Home ព័ត៌មានអន្តរជាតិ ចិន​នឹង​ដាក់​...

ចិន​នឹង​ដាក់​ចេញ​នូវ​ពន្ធ​ប្រឆាំង​នឹង​ការលក់​បង្ខូច​ថ្លៃ​លើ​ស្រា​របស់​អូស្ត្រាលី​

​ប្រែ​សម្រួល : កញ្ញា​ដា​លី​ស​/​ប៉េកាំង ៖ ចិន​នឹង​វាយ​ពន្ធ​ប្រឆាំង​នឹង​ការលក់​បង្ខូច​ថ្លៃ​ជាង ១០០ ភាគរយ​លើ​ស្រា​អូស្ត្រាលី​ចាប់ពី​ចុង​សប្តាហ៍​នេះ​ដែល​ជា​សញ្ញា​ចុងក្រោយ​នៃ​ភាព​តានតឹង​កាន់តែ​យ៉ាប់យ៉ឺន​​ផ្នែក​ពាណិជ្ជកម្ម​រវាង​ប្រទេស​ទាំង​ពីរ​។​

​ក្រសួង​ពាណិជ្ជកម្ម​ចិន​បាន​និយាយ​នៅក្នុង​សេចក្តីថ្លែងការណ៍​មួយ​នៅ​ថ្ងៃ​សុក្រ​ទី​២៧​វិច្ឆិកា​ថា ពន្ធ​ប្រឆាំងនឹង​ការលក់​បង្ខូច​ថ្លៃ​នឹង​ចូល​ជា​ធរមាន​ចាប់ពី​ថ្ងៃទី ២៨ ខែវិច្ឆិកា (​ថ្ងៃ​សៅរ៍​) និង មាន​ចាប់ពី ១០៧,១ ភាគរយ​រហូតដល់ ២១២,១ ភាគរយ​។​

​ការ​យក​ពន្ធ​នេះ​បាន​កើតឡើង​ក្នុងពេល​តែ​៣ ខែ​ប៉ុណ្ណោះ​បន្ទាប់​ពី​ចិន​បានចាប់ផ្តើម​ការស៊ើបអង្កេត​ប្រឆាំងនឹង​ការលក់​បង្ខូច​ថ្លៃ​និង​ការឧបត្ថម្ភ​ធន​ទៅលើ​ស្រា​អូស្ត្រាលី​និង​បន្ទាប់​ពី​មាន​វិធាន​ជាច្រើន​​ទៀត​រារាំង​ការ​នាំចូល​ធ្យូងថ្ម​រហូត​ដល់​ទង់ដែង​និង​ស្រូវ​សាលី​មកពី​អូស្ត្រាលី​នៅ​ឆ្នាំនេះ​។​

​លោក ថូ​នី បាត់​ថា​គ្លី​ន នាយក​ប្រតិបត្តិ​នៃ​ក្រុម​ឧស្សាហកម្ម​និង​ស្រា​ទំពាំងបាយជូរ​អូស្ត្រាលី បាន​និយាយថា “​យើង​មិន​ជឿ​ថា​មាន​ករណី​ណាមួយ​ត្រូវ​ឆ្លើយ​នោះទេ ដូច្នេះ​បើ​មិន​បាន​ឃើញ​ព័ត៌មាន​លម្អិត​ទេ នោះ​វា​ពិតជា​គួរឱ្យ​ខកចិត្ត​ណាស់​”​។ លោក​កត់សម្គាល់ថា លោក​មិន​ទាន់​បាន​ឃើញ​សេចក្តីថ្លែងការណ៍​របស់​ចិន​នៅឡើយ​ទេ​។​

​ភាគហ៊ុន​របស់​ក្រុមហ៊ុនស្រា Treasury Wine Estates បាន​ធ្លាក់ចុះ​ជាង ១១ ភាគរយ​បន្ទាប់ពី​ដំណឹង​នេះ​បាន​លេចឡើង មុន​ពេល​ការជួញដូរ​ត្រូវ​ផ្អាក​ដើម្បី​រង់ចាំ​ការប្រកាស​ផ្លូវការ​។​

​យោងតាម​សេចក្តីថ្លែងការណ៍​របស់​ក្រសួង​ពាណិជ្ជកម្ម​ចិន​បានឱ្យដឹងថា ក្រុមហ៊ុន Subsidiary Treasury Wine Estates Vintners ជាប់​ឈ្មោះ​ត្រូវ​បង់ពន្ធ ១៦៩,៣ ភាគរយ​។​

​រដ្ឋាភិបាល​អូស្ត្រាលី​និយាយ​នៅ​ថ្ងៃ​សុក្រ​នេះ​ថា ខ្លួន​មាន “​ការខកចិត្ត​ខ្លាំង​បំផុត​”​។​

​រដ្ឋមន្ត្រី​ក្រសួង​កសិកម្ម​អូស្ត្រាលី​លោក ដេវីដ លី​តថល​ប្រោដ និយាយ​នៅក្នុង​សេចក្តីថ្លែងការណ៍​ថា “​ការសម្រេចចិត្ត​ថ្ងៃនេះ​គឺជា​ការវិវត្តន៍​គួរឱ្យ​បារម្ភ​បំផុត និង​ជា​ការសម្រេចចិត្ត​មួយ​ដែល​អូស្ត្រាលី​នឹង​​ប្រយុទ្ធ​ប្រឆាំង​ជា​ដាច់ខាត​។ រដ្ឋាភិបាល​អូស្ត្រាលី​ទាត់​ចោល​រាល់​ការចោទប្រកាន់ថា អ្នក​ផលិត​ស្រា​របស់​យើង​កំពុង​បង្ខូច​ថ្លៃ​ផលិតផល​នាំ​ទៅ​ចិន ហើយ​យើង​បន្ត​ជឿថា​វា​គ្មាន​មូលដ្ឋាន​ឬ​ភស្តុតាង​ណា​​មួយ​សម្រាប់​ការអះអាង​ទាំង​នេះ​ឡើយ​”៕

ចិន​នឹង​ដំឡើង​ពន្ធ​ជាង ១០០ ទៅ ២០០​ភាគរយ​លើ​ផលិតផល​ស្រា​អូស្ត្រាលី​ចាប់ពី​ចុង​សប្តាហ៍​នេះ​តទៅ

ទីតាំងផ្សាយពាណិជ្ជកម្ម

- Advertisment -

Most Popular