត​សំណើ​ឈើ តែ​ចំនួន បី ម៉ែត្រត្រីគុណ​ប៉ុណ្ណោះ​។ ចំណែក​ឈើ​មួយ​ទូក ដែល​ចក​នៅ​កំពង់​នោះ ត្រូវបាន​សមត្ថកិច្ច អនុញ្ញាតឱ្យ​ម្ចាស់​ទូក​ជម្លៀសចេញ យក​លេស​ថា យកទៅ​ចាក់​ប្រេង​។​

​លោក សា រំ​លី ជា​ម្ចាស់​ឈើ រង​ការចោទប្រកាន់ បាន​ឆ្លើយ​បកស្រាយ នៅ​ថ្ងៃទី ២៦ វិច្ឆិកា​ថា ឈើ​ចំនួន បី ម៉ែត្រគូប​ជាង ដែល​សមត្ថកិច្ច​មេព្រៃ កំពុង​វាស់វែង​នេះ គឺ​លោក​បាន​ទៅ​ទូទាត់ អ្នក​ជំពាក់​ប្រាក់​ឳ​ពុក​ក្មេក របស់លោក នៅឯ​ភ្នំ​សុ​ព័រ​កាឡី ខេត្តក្រចេះ​។ ចំណែក​ឈើ ចំនួន ៣០ ម៉ែត្រគូប ក្នុង​សំណើ​ទៅខាង​មេព្រៃ​ឆ្លូង ខេត្តក្រចេះ គឺ​លោ​កនៅ​មិនទាន់បាន ប្រមូល​ទិញ​បានទេ​។​

​ម្ចាស់​ឈើ បាន​បកស្រាយ​ទៀតថាៈ ចំណែក​ការចោទប្រកាន់ថា បាន​ជម្លៀស​ឈើ ចេញពី​កំពង់ទូក មុន​សមត្ថកិច្ច​មកដល់ និង​ចោទថា ខាង​លោក បាន​កាត់​ក្រសោប​ឈើ ទម្លាក់​លាក់ទុក ក្នុង​ទន្លេ​ចំនួន ពីរ​ទូក គឺជា​ការចោទប្រកាន់ ខុសស្រឡះ ដោយ​សុំ​ស្បថ ស្លាប់ចោល​ប្រពន្ធ និង​កូន​។​

ឈ្មួញលួច​ដឹក​ជ​ញ្ជួ​ន​ឈើ​ពី ខេត្តក្រចេះ មក​លាក់ទុក​ក្នុង​ទន្លេ នៅ​ស្រុក​ក្រូចឆ្មារ​

​លោក ស្លេះ ម៉ាត់ មេឃុំ​ជំនីក បាន​ឆ្លើយថាៈ ទូក​ឈើ​របស់​ឈ្មោះ សា រំ​លី ដែល​យើង​បានឃើញ​ជាក់ស្តែង តែមួយ​ទូក​នេះ​ទេ​។ ដោយឡែក ក្រៅពីនោះ លោក​អត់​ដឹង​ទេ គឺ​មួយ​នេះ បាន​សុំ​ខាង​លោក យកមក​សាងសង់​ផ្ទះ មិនមែន​ធ្វើ​អាជីវកម្ម​ទេ​។ ចំណែក​សំណើសុំ​ដាក់​ធ្វើ​ផ្ទះ ចំនួន ៣០​ម៉ែត្រគូប​នោះ គឺ​ក៏​លើស​បរិមាណ នៃ​ការ​សា​សង់ផ្ទះ​ដែរ​។​

​លោក សាន់ សុខ​វ៉ាន់ នាយរង​សង្កាត់រដ្ឋបាល​ព្រៃឈើ ក្រូចឆ្មារ បាន​ប្រាប់ថាៈ នៅ​ព្រឹក​ថ្ងៃទី​២៦ វិច្ឆិកា​នេះ ក្រុមការងារ បាន​ចុះមក​វាស់វែង ឈើ​មួយ​ទូក និង​រុក​រាវរក តាម​ព័ត៌មាន​ថា មាន​លាក់​ក្រសោប​ឈើ ចំនួន​ពីរ​ទូក បន្ថែមទៀត ក្នុង​ទន្លេ​នោះ​។ ជា​លទ្ធផល យើង​បាន​រកឃើញ​ឈើ ជាក់ស្តែង ក្នុង​ទូក​មួយគ្រឿង​នោះ ចំនួន ៣,៤១០ ម៉ែត្រគូប ជា​ប្រភេទ​ឈើ​លេខ​២ ឈើទាល ហើយ​ចំនួន​ឈើ ពី​រទូ​កថា​លាក់ទុក ក្នុង​ទន្លេ យើង​រុក​រាវរក​មិនឃើញ​ទេ​។​

​លោក​នាយរង បាន​បន្តថាៈ បញ្ហា​សំណើ ខាង​ម្ចាស់​ឈើ បានស្នើ​តាមរយៈ​អាជ្ញាធរ​ភូមិ ឃុំ​នោះ ជា​សំណើ​ខុសច្បាប់ គឺ​មេឃុំ មិ​ោ​ន​មាន​សិទ្ធិ​អនុញ្ញាត លើ​សំណើ​ឯកភាព លើ​ការដឹក​ជ​ញ្ជួ​ន អនុផល​ព្រៃឈើ​បានទេ​។ ប៉ុន្តែ​ឈើ​ចំនួន​ជាង បី​ម៉ែត្រ ខាងលើ ថ្នាក់លើ បានសម្រេច​ប្រគល់ឱ្យ ម្ចាស់​ឈើ សា រំ​លី ដោយសារ​មាន​សំណើសុំ​ពី​ខាង​អាជ្ញាធរ​ស្រុក និង​ឃុំ ឱ្យ​សាង​សង់ផ្ទះ តាម​សំណើ​៕/V

ទីតាំងផ្សាយពាណិជ្ជកម្ម

- Advertisment -

Most Popular