Home ព័ត៌មានជាតិ សន្តិសុខ ស្ត្រី​២​នាក់...

ស្ត្រី​២​នាក់ បាន​ស្លាប់ និង ១១​នាក់ ផ្សេងទៀត កំពុង​ត្រូវបាន​សង្គ្រោះបន្ទាន់ ដោយសារ​ផឹកទឹក នៅក្នុង​ស្រែ​

ដោយៈ ទេ​ពក​ង្រី / កំពង់ឆ្នាំងៈ ស្ត្រី ២ នាក់ បាន​ស្លាប់ និង ១១ នាក់​ផ្សេងទៀត មាន​អាកា​រៈ​ធ្ងន់ និង​ស្រាល ហើយ​កំពុង​ត្រូវបាន សង្គ្រោះបន្ទាន់ នៅ​មន្ទីរពេទ្យបង្អែក ខេត្តកំពង់ឆ្នាំង បន្ទាប់ពី​ជនរងគ្រោះ​ទាំងអស់ ច្រូត ស្រូវ​រួច បាននាំគ្នា​ផឹកទឹក នៅក្នុង​ស្រែ ក្រោយពេល​ហូបបាយ​ថ្ងៃត្រង់ ធ្វើអោយមាន​ការពុល ។ ហេតុការណ៍​ដ៏​ភ្ញាក់ផ្អើល​នេះ បានកើត​ឡើង នៅវេលា​ម៉ោង ៦ ល្ងាច ថ្ងៃទី​២៥ ខែវិច្ឆិកា ឆ្នាំ​២០២០ នៅក្នុង​ភូមិ​ជី​ប្រ៉​ង ឃុំ​ជៀប ស្រុក​ទឹកផុស ខេត្តកំពង់ឆ្នាំង​។​

​ស្ត្រី​ដែលជា​ជនរងគ្រោះ ដល់​បាត់​បង់ជីវិត ករណី​ពុល​ទឹក ក្នុង​ស្រែ​នេះ មានៈ ១-​ឈ្មោះ ណុល វ៉ា​រ៉ុ​ម អាយុ ៤៥ ឆ្នាំ និង​២-​ឈ្មោះ ម៉ៅ ចិន្តា អាយុ ៤៧ ឆ្នាំ ។​

​លោក ភួង ជី​ម អាយុ ៥០ ឆ្នាំ ជា​ក្រុមគ្រួសារ​ជនរងគ្រោះ បាន​ប្រាប់​រស្មី​កម្ពុជា​ឲ្យ​ដឹងថាៈ នៅ​ថ្ងៃទី​២៥ ខែវិច្ឆិកា កន្លងទៅនេះ ប្រជាពលរដ្ឋ និង​ម្ចាស់​ស្រែ មាន​ចំនួន ១៣ នាក់ និង​មាន​ក្មេងស្រី​ម្នាក់​ផងដែរ បាននាំគ្នា​ទៅ​ច្រូតស្រូវ នៅ​ខាងត្បូង ភូមិ​ជី​ប្រ៉​ង ។​

​លោក ជី​ម បានបញ្ជាក់​ថាៈ នៅ​ផ្នែក​ខាងលើ នៃ​ស្រែ​នោះ មាន​ចម្ការឪឡឹក​មួយ ដែល​ម្ចាស់​ចម្ការឪឡឹក​នោះ បាន​យក​ទឹក​អណ្តូង នៅក្នុង​ស្រែ មក​លាយ​ថ្នាំពុល ហើយ​យកមក​បាញ់ សម្លាប់​សត្វល្អិត ។​

​លោក ភួង ជី​ម បាន​ប្រាប់​បន្ថែមទៀតថាៈ នៅក្នុង​ស្រែ​នោះ មានកូន​អណ្តូង​តូច​មួយ ដែល​ចេញ​ទឹក ហើយ​ម្ចាស់​ស្រែ បាន​ដង​យក​ទឹក មក​ចែកគ្នា​ផឹក ក្រោយពី​ច្រូតស្រូវ​រួចហើយ នាំគ្នា​ហូបបាយ​ថ្ងៃត្រង់ ។

​ក្រោយពី​ហូបបាយ និង​ផឹកទឹក​រួច រហូតដល់​ម៉ោងជាង ៤ រសៀល ថ្ងៃទី​២៥ វិច្ឆិកា នេះ ជនរងគ្រោះ​ទាំងអស់ ចាប់ផ្តើម​មាន អា​ការៈពុល ក្អួតចង្អោរ​ជាខ្លាំង និង​អ្នក​ផ្សេងទៀត បាន​ពុល​ជា​បន្តបន្ទាប់ ហើយ​បាន​ត្រូវ​ដឹកបញ្ជូន មក​មណ្ឌល​សុខភាព ស្រុក​ទឹកផុស ប៉ុន្តែ​ដោយសារតែ​អា​ការៈពុល ធ្ងន់ធ្ងរ​ខ្លាំងពេក ត្រូវបាន​ដឹកបញ្ជូន​បន្ត មកកាន់​មន្ទីរពេទ្យបង្អែក​ខេត្ត នៅ​ម៉ោង ៩ យប់ នា​ថ្ងៃ​ដដែល ។

​លោក​បាន​បញ្ជាក់ថាៈ ដោយសារតែ​អាកា​រៈ​ធ្ងន់ធ្ងរ រហូតដល់​ម៉ោងជាង ១២ ពាក់​កណ្តាលអធ្រាត្រ ស្ត្រី​ម្នាក់ ជា​ម្ចាស់​ស្រែ បាន​ស្លាប់ និង​នៅ​ម៉ោង ៥​និង​៤៥​នាទី ល្ងាច ថ្ងៃទី​២៦ ខែវិច្ឆិកា ក៏​បណ្តាល​ឲ្យ​ស្ត្រី​ម្នាក់ទៀត បាន​ស្លាប់ នៅក្នុង​មន្ទីរពេទ្យ​ខេត្ត ។ រហូតមកដល់​ថ្ងៃទី​២៦ វិច្ឆិកា ម្សិលមិញ​នេះ អ្នកជំងឺ​ទាំង ១១ នាក់ កំពុង​សម្រាក​ព្យាបាល នៅ​មន្ទីរពេទ្យបង្អែក ខេត្តកំពង់ឆ្នាំង នៅឡើយ ហើយ​គ្រូពេទ្យ កំពុង​យកចិត្តទុកដាក់ តាមដាន​ស្ថានភាព​សុខភាព និង​អាការៈរោគ របស់​ជនរងគ្រោះ​ទាំងនោះ​។​

​ទាក់ទិន​នឹង​ករណីនេះ សមត្ថកិច្ច​ជំនាញ ជាពិសេស​ខាង​មន្ទីរ​សុខាភិបាល​ខេត្ត កំពុងធ្វើការ​ស្រាវជ្រាវ រក​មូលហេតុ​ពិត ឲ្យ​ឃើញ​ច្បាស់លាស់​ថា បណ្តាល​មក​អ្វី ៕/V​

ទីតាំងផ្សាយពាណិជ្ជកម្ម

- Advertisment -

Most Popular