Home ព័ត៌មានអន្តរជាតិ ត្រាំ​និយាយថា...

ត្រាំ​និយាយថា លោក​នឹង​ចាកចេញ​ពី​សេត​វិមាន បើ​តំណាង​បោះឆ្នោត​គាំទ្រ​បៃ​ដិន តែ​…

​ប្រែ​សម្រួលៈ​វាសនា​/​វ៉ាស៊ីនតោន​៖​ប្រធានាធិបតី​ជិត​ចេញពី​តំណែង លោក​ដូណាល់ ត្រាំ តាំងពីដើម​រៀងមក​មិន​ដែល​ទទួលស្គាល់​បរាជ័យ​ចំពោះ​អ្វី​ដែល​លោក​ហៅថា «​ការបោះឆ្នោត​មាន​ការលួចបន្លំ​» និង​ប្តេ​​ជ្ញាប​ន្ត​ការតស៊ូ​ផ្លូវច្បាប់​ដើម្បី​ធានា​ថា គ្រប់​សន្លឹកឆ្នោត​ដែល​បោះ​ក្នុង​ការបោះឆ្នោត​នា​ថ្ងៃ​០៣​វិច្ឆិកា ត្រឹមត្រូវ​តាមច្បាប់​។​

​ត្រាំ បាន​និយាយ​កាលពី​ថ្ងៃ​ព្រ​សហ្ប​តិ៍ថា លោក​នឹង​ចាកចេញ​ពី​សេត​វិមាន ប្រសិនបើ​ការបោះឆ្នោត​ដោយ​តំណាង​តាម​រដ្ឋ (អង្គបោះឆ្នោត)គាំទ្រ​គូប្រជែង ចូ បៃ​ដិន ជា​អ្នកឈ្នះ​ក្នុង​ការបោះឆ្នោត​ប្រធានាធិបតី​ឆ្នាំ​២០២០​។​

ប្រធានាធិបតី​ជិត​ចេញពី​តំណែង លោក​ដូណាល់ ត្រាំ

​ទោះជា​យ៉ាងណា លោក​បាន​បន្ថែមថា បើ​តំណាង​តាម​រដ្ឋ​បោះឆ្នោត​អោយ​បៃ​ដិ​ន វា​នឹង​ជា​«​កំហុស​»​មួយ​។​

​នៅពេល​ត្រូវ​បាន​សួរថា​តើ​លោក​នឹង​នឹង​ចាកចេញ​ពី​និវេសដ្ឋាន​ប្រធានាធិបតីនៅថ្ងៃ​ចូល​កាន់តំណែង​ទី​២០​មករា​ឆ្នាំ​២០២១​ទេ បើសិនជា​លោកបៃ​ដិន​ត្រូវ​បាន​បញ្ជាក់ថា​ជា​អ្នកឈ្នះ លោក​ត្រាំ​បាន​ប្រាប់​​ទៅ​អ្នកយកព័ត៌មាន​ថា «​ពិតណាស់ ខ្ញុំ​នឹង​ចាកចេញ ហើយ​អ្នកនឹង​ដឹង​តែ​វា​ពិបាក​ណាស់​ក្នុង​ការទទួលស្គាល់​បរា​ជ័យ​»​។​

​លោក​ប្រធានាធិបតី ក៏​បាន​រិះគន់​ប្រព័ន្ធ​បោះឆ្នោត​អាម៉េរិក ថា​វា​ដូចជា​ប្រព័ន្ធ​នៅក្នុង​ប្រទេស​កំពុងអភិវឌ្ឍន៍​មួយ គឺថា​«​យើង​ហាក់ដូចជា​ប្រទេស​តតីយ​លោក​មួ​យ​»​។​

​ទោះជាត្រាំនៅមិនទាន់ទទួលស្គាល់បរាជ័យក្នុងការបោះឆ្នោត ក៏គូប្រជែង បៃដីន បានត្រៀមក្រុមរដ្ឋាភិបាលថ្មីមួយរួចហើយ

មក​ត្រឹម​ថ្ងៃ​សុក្រ​នេះ អង្គការ​សារព័ត៌មាន​ធំៗ ប៉ាន់ស្មាន​ថា​លោក​បៃដិនជា​ប្រធានាធិបតី​ជាប់ឆ្នោត តែ​លោក​ត្រាំ​ជំទាស់​នឹង​ការប៉ាន់ស្មាន​នេះ ដោយ​ថា​ការបោះឆ្នោត​«​ត្រូវ​បាន​លួច​បន្លំ​»​ដោយ​ពួក​ប្រជា​​ធិបតេយ្យ​ដើម្បី​បេក្ខជន​របស់​គេ​។​ក្រុម​យុទ្ធនាការ​របស់​លោក​បាន​ដាក់​ពាក្យបណ្តឹង​ជាច្រើន នៅតាម​រដ្ឋ កន្លែង​ដែល​ពួក​គេ​គិត​ថា​មាន​ការលួចបន្លំ​សន្លឹកឆ្នោត​ទ្រង់ទ្រាយ​ធំ​និង​មាន​ភាពមិនប្រក្រតី​​ខ្លាំង​។​

​ក្នុងការ​និយាយ​ទូរស័ព្ទ​ទៅកាន់​សវនាការ​សាធារណៈ​មួយ​នៅ​រដ្ឋ​ផេនស៊ី​លវែ​នៀ លោក​ត្រាំ​បាន​និយាយថា​« នេះ​ជា​ការបោះឆ្នោត​ដែល​យើង​ឈ្នះ​ដោយ​ស្រួល យើង​បាន​ឈ្នះ​ជាច្រើន​។​យើង​មាន​ភស្តុតាង​ដើម្បី​​ដណ្តើម​ជ័យជម្នះ​មកវិញ តែ​ត្រូវការ​មាន​ចៅក្រម​អព្យាក្រិត​មួយដើម្បី​ស្តាប់​ទឡ្ហីករណ៍​របស់​យើង​»​។​

​ក្រៅ​ពី​ផេនស៊ី​លវែ​នៀ រដ្ឋ​មី​ឈី​ហ្គឹ​ន ណេវ៉ា​ដា និង​ច​ច​ជៀ បានបញ្ជាក់​ជ័យជម្នះ​លើ​បៃ​ដិ​ន ខណៈ​ដែល​រដ្ឋ​ដទៃ​ទៀត​នៅ​មិនទាន់​ប្រកាសនរ​ណា​ឈ្នះ​ចាញ់​នៅឡើយ​។​

​ទោះជា​ប្តេជ្ញា​បន្ត​ការតវ៉ា​ផ្លូវ​ច្បាប់​ចំពោះ​លទ្ធផល​ឆ្នោត ក៏​រដ្ឋការ​ត្រាំ​បានអនុញ្ញាត​អោយ​ចាប់ផ្តើម​ដំណើរការ​ផ្ទេរអំណាច​ទៅកាន់​លោកបៃ​ដិន​ផងដែរ ហើយ​លោកបៃ​ដិ​នក៏បាន​ប្រកាស​ជ្រើសរើ​សមនុស្ស​​មួយចំនួន​សំរាប់​មុខតំណែង​សំខាន់ៗ​រួច​ហើយ​សំរាប់​រដ្ឋាភិបាល​អាម៉េរិក​បន្ទាប់​៕

ទីតាំងផ្សាយពាណិជ្ជកម្ម

- Advertisment -

Most Popular