Home ព័ត៌មានជាតិ សន្តិសុខ បញ្ជូន​បុរស​ជ...

បញ្ជូន​បុរស​ជនជាតិ​ចិន បួន​នាក់ ទៅ​សាលាដំបូង​ខេត្ត ដោយ​ជាប់​សង្ស័យ ជា​ក្រុម​ចាប់​ជម្រិត​មនុស្ស​

​ដោយៈ វណ្ណៈ / ព្រះសីហនុៈ លោក​ឧ​ត្ត​ម​សេនីយ៍​ទោ ជួន ណា​រិន្ទ ស្នងការ​នគរបាល ខេត្ត​ព្រះសីហនុ បាន​ឲ្យ​ដឹងថា នៅ​ព្រឹក​ថ្ងៃទី​២៧ ខែវិច្ឆិកា ឆ្នាំ​២០២០ នេះ កម្លាំង​ជំនាញ​នគរបាល​ព្រហ្ម​ទ័​ណ្ឌ បាន​កសាង​សំណុំរឿង បញ្ជូន​ជនសង្ស័យ ជា​ជន​ជាតិចិន ចំនួន​បួន​នាក់ ទៅ​សាលាដំបូង​ខេត្ត ដើម្បី​ចាត់ការ​តាមច្បាប់ ដោយ​ជាប់​សង្ស័យ ជា​ក្រុម​ចាប់​ជម្រិត​មនុស្ស និង​ពាក់​ស្លាក​លេខ រថយន្ត​ក្លែងបន្លំ​។

​លោក​ឧ​ត្ត​ម​សេនីយ៍ ស្នងការ បានបញ្ជាក់​ថាៈ គណៈបញ្ជាការ​ឯកភាព រដ្ឋបាល​ស្រុក​ព្រៃនប់ បាន​ដឹកនាំ​កម្លាំង ចុះ​ត្រួតពិនិត្យ​អាវុធជាតិផ្ទុះ និង​គ្រឿងញៀន នៅ​ចន្លោះ​បង្គោលគីឡូម៉ែត្រ លេខ ១៧៣-១៧៤ ស្ថិតនៅ​ភូមិ​ត្រពាំង​គា ឃុំ​ជើងគោ ស្រុក​ព្រៃនប់ ខេត្ត​ព្រះសីហនុ រហូតដល់​ពាក់កណ្តាល​អធ្រាត្រ ឈានចូល​ថ្ងៃទី​២៦ ខែវិច្ឆិកា ឆ្នាំ​២០២០ បាន​ត្រួតពិនិត្យ​រថយន្ត ១​គ្រឿង ម៉ាក​ស្តា​រិច ពណ៌​ស ស្លា​កលេ​ខៈ ភ្នំពេញ 2BC-6802 ដោយមាន​ជនជាតិ​ចិន បួន​នាក់ នៅក្នុង​រថយន្ត​នោះ​។ ក្នុងការ​ត្រួតពិនិត្យ​នេះ កម្លាំង​សមត្ថកិច្ច បាន​រកឃើញ​សម្ភារ​មួយចំនួន ដែលជា​ឧបករណ៍ប្រើប្រាស់ ក្នុង​ការចាប់​ជម្រិត​មនុស្ស ទើប​ធ្វើការ​ឃាត់ខ្លួន បុរស​ជនជាតិ​ចិន ទាំង​បួន​នាក់ ដែល​នៅក្នុង​រថយន្ត​តែម្តង​។​

​ជនសង្ស័យ​ជា​ជនជាតិ​ចិន ទាំង បួន​នាក់ រួមមានៈ ១-​ឈ្មោះ ZHANG GE XIN អាយុ ៥០​ឆ្នាំ ស្នាក់នៅ ភូមិ​១ សង្កាត់​២ ក្រុងព្រះសីហនុ , ២-​ឈ្មោះ LU LU អាយុ ៣៥​ឆ្នាំ ស្នាក់នៅ ភូមិ​១ សង្កាត់​២ ក្រុងព្រះសីហនុ , ៣-​ឈ្មោះ SONG JIA MING ភេទ​ប្រុស អាយុ ៣៧​ឆ្នាំ ស្នាក់នៅ​កាស៊ីណូ WM ស្ថិតនៅ​ភូមិ​៤ សង្កាត់​៤ ក្រុងព្រះសីហនុ និង​៤-​ឈ្មោះ JIANG BAO អាយុ ៤៣​ឆ្នាំ ស្នាក់នៅ​ភូមិ​១ សង្កាត់​២ ក្រុងព្រះសីហនុ ។ បុរស​ជនជាតិ​ចិន ទាំង​បួន​នាក់​នេះ មានមុខ​របរ មិន​ពិតប្រាកដ ហើយ​នៅពេល​សមត្ថកិច្ច ឃាត់ខ្លួន មិនមាន​លិខិតឆ្លងដែន យកតាម​ខ្លួន​នោះទេ​។

​ចំណែក​វត្ថុតាង ដែល​សមត្ថកិច្ច ចាប់យក​បាន​មាន -​ដំបងឆក់ ១​ដើម -​ខ្នោះដៃ ១​គូ -​ស្រោម​ខ្នោះ ១ -​ខ្សែលួស ១​ដុំ -​ម៉ាស់ ១៨ សន្លឹក -​មួក​កា​តិ​ប​ពណ៌​ខ្មៅ ៤ -​អាវធំ ១ ពណ៌​ខៀវ -​ស្បោង​ក្រណាត់​ខ្មៅ សម្រាប់​គ្រប​មុខ ១ -​ស្រោមដៃ ៥​គូ -​ទូរស័ព្ទដៃ ២​គ្រឿង (​ម៉ាក Iphone7 និង​ម៉ាក Samsung) -​រថយន្ត ១​គ្រឿង ម៉ាក ស្តា​រិច ពណ៌​ស ស្លា​កលេ​ខៈ ភ្នំពេញ 2BC-6802 (​ស្លាក​លេខ​ក្លែងបន្លំ​) ៕/V​

ទីតាំងផ្សាយពាណិជ្ជកម្ម

- Advertisment -

Most Popular