អគ្គិភ័យ​នៅ​មន្ទីរពេទ្យ​ឥណ្ឌា​សម្លាប់​អ្នកជំងឺ​កូវី​ដ​ចំនួន​៥​នាក់​

​ប្រែ​សម្រួលៈ​វាសនា​/​ញូ​វ ដេល្លី​៖ អគ្គិភ័យ​មួយ​បាន​កើត​ឡើង​កាលពី​ព្រឹក​ថ្ងៃ​សុក្រ​នៅ​មន្ទីរពេទ្យ​ឯកជន​មួយ​ដែល​ទទួល​ព្យាបាល​អ្នកជំងឺ​កូវី​ដ​១៩​នៅ​ឥណ្ឌា​ភាគ​ខាងលិច ដោយ​បាន​សម្លាប់​អ្នកជំងឺ​កូវី​ដ​​យ៉ាងតិច​៥​នាក់ និង​២៨​នាក់​ទៀត​រងរបួស​។​

​នាយ​ប៉ូលិស​ឈ្មោះ ខេ អ៊ែ​ន ប៊ូ​កាន់ បាន​និយាយថា ឡាន​បាន​បាញ់​ទឹក​ដើម្បី​បន្ថយ​អណ្តាតភ្លើង​អោយ​នៅ​ត្រឹម​ឆេះ​តែមួយ​ជាន់​នៃ​អាគារ​មន្ទីរពេទ្យ និង​បាន​ពន្លត់​វា​ដោយ​ប្រើពេល​អស់​៣០​នាទី​។​​មូលហេតុ​នៃ​អគ្គិភ័យ​នេះ កំពុង​ត្រូវបាន​ស៊ើបអង្កេត​។​

​សារព័ត៌មាន​The Press Trust of India បាន​និយាយថា អគ្គិភ័យ​នេះ​បាន​ចាប់ផ្តើម​នៅ​បន្ទប់​សង្គ្រោះ​បន្ទាន់​នៃ​មន្ទីរពេទ្យ​Uday Shivanand Hospital ដែល​កំពុង​ព្យាបាល​អ្នកជំងឺ​កូវី​ដ​១៩​ចំនួន​៣៣​នាក់​។​

​អ្នកជំងឺ​រលាកភ្លើង​ខ្លះ​ត្រូវបាន​ជម្លៀស​ទៅកាន់​មន្ទីរពេទ្យ​មួយទៀត​នៅ​ក្រុង រ៉ា​ច​កុត ក្នុង​រដ្ឋ​ហ្គូ​ចា​រ៉ា​ត​។​

​កាលពី​ខែ​សីហា អគ្គិភ័យ​នៅ​មន្ទីរពេទ្យ​ដាក់​អ្នកជំងឺ​កូវី​ដ​១៩​មួយ​នៅ​ក្រុង​អា​ម៉េ​ដា​បាត ក្នុង​រដ្ឋ​ហ្គូ​ចា​រ៉ា​ត បានសម្លាប់​អ្នកជំងឺ​កូវី​ដ​ចំនួន​៨​នាក់​។​ការថែរក្សា​មិនបាន​ដិតដល់​និង​កង្វះ​គ្រឿង​បរិក្ខា​ពន្លត់​​ភ្លើង​ច្រើនតែ​ត្រូវ​បាន​បន្ទោស​ចំពោះ​ការស្លាប់​មនុស្ស​ក្នុង​អគ្គិភ័យ​នៅ​ឥណ្ឌា​៕

​កាលពី​ខែ​សីហា អ្នកជំងឺ​កូវី​ដ​១៩ ចំនួន​៨​នាក់​បាន​ស្លាប់​ក្នុង​អគ្គិភ័យ​នៅ​មន្ទីរពេទ្យ​មួយ​នៅ​ក្រុង​អា​មេ​ដា​បាត​

​